(រដ្ឋបាលខេត្តកំពង់ធំ)៖ ឯកឧត្តម សុខ លូ អភិបាលខេត្តកំពង់ធំ បានថ្លែងក្រើនរម្លឹក ដល់ប្រជាពលរដ្ឋក្នុង ខេត្តកំពង់ធំទាំងអស់ កុំឲ្យធ្វេសប្រហែសពីជំងឺកូវីដ-១៩នេះឱ្យសោះ បើទោះបីជាកម្ពុជាមិនទាន់រកឃើញ ករណីឆ្លងថ្មីទៀតរយៈពេលកន្លងមកនេះក្តី ព្រមទាំងសំណូមពរដល់ប្រជាពលរដ្ឋទាំអស់ត្រូវរក្សាអនាម័យ លាងដៃនឹងសាប៊ូ ជេល ទឹកអាល់កុល ឬទឹកសម្លាប់មេរោគ ត្រូវរក្សាគម្លាតគ្នា និងមិនត្រូវបង្កើត មានកម្មវិធី ជួបជុំនោះទេ ដើម្បីរួមគ្នាបន្តបង្ការទប់ស្កាត់ អនុវត្តន៍ឱ្យបានខ្ជាប់ខ្ជួន ការរីករាលដាលនៃជំងឺ កូវីដ-១៩ តាមការណែនាំរបស់ក្រសួងសុខាភិបាល ។
ការថ្លែងយ៉ាងដូច្នេះ នៅក្នុងឱកាសដែល ឯកឧត្តម សុខ លូ អភិបាលខេត្តកំពង់ធំ ចូលរួមប្រគល់អណ្តូងស្នប់ នៅសាលាឃុំក្លែង ស្រុកសណ្តាន់ ដែលជាអំណោយរបស់ ឯកឧត្តម ខាន់ ខុន ប្រធានសហគមន៍បេសកកម្មដំណឹងល្អ និងលោកជំទាវ និងបន្ដជួបសំណេះសំណាលជាមួយប្រជាពលរដ្ឋ ព្រមទាំងនាំយកអំណោយ របស់មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ធំ ចែកជូនដល់ប្រជាពលរដ្ឋដែលជួបការលំ បាក ៧៥គ្រួសារ ស្ថិតនៅស្រុកសណ្ដាន់ នឹងស្រុកប្រាសាទសំបូរ ខេត្តកំពង់ធំ នាព្រឹកថ្ងៃទី១៣ ខែឧសភាឆ្នាំ២០២០។
ឯកឧត្តមបានឱ្យដឹងទៀតថា រហូតមកដល់ពេលនេះ កម្ពុជាបានរកឃើញអ្នកឆ្លងជំងឺកូវីដ-១៩ ចំនួន១២២ករណី ក្នុងនោះបានព្យាបាលជាសះស្បើយចំនួន ១២១ករណី នៅសល់តែ ១នាក់ប៉ុណ្ណោះ កំពុងសម្រាកព្យាបាលនៅមន្ទីរពេទ្យ។ ទោះជាយ៉ាងនេះក្តីកម្ពុជា មិនបានបន្ធូរបន្ថយវិធានការក្នុងការបង្ការ ការពារចំពោះការរីករាលដាល នៃជំងឺកូវីដ-១៩នេះ នៅឡើយទេ ដោយសារតែប្រទេសផ្សេងៗនៅលើពិភពលោក ក៏ដូចជាប្រទេសជិតខាងរបស់ខ្លួនកំពុងមានការឆ្លងរីករាលដាលជាបន្តបន្ទាប់នៅឡើយ។
ជាមួយគ្នានោះដែរ ឯកឧត្តម សុខ លូ បន្តទៀតថា អំណោយដែលផ្តល់ជូនប្រជាពលរដ្ឋខ្វះខាតនាពេលនេះ គឺមានការចូលរួមចំណែកពីមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តកំពង់ធំ ក្នុងការជួយដោះស្រាយនូវការខ្វះខាតជូនពុកម៉ែបងប្អូនបានមួយរយៈពេលខ្លីតែប៉ុណ្ណោះ ដូច្នេះសូមពុកម៉ែបងប្អូនត្រូវខិតខំដំាដំណាំរួមផ្សំបន្ថែមទៀត។ លើសពីនេះទៀត ឯកឧត្តម សុខ លូ ក៏បានពាំនាំនូវកាផ្តាំផ្ញើរសាកសួរសុខទុកពីសម្តេចទាំងទ្វេរ ជូនចំពោះពុកម៉ែបង្អូនទាំងអស់ ព្រមទាំងផ្តល់នូវអំណោយសប្បុរសធម៌ តាមរយៈក្រសួងសង្គមកិច្ច អតីតយុទ្ធជន និងយុវនីតិសម្បទា ដែលមានមន្ទីរសង្គមកិច្ច ជាសេនាធិការស្រាប់។
បន្ទាប់ពីសំណេះសំណាលចប់ ឯកឧត្តមបានប្រគល់អំណោយសប្បុរសជន ជូនដល់ ៧៥គ្រួសារ ដោយមួយគ្រួសារ ទទួលបាន កន្ទេល ១ , ភួយ ១ , អង្ករ ២៥គីឡូក្រាម , ទឹកត្រី ១យួរ , ត្រីខ ១យួរ និងបន្តដំណើរចុះសួរសុខទុក្ខមន្រ្តីចត្តាឡឺស័ក និងចែកសម្ភារៈប្រឆាំងជំងឺ កូវីដ-១៩ ដែលប្រចាំការនៅស្រុកសណ្តាន់ និងស្រុកប្រាសាទសំបូរ។