អភិបាលខេត្តកំពង់ធំ អញ្ជើញជាអធិបតីក្នុងពិធីសម្ពោធឆ្លងឧបដ្ឋានសាលា និងសមិទ្ធិផលនានា ក្នុងវត្តព្រះពុទ្ធទ្រង់បាត្រ នៅស្រុកកំពង់ស្វាយ

24

នៅព្រឹកថ្ងៃសៅរ៍ ៣ រោច ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៣ ខែមីនា ឆ្នាំ២០១៩ ឯកឧត្តម សុខ លូ អភិបាលខេត្តកំពង់ធំ អញ្ជើញជាអធិបតី ក្នុងពិធីសម្ពោធឆ្លងឧបដ្ឋានសាលា និងសមិទ្ធិផលនានា ក្នុងវត្តព្រះពុទ្ធទ្រង់បាត្រ នៅភូមិស្នោរ ឃុំត្រពាំងឬស្សី ស្រុកកំពង់ស្វាយ ដោយមានការចូលរួមពីសប្បុរសជន យាយជី តាជី លោកគ្រូ-អ្នកគ្រូ សិស្សានុសិស្ស និងប្រជាពលរដ្ឋសរុបជាង១ពាន់នាក់ ៕

ថ្លែងក្នុងពិធីនោះដែរ ឯកឧត្តម សុខ លូ ក៏បានអបអរសាទ និងថ្លែងអំណរគុណរចំពោះការកសាងសមិទ្ធផលទាំងអស់ នៅក្នុងទីអារាមនេះ ដែលកើតចេញពីការខិតខំ ក្នុងការដឹកនាំពីសំណាក់ព្រះចៅអធិការ គណៈកម្មាការអាចារ្យវត្ត និងការចូលរួម ការបរិច្ចាគ ចែករំលែករបស់ពុទ្ធបរិស័ទ្ធ សប្បុរសជនជិតឆ្ងាយ និងប្រជាពលរដ្ឋដែលមានសទ្ធាជ្រះថ្លារួមគ្នា កសាងសមិទ្ធផលនានាក្នុងទីវត្តអារ៉ាមនេះ។ សមិទ្ធផលទាំងអស់នេះ បង្ហាញអំពីការយកចិត្តទុកដាក់ និងការរីកចម្រើនរបស់វិស័យព្រះពុទ្ធសាសនា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឲ្យប្រទេសកម្ពុជាមានសុខសន្តិភាព និងការអភិវឌ្ឍជាបន្តបន្ទាប់។

លើសពីនេះ ឯកឧត្តម បានជំរុញដល់អាជ្ញាធរគ្រប់លំដាប់ថ្នាក់ ត្រូវខិតខំបម្រើសេវាធារណៈជូនប្រជាពលរដ្ឋឲ្យបានទាន់ពេលវេលា ហើយបន្តពង្រឹងបញ្ហាសន្តិសុខ និងសណ្តាប់ធ្នាប់សាធារណៈកាន់តែប្រសើរឡើងថែមទៀត។ ម្យ៉ាងវិញទៀត កងកម្លាំងជំនាញពាក់ព័ន្ធ ត្រូវចូលរួមសហការគ្នាទប់ស្កាត់បទល្មើសនានា ដូចជាបទល្មើសនេសាទ ព្រៃឈើ គ្រឿងញៀន និងចោរកម្ម ជាដើម។ល។

ចុងបញ្ចប់ ឯកឧត្តម អភិបាលខេត្តកំពង់ធំ បានអំពាវដល់បងប្អូនប្រជាពលរដ្ឋទាំងអស់ ត្រូវចូលរួមគោរពប្រតិបត្តិព្រះពុទ្ធសាសនា ស្គាល់បុណ្យ ស្គាល់បាប ទន្ទឹមនឹងនោះ ត្រូវចូលរួមគោរពច្បាប់ចរាចរណ៍ ហើយត្រូវនៅឲ្យឆ្ងាយពីគ្រឿងញៀន។

គួររំលឹកដែរថា នៅក្នុងពិធីសម្ពោធឆ្លងឧបដ្ឋានសាលា និងសមិទ្ធិផលនានានេះ ឯកឧត្តម សុខ លូ បានចូលរួមបច្ច័យចាប់មគ្គផលចំនួន ៥លានរៀល និងមានការចូលរួមពីប្រតិភូអមដំណើរផ្សេងទៀត សរុបទាំងអស់បានចំនួន ៦,៩២០,០០០ រៀល ក្នុងនោះ ក៏មានការចែកអំណោយជូនតាជី យាយជី ចំនួន ៥០នាក់ ក្នុងម្នាក់ៗទទួលបានក្រណាត់ស ១ដុំ និងថវិកា ១ម៉ឺនរៀល លោកគ្រូ អ្នកគ្រូ ចំនួន ៧២នាក់ ក្នុងម្នាក់ទទួលបានថវិកា ២ម៉ឺនរៀល សិស្សានុសិស្ស ចំនួន ៣០០នាក់ ក្នុងម្នាក់ទទួលបាន សៀភៅ ១ក្បាល ប៊ិច ២ដើម៕