(រដ្ឋបាលខេត្តកំពង់ធំ): នាព្រឹកថ្ងៃទី ១៩ ខែឧសភា ឆ្នាំ២០២១ ឯកឧត្តម សុខ លូ អភិបាលខេត្តកំពង់ធំ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត អញ្ជើញដឹកនាំកិច្ចប្រជុំគណៈកម្មាធិការសាខាកាកបាទក្រហមកម្ពុជាខេត្តកំពង់ធំ ដើម្បីធ្វើការកៀគររកមូលនិធិ តាមបណ្ដាសាខាក្នុងឱកាស អបអរសាទរខួបលើកទី១៥៨ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ក្រោម ប្រធានបទ “ទាំងអស់គ្នារួមគ្នាជាមួយ កាកបាទក្រហមកម្ពុជា ប្រយុទ្ធនឹង ជម្ងឺកូវីដ១៩ និងកសាងភាពធន់ របស់សង្គមជាតិ” តាមរយៈប្រព័ន្ធវីដេអូ Microsoft Teams នៅសាលាខេត្តកំពង់ធំ។
ជាមួយគ្នានោះដែរឯកឧត្តម សុខ លូ មានប្រសាសន៍លើកឡើងថា កន្លងមកទោះបីជាយើងមិនមានថវិកាច្រើនក៏ប៉ុន្តែយើងអាចធ្វើសកម្មភាពមនុស្សធម៌បានច្រើន និងប្រើប្រាស់ថវិកាចំគោលដៅ ។ ឯកឧត្តមបន្ថែមទៀតថា សកម្មភាពទាំងអស់នេះកើតឡើងបានអាស្រ័យលើយើងទាំងអស់គ្នាមានបេះដូងមនុស្សធម៌ ធ្វើការងារដោយមិនគិតនូវផលប្រយោជន៍ផ្ទាល់ខ្លួន ថែមទាំងចំណាយពេលវេលា និងថវិកាផ្ទាល់ខ្លួនថែមទៀតផង ដើម្បីនាំយកអំណោយនិងសម្ភារៈចែកជូនដល់បងប្អូនប្រជាពលរដ្ឋដែលកំពុងមានជីវភាពខ្វះខាត និងត្រូវការជំនួយជាបន្ទាន់។
លើសពីនេះទៀតឯកឧត្តម សុខ លូ អភិបាលខេត្តកំពង់ធំ ក៏បានថ្លែងអំណរគុណដល់ក្រុមប្រតិបត្តិសាខា អនុសាខា យុវជនស្ម័គ្រចិត្តកាកបាទក្រហមកម្ពុជាខេត្តកំពង់ធំទាំងអស់ ដែលខិតខំធ្វើការងារមនុស្សធម៌និងចូលរួមចែកអំណោយនៅគ្រប់ទីកន្លែងដោយមិនខ្លាចនឿយហត់។