(រដ្ឋបាលខេត្តកំពង់ធំ): នាព្រឹកថ្ងៃទី ៤ ខែតុលា ឆ្នាំ២០២១ ឯកឧត្តម សុខ លូ អភិបាលខេត្តកំពង់ធំ អញ្ជើញជួបសំណេះសំណាលជាមួយមន្ត្រីរាជការ មន្ត្រីជាប់កិច្ចសន្យាសាលាខេត្ត ថ្នាក់ដឹកនាំមន្ទីរអង្គភាពជុំវិញខេត្ត មន្ត្រីចូលនិវត្តន៍ និងបន្តចុះសាកសួរសុខទុក្ខនៅបុរីកុមារខេត្តកំពង់ធំ មុននឹងឯកឧត្តមត្រូវទៅទទួលភារកិច្ចថ្មីជាអភិបាលខេត្តបាត់ដំបង នាពេលដ៏ខ្លីខាងមុខនេះ ។
ថ្លែងនៅក្នុងពិធីជួបសំណេះសំណាលនោះដែរ ឯកឧត្តម សុខ លូ បានផ្ដាំផ្ញើដល់មន្ត្រីរាជការទាំងអស់ សូមបន្តខិតខំរក្សានូវកត្តាសាមគ្គីភាព ឯកភាពផ្ទៃក្នុង ឲ្យបានល្អប្រសើរថែមទៀត ដើម្បីអភិវឌ្ឍន៍អង្គភាពអោយមានការរីកចម្រើន ជាពិសេសខិតខំផ្ដល់សេវាសាធារណៈជូនប្រជាពលរដ្ឋឲ្យបានឆាប់រហ័ស និងទាន់ពេលវេលា ។
ឯកឧត្តមសុខលូបន្ថែមទៀតថា នៅក្នុងអាណត្តិដឹកនាំរបស់ឯកឧត្តម បានធ្វើឲ្យខេត្តកំពង់ធំមានការអភិវឌ្ឍ លេចចេញនូវសមិទ្ធិផលជាច្រើន ដែលកើតចេញពីកត្តាសាមគ្គីភាព ឆ្ពោះទៅរកការអភិវឌ្ឍន៍លើវិស័យផ្សេងៗ ផ្តោតសំខាន់លើផលប្រយោជន៍រួម និងសម្បត្តិជាសាធារណៈ។ ឯកឧត្តមបន្តថា គ្រប់រចនាសម្ព័ន្ធដឹកនាំ ត្រូវមានមន្ត្រីក្រោមឱវាទជាអនុវត្តន៍ការងារ ក្រោមការពិនិត្យ និងវាយតម្លៃដោយប្រធានគ្រប់ការិយាល័យគ្រប់ផ្នែក។ ការអនវុត្តន៍ការងារបានល្អ ដោយសារមានកត្តាសាមគ្គីភាពផ្ទៃក្នុងបានល្អប្រសើរ នោះមានន័យថា ការអភិវឌ្ឍន៍របស់រដ្ឋបាលខេត្តកំពង់ធំ រួមជាសមិទ្ធផលធំៗក្នុងអាណាត្តិរបស់ឯកឧត្តមផងដែរ។ សមិទ្ធផលធំៗរួមមាន វិមានឯករាជ្យ កសាងឡើងស្ទើរចំកណ្តាលនៃព្រះរាជាណាចក្រកម្ពុជា ត្រង់ចំណុចប្រសព្វផ្លូវខ្វែងជាបួន ដែលមានអត្ថន័យសំខាន់បំផុតបង្ហាញពីឯករាជ្យភាព បូរណៈភាពទឹកដី រួមជាមួយសួនច្បារសម្អរផង, ការរៀបចំអភិវឌ្ឍន៍សួនកុមារ មកជាសួនស្ទឹងសែន ស្ថិតនៅតាមបណ្តោយដងស្ទឹងសែន ក្នុងក្រុងស្ទឹងសែន ខេត្តកំពង់ធំ ដែលជាទីកន្លែងសម្រាប់កំសាន្ត កន្លែងសម្រាប់ហាត់ប្រាណ សម្រាប់ប្រជាពលរដ្ឋក្នុងខេត្តកំពង់ធំទាំងមូល រួមជាមួយអ្នកដំណើរឆ្លងកាត់ផង, រូបសំណាក់ដាវដែកកំពង់ស្វាយ បញ្ជាក់ពីកេរ្តិ៍ដំណែលប្រវត្តិសាស្រ្ត ក្នុងទឹកដីក្នុងខេត្តកំពង់ធំ និងដើម្បីផ្តល់នូវសក្ខីភាព ចងចាំដល់បទចម្រៀង ដែលច្រៀងក្នុងពិធីរៀបអាពាហ៍ពិពាហ៍កុលបុត្រកុលធីតាខ្មែរគ្រប់, រូបសំណាក់អាចារ្យលាក់ បង្ហាញនូវសេចក្តីដឹងគុណបុព្វបុរសខ្មែរ ក្នុងនាមជាកូនជាចៅជំនាន់ក្រោយមិនអាចបំភ្លេចបាន, លោកតាក្រហម ក៏សាងឡើងស្របតាមជំនឿប្រវត្តិសាស្រ្ត ជំនឿសាសនារបស់ប្រជារដ្ឋគ្រប់រូប បន់ស្រន់សុំសេចក្តីសុខ។ ក្រៅពីសមិទ្ធផលទាំងនេះ ខេត្តកំពង់ធំ បានអភិវឌ្ឍន៍ប្រព័ន្ធហេដ្ឋារចនាសម្ព័ន្ធគ្រប់ផ្នែក គ្រប់សង្កាត់ ក្រុង ស្រុក ដើម្បីបម្រើផលប្រយោជន៍សាធារណៈ ផលប្រយោជន៍រួមជូនប្រជាពលរដ្ឋ សំដៅបានការអភិវឌ្ឍន៍ឆ្ពោះទៅមុខ និងព្យាយាមកាត់បន្ថយភាពក្រីក្ររបស់ប្រជាពលរដ្ឋស្របតាមគោលនយោបាយរបស់រាជរដ្ឋាភិបាល។ ទន្ទឹមនោះសមិទ្ធផលដែលមិនអាចមើលរំលងបាននោះ គឺការអភិវឌ្ឍន៍ច្រាំងស្ទឹងសែន ការរៀបចំពង្រីកសួនសម្តេចតេជោ រៀបចំឲ្យមាននិមិត្តសញ្ញារបស់រដ្ឋបាលខេត្តកំពង់ធំ និងដាក់ពាក្យស្លោកមួយឃ្លា “ខ្ញុំស្រឡាញ់ខេត្តកំពង់ធំ” ជាអនុវស្សាវរីយ៍។ ឯកឧត្តមបញ្ជាក់ថា សមិទ្ធផលទាំងនេះ គឺកើតចេញពីការសិក្សាស្រាវជ្រាវ ក្រោមកិច្ចសហការ សាមគ្គីភាពរបស់អង្គភាពមន្ទីរជំនាញ រួមជាមួយអង្គភាពពាក់ព័ន្ធគ្រប់ផ្នែក ហើយក៏បានរៀបចំចងក្រងជាឯកសារសៀវភៅសម្រាប់បន្សល់ទុកដល់ប្រជាពលរដ្ឋខេត្តកំពង់ធំ ផងដែរ។