ឯកឧត្ដម សុខ លូ ក្មេងៗមិនត្រូវបោះបង់ចោលមនុស្សចាស់ ហើយមនុស្សចាស់កុំអស់សង្ឃឹមថារាជរដ្ឋាភិបាល ឬរដ្ឋបាលគ្រប់ជាន់ថ្នាក់មិនយកចិត្តទុកដាក់នោះដែរ

27

រដ្ឋបាលខេត្តកំពង់ធំ៖ នៅក្នុងពិធីសំណេះសំណាល អបអរសារទរទិវាមនុស្សចាស់កម្ពុជា និងទិវាមនុស្សចាស់អន្តរជាតិ ១ តុលា នាព្រឹកថ្ងៃទី៤ ខែតុលា ឆ្នាំ២០១៩នេះ ឯកឧត្ដម សុខ លូ អភិបាលខេត្តកំពង់ធំ បានលើកឡើងថា ក្មេងៗមិនត្រូវបោះបង់ចោលមនុស្សចាស់ ហើយមនុស្សចាស់កុំអស់សង្ឃឹមថារាជរដ្ឋាភិបាលឬរដ្ឋបាលគ្រប់ជាន់ថ្នាក់មិនយកចិត្តទុកដាក់នោះដែរ។ ពិធីសំណេះសំណាលនេះ ត្រូវបានរៀបចំ ឡើង នៅក្នុងបរិវេណ វត្តក្ដីអណ្ដែត សង្កាត់ស្រយ៉ូវ ក្រុងស្ទឹងសែន ក្រោមអធិបតីភាព ឯកឧត្តម ឈុន ឈន់ ប្រធាន ក្រុមប្រឹក្សាខេត្ត និងឯកឧត្ដម សុខ លូ អភិបាលខេត្តកំពង់ធំ ដោយមានការចូលរួមពី ឯកឧត្តម លោកជំទាវសមាជិកក្រុមប្រឹក្សាខេត្ត ប្រធានមន្ទីរ អង្គភាព មន្ត្រីរាជការ និងលោកតា លោកយាយប្រមាណជាង ២៥០នាក់ផងដែរ។

នាឱកាសនេះដែរ ឯកឧត្ដម សុខ លូ បានថ្លែងថា តាមពិតទិវាមនុស្សចាស់នេះគឺយើងធ្វើរាល់ថ្ងៃនៅតាមទីវត្តអារាមក្ដី នៅតាមទីសាធារណៈផ្សេងៗក្ដី ហើយការប្រារព្ធពិធីទិវាមនុស្សចាស់នៅថ្ងៃនេះគឺចង់បង្ហាញថាយើងមានទិវាមនុស្សចាស់ថ្នាក់ជាតិ និងអន្តរជាតិ។ ចាស់ៗមិនត្រូវបោះបង់ក្មេងៗ ហើយក្មេងៗក៏មិនត្រូវបោះបង់ចាស់ៗនោះដែរ គឺត្រូវតែធ្វើដំណើរជាមួយគ្នាជានិច្ចដូចអណ្ដាត និងធ្មេញដូច្នោះដែរ។ ឯកឧត្តម អភិបាលខេត្តសង្កត់ធ្ងន់ថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានកិត្តិយសគណៈកម្មាធិការជាតិកម្ពុជា ដើម្បីមនុស្សចាស់ តែងតែផ្តល់ក្តីអាណិតស្រលាញ់ សណ្តោសប្រណី យកចិត្តទុកដាក់ និងគិតគូរខ្ពស់ពីសុខទុក្ខរបស់ លោកយាយ លោកតា និងជនរួមជាតិទាំងអស់ ហើយថ្នាក់ដឹកនាំមិនចង់ឲ្យប្រជាពលរដ្ឋ របស់ខ្លួនណាម្នាក់ជួបភាពអត់ឃ្លាននោះឡើយ។

បន្ទាប់ពីសំណេះសំណាល ឯកឧត្តម សុខ លូ បានឧត្ថម្ភថវិកាចំនួន២លានរៀលដល់សមាគមមនុស្សចាស់ ភូមិពុកយុគ សង្កាត់ស្រយ៉ូវ និង បានចែកជូនសារ៉ុងម្នាក់មួយ ដល់លោកយាយ លោកតាដែលបាន ចូលរួមទាំងអស់ផងដែរ៕