រដ្ឋបាលខេត្តកំពង់ធំ៖ នៅក្នុងពិធីសំណេះសំណាលជាមួយ ប្រជាសហគមន៍ទេសចរណ៍ប្រាសាទសំបូរព្រៃគុក ក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ នារសៀលថ្ងៃទី៨ ខែកញ្ញា ឆ្នាំ២០១៩ ឯកឧត្តម សុខ លូ អភិបាលខេត្តកំពង់ធំ បានសំណូមពរដល់បងប្អូនប្រជាពលរដ្ឋ ក៏ដូចជាបងប្អូនប្រជាសហគមន៍ទេសចរណ៍ប្រាសាទសំបូរព្រៃគុក ត្រូវខិតខំសកម្មចូលរួមថែរក្សា អភិរក្ស ប្រាសាទសំបូរព្រៃគុករបស់យើងឲ្យបានល្អ ហើយកិច្ចការនេះគឺត្រូវផ្ដើមចេញពីបងប្អូនដែលរស់នៅក្នុងសហគមន៍តំបន់ប្រាសាទសំបូរព្រៃគុកនេះមុនគេ។ ពិធីសំណេះសំណាលនេះ ត្រូវបានរៀបចំឡើងនៅក្នុងបរិវេណប្រាសាទសំបូរព្រៃគុក ដោយមានការចូលរួមពីអាជ្ញាធរប្រាសាទសំបូរព្រៃគុក រដ្ឋបាលស្រុកប្រាសាទសំបូរនិងបងប្អូនប្រជាពលរដ្ឋ ពិសេសបងប្អូនប្រជាសហគមន៍ទេសចរណ៍ប្រាសាទសំបូរព្រៃគុក ប្រមាណជាង ២០០នាក់។
ឯកឧត្តម សុខ លូ បានថ្លែងបន្តថា តំបន់ប្រាសាទសំបូរព្រៃគុក ក្រោយពីដាក់ចូលជាបេតិកភណ្ឌពិភពលោករួចមក គឺមានអាជ្ញាធរប្រាសាទសំបូរពៃ្រគុកជាអ្នកគ្រប់គ្រង រាល់ការលក់ដូរ និងការសាងសង់សំណង់នានានៅក្នុងបរិវេណនេះ។ ដូច្នេះមុននឹងបងប្អូនធ្វើការសាងសង់អ្វីមួយ ត្រូវសុំច្បាប់ពីអាជ្ញាធរប្រាសាទសំបូរព្រៃគុកជាមុន ដើម្បីឲ្យអ្នកជំនាញចុះទៅពិនិត្យ ប្រសិនបើមិនប៉ះពាល់ដល់សម្បត្តិបេតិកភណ្ឌនៅក្រោមដីទេ អាជ្ញាធរប្រាសាទសំបូរពៃ្រគុកនឹងអនុញ្ញាតឱ្យសាងសង់ ហើយបងប្អូនត្រូវសាងសង់តាមប្លង់គំរូដែលអាជ្ញាធរផ្ដល់ជូន បងប្អូនមិនអាចសាងសង់តាមអ្វីដែលបងប្អូនចង់ធ្វើនោះទេ។ ការរៀបចំដូចនេះ គោលបំណងគឺចង់ទាក់ទាញភ្ញៀវទេសចរជាតិ និងអន្តរជាតិឲ្យចូលមកទស្សនាប្រាសាទសំបូរព្រៃគុករបស់យើង។ ឯកឧត្តមអភិបាលខេត្តបានបន្តទៀតថា កន្លងមកមានការលើកឡើងពីសំណាក់បងប្អូនប្រជាពលរដ្ឋអំពីបញ្ហារផ្លូវឆ្លងកាត់ប្រាសាទសំបូរព្រៃគុកបច្ចុប្បន្ននេះ ថាអាជ្ញាធរស្រុក ខេត្ត មិនយកចិត្តទុកដាក់ធ្វើផ្លូវក្រាលកៅស៊ូតភ្ជាប់នោះ ជាការឆ្លើយតប ឯកឧត្តមបានបញ្ជាក់ច្បាស់ថា ការកសាងផ្លូវនេះមិនមែនជាសមត្ថកិច្ចរបស់អាជ្ញាធរស្រុក ខេត្តនោះទេ គឺជាសមត្ថកិច្ចរបស់អាជ្ញាធរជាតិសំបូរព្រៃគុក ហើយបច្ចុប្បន្ននេះអាជ្ញាធរជាតិសំបូរព្រៃគុក ដោយបានការឯកភាពរួចហើយពីរាជរដ្ឋាភិបាលនឹងកសាងផ្លូវថ្មីមួយវៀងតំបន់ប្រាសាទសំបូរព្រៃគុកនេះ សម្រាប់រថយន្តធន់ធំឆ្លងកាត់ រីឯផ្លូវដែលកំពុងប្រើឆ្លងកាត់ប្រាសាទសំបូរព្រៃគុកបច្ចុប្បន្ននេះនឹងធ្វើ ដែលគម្រោងកសាងផ្លូវខាងលើនេះ នឹងធ្វើឡើងនៅចុងឆ្នាំនេះ ឬឆ្នាំក្រោយតែម្តង។ ឯកឧត្តមក៏បញ្ជាក់បន្ថែមថា កាលណា យើងមិនខិតខំ រក្សានិរន្តរភាពតំបន់ប្រាសាទសំបូរព្រៃគុកនេះទេ អង្គការយូណេស្កូអាចនឹងលុបតំបន់ប្រាសាទនេះចេញពីបញ្ជីបេតិកភណ្ឌពិភពលោកជាក់ជាមិនខាន នេះជាលក្ខខណ្ឌមួយដែលគេតម្រូវឱ្យធ្វើ ទាំងនេះហើយបានជាអាជ្ញាធរសំបូរព្រៃគុកចាំបាច់ត្រូវចាត់វិធានការ និងគ្រប់គ្រងតឹងរឹងបែបនេះ។ ដូច្នេះសូមបងប្អូនប្រជាពលរដ្ឋ ប្រជាសហគមន៍ទេសចរណ៍ប្រាសាទសំបូរព្រៃគុកយល់ពីបញ្ហានេះ ហើយខិតខំ ចូលរួមថែរក្សា ហើយសហការគ្នាឱ្យបានល្អ មួយវិញទៀតបងប្អូនត្រូវជឿជាក់ និងចូលរួមជាមួយរាជរដ្ឋាភិបាលក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ថែរក្សាសុខសន្តិភាព ដែលយើងរកបានដោយលំបាកមកនេះឱ្យបានគង់វង្ស។
ក្រោយពីស្ដាប់នូវរបាយការណ៍ ការលើកឡើងរបស់ប្រជាសហគមន៍ និងមតិរបស់ឯកឧត្តមអភិបាលខេត្តរួចមក ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ បានចេញដំណោះស្រាយភ្លាមៗ ដោយបញ្ជាទៅមន្ត្រីជំនាញពាក់ព័ន្ធ ត្រូវចុះជួយសម្រួលមធ្យោបាយជូនប្រជាសហគមន៍ឱ្យបានសម្រេច។ ឯកឧត្តមបណ្ឌិត ក៏បានឯកភាពជាមួយឯកឧត្តមអភិបាលខេត្ត នៅចំពោះមុខប្រជាសហគមន៍ផងដែរ ដោយប្ដេជ្ញាជំរុញការអភិវឌ្ឍសិប្បកម្មផលិតគ្រាប់ស្វាយចន្ទីនេះ ឱ្យបានសម្រេចជាផ្លែផ្កា។ ឯកឧត្តមរដ្ឋមន្រ្តីក៏បានលើកទឹកចិត្តឱ្យប្រជាសហគមន៍ ខិតខំដាំដើមរពាក់ ដើមឫស្សីឱ្យបានច្រើនឡើងវិញ ដើម្បីទុកប្រើប្រាស់ជាវត្ថុធាតុដើមសម្រាប់ផលិត ជាផលិតផលតម្បាញនានា ហើយត្រូវខិតខំដាំដុះដំណាំ និងចិញ្ចឹមសត្វ ធ្វើជាវត្ថុធាតុដើមក្នុងការផលិតជាផលិតផល សេវាកម្មម្ហូបអាហារ ដើម្បីបម្រើដល់តម្រូវការភ្ញៀវទេសចរ។
ថ្នាក់ដឹកនាំទាំងពីរក៏បានអំពាវនាវឱ្យប្រជាពលរដ្ឋ ត្រូវយកចិត្តទុកដាក់បន្ថែមលើគុណភាពសេវា អនាម័យចំពោះផលិតផលរបស់ខ្លួន ដែលលក់ជូនភ្ញៀវទេសចរ ដើម្បីអន្ទងចិត្តពួកគេឱ្យមកទស្សនាតំបន់ប្រាសាទសំបូរព្រៃគុក នាពេលក្រោយៗទៀត ព្រមទាំងជំរុញទឹកចិត្តឱ្យពួកគេជួយផ្សព្វផ្សាយពីគោលដៅទេសចរណ៍ក្នុងតំបន់នេះផងដែរ៕