(រដ្ឋបាលខេត្តកំពង់ធំ) ៖ ឯកឧត្តម សុខ លូ អភិបាលខេត្តកំពង់ធំ ថ្លែងថា មន្ត្រីរាជការ ក្នុងអង្គភាពរដ្ឋបាលខេត្ត ក្រុង ស្រុក ទាំង៩ និងមន្ទីរអង្គភាព ព្រមទាំងប្រជាពលរដ្ឋក្នុងខេត្តកំពង់ធំ ទទួលបានវ៉ាក់សាំង Sinovac របស់ប្រទេសចិន ចាប់ពីថ្ងៃទី១ ខែមេសានេះតទៅ។
ឯកឧត្តមបានថ្លែងយ៉ាងដូច្នេះ នាព្រឹកថ្ងៃទី ០១ ខែមេសា ឆ្នាំ ២០២១ ក្នុងពិធីជួបសំណេះសំណាលជាមួយពលករដែលទើបវិលត្រឡប់មកពីប្រទេសថៃ នៅមណ្ឌលចត្តាឡីស័កនៅវិទ្យាល័យកំពង់ធំ ដែលតម្រូវបន្តធ្វើចត្តាឡីស័កនៅតាមផ្ទះរៀងៗខ្លួនទៀតនោះ និងបន្តដំណើរចុះពិនិត្យការបើកយុទ្ធនាការចាក់វ៉ាក់សាំងការពារជំងឺកូវីដ១៩ នៅក្រុងស្ទឹងសែន ស្រុកសន្ទុក ស្រុកបារាយណ៍ ស្រុកតាំងគោក ស្រុកប្រាសាទបល្ល័ង្ក ស្រុកកំពង់ស្វាយ និងស្រុកស្ទោង ។
ឯកឧត្តម សុខ លូ បន្ថែមទៀតថា ដើម្បីរួមគ្នាទប់ស្កាត់ការឆ្លងរីករាលដាលនៃជំងឺកូវីដ១៩ ប្រមុខរាជរដ្ឋាភិបាលនៃព្រះរាជាណាចក្រកម្ពុជា ដឹកនាំដោយសម្ដេចអគ្គមហាសេនាបតីតេជោ ហ៊ុន សែន បានផ្ដល់នូវវ៉ាក់សាំងចាក់ជូនដល់មន្ត្រីរាជការ កងកម្លាំងប្រដាប់អាវុធនិងប្រជាពលរដ្ឋទូទាំងប្រទេស ដោយមិនមានការយកលុយនោះទេ។
ឯកឧត្តម សុខ លូ អភិបាលខេត្តកំពង់ធំបានបន្តថា ខេត្តកំពង់ធំយើងកន្លងមកបានរងឥទ្ធិពល នៃការឆ្លងជំងឺកូវីដ-១៩ មកពីតាមបណ្តាខេត្តផ្សេងៗ ពោលគឺមិនមានជំងឺនេះ ផ្ទុះឡើងឯងៗ នៅក្នុងសហគមន៍នោះទេ ដូច្នេះប្រការ ដែលយើងបានចាក់វ៉ាក់សាំង គឺយើងទទួលបានការគាំពារ និងការការពារបានរហូតដល់ ទៅក្នុងរង្វង់ ៩០% រួចផុតពីការឆ្លងជំងឺដ៏សាហាវនេះ ។
ឯកឧត្តមអភិបាលខេត្តកំពង់ធំ ក៏បានបញ្ជាក់ផងដែរថា អ្នកដែលបានចាក់វ៉ាក់សាំងលើកទី១ រួចហើយ ត្រូវតែអនុវត្តតាមវិធាន សុខាភិបាល ឲ្យបានត្រឹមត្រូវ ទាំងមុនពេលចាក់ និងក្រោយពេលចាក់ដូសទី១ រហូតដល់ថ្ងៃចាក់ដូសទី២ ត្រូវអនុវត្តតាមការណែនាំរបស់គ្រូពេទ្យ រហូតដល់ថ្ងៃកំណត់ ដែលគ្រូពេទ្យបានណែនាំនោះ ទើបវ៉ាក់សាំងមានប្រសិទ្ធភាពខ្ពស់។
ឯកឧត្តម សុខ លូ ក៏បានអំពាវនាវដល់មន្ត្រីរាជការ និងបងប្អូនទាំងអស់ សូមចូលរួមចាក់វ៉ាក់សាំងនេះឲ្យបានគ្រប់គ្នាៗតបតាមការអញ្ជើញរបស់រដ្ឋបាលខេត្ត រដ្ឋបាលក្រុងស្រុក តាមពេលវេលាកំណត់ ហើយការចាក់វ៉ាក់សាំងនេះនឹងធ្វើការចាក់ជាបន្តបន្ទាប់ទៀតមិនមែនចាក់តែមួយថ្ងៃនេះទេ ។