ព្រឹកថ្ងៃទី០៨ ខែឧសភា ឆ្នាំ២០១៧ ឯកឧត្តម សុខ លូ អភិបាលខេត្តកំពង់ធំ បានដឹកនាំក្រុមការងារចុះផ្សព្វផ្សាយអំពីការធ្វើអត្តសញ្ញាណកម្មដី ក្នុងការអនុវត្តគម្រោងបែងចែកដីសម្បទានសង្គមកិច្ច និងការអភិវឌ្ឍន៍សេដ្ឋកិច្ច ដំណាក់កាលទី២ (LASED II) លើផ្ទៃដីចំនួន ២.៩២២ហិចតា ក្នុងឃុំដូង ស្រុកប្រាសាទបល្ល័ង្ក ជូនដល់គ្រួសារដែលត្រូវទទួលបានដីសម្បទានសង្គមកិច្ចពីគម្រោង ដែលមានប្រជាពលរដ្ឋចូលរួមប្រមាណ ៥១០ នាក់ ។
ក្នុងឱកាសនោះ ឯកឧត្តម សុខ លូ បានលើកឡើងថា មានក្រុមខិលខូចមួយចំនួន បានធ្វើការឃោសនា ថា រដ្ឋ នឹងដកដីពីបងប្អូនដើម្បីយកទៅធ្វើជាដីសម្បទានសង្គមកិច្ច ។ នេះជាការញុះញ៉ង់ទេ សូមបងប្អូនកុំមានការព្រួយបារម្មណ៍ គម្រោង LASED II នេះ គឺជាគម្រោងរបស់រាជរដ្ឋាភិបាល ដែលគាំទ្រថវិកាពីធនាគារពិភពលោក គម្រោងនេះធ្វើឡើង ដើម្បីផ្តល់ដីលំនៅដ្ឋាន និងដីបង្កបង្កើនផល ជូនបងប្អូនដែលខ្វះខាតអត់ដី ដោយយកដីដែលទំនេរមកចែកជូន គឺមិនមែន ដកដីដែលបងប្អូនកំពុងកាន់កាប់នោះទេ ពោលគឺដីដែលបងប្អូនប្រើប្រាស់រាល់ថ្ងៃនឹងត្រូវឆ្វៀលចេញជូនបងប្អូនវិញ ។ គម្រោងនេះ គឺទើបតែចាប់ផ្តើមប៉ុណ្ណោះ រីឯជំហ៊ានដែលត្រូវធ្វើគឺនៅមានជាច្រើនទៀត ។ ការធ្វើអត្តសញ្ញាណកម្មដីនេះ គឹដើម្បីដឹងច្បាស់ថា ដីរបស់បងប្អូនដែលបានកាន់កាប់នោះមានប៉ុន្មាន នៅត្រង់ណាខ្លះ ដើម្បីឆ្វៀលជូនបងប្អូនវិញតែប៉ុណ្ណោះ មិនមែនដើម្បីដកហូត ដីពីបងប្អូន ដូចជនអគតិ មកកុហកបោកប្រាស់កន្លងមកនោះទេ ។
គម្រោងនេះ ក្នុងរយៈពេល ៥ឆ្នាំ (២០១៧-២០២២) សម្រាប់ធ្វើការបែងចែកដី ផ្តល់សម្ភារៈសម្រាប់សាងសង់លំនៅដ្ឋាន ចំនួន ៧០០គ្រួសារ ជួយសាងសង់ហេដ្ឋារចនាសម្ព័ន្ធ រូបវ័ន្ត ដូចជា សាលារៀន ផ្ទះសម្រាប់គ្រូ សម្ភារៈកសិកម្ម សម្ភារៈលំនៅដ្ឋាន និងសាងសង់ជម្រកជូនគ្រួសារដែលត្រូវទទួលបានដីសម្បទាន រៀបចំបោះបង្គោលព្រំដី រៀបចំដីកសិកម្ម និងផ្តល់គ្រាប់ពូជ ធ្វើផ្លូវក្រាលគ្រួសក្រហម និងផ្លូវដីស ប្រវែង ២៩គីឡូម៉ែត្រ ទំនប់ទឹកខ្នាតតូច ប៉ុស្តិ៍សុខភាព ផ្ទាំងប៉ានណូ អណ្តូងស្នប់ ចំនួន ៥០ និងអគារសហគមន៍ ១ ខ្នង ។ ប្រជាពលរដ្ឋដែលអាចទទួលបានដីសម្បទានសង្គមកិច្ច និងប័ណ្ណកម្មសិទ្ធិស្របច្បាប់បាន គឺ ប្រជាពលរដ្ឋ ដែលបានរស់នៅ និងអាស្រ័យផលលើដីនោះ រយៈពេលចាប់ពី ៥ឆ្នាំឡើង ត្រឹមត្រូវតាមលក្ខខណ្ឌកំណត់ ។
ជាចុងក្រោយ ឯកឧត្តម សុខ លូ បានសំណូមពរដល់បងប្អូនប្រជាពលរដ្ឋទំាងអស់ មិនអោយលក់ដូរដីនេះទេ ព្រោះវាជាអាយុជីវិតរបស់បងប្អូន ។ មានតែរាជរដ្ឋាភិបាលដែលដឹកនាំដោយសម្តេច ហ៊ុន សែន ទេ ដែលតែងតែគិតដល់ជីវភាពរស់នៅរបស់បងប្អូន និយាយហើយគឺធ្វើ មិនដើរសន្យាខ្យល់ដូចបក្សមួយចំនួននោះទេ ដែលតែងតែនិយាយភូតកុហកប្រជាពលរដ្ឋ ។ ឯកឧត្តម បានលើកឡើងទៀតថា “អ្នកថាមិនងាយស្រួលដូចអ្នកធ្វើនោះទេ” និងសូមបងប្អូនជួយគាំទ្រដល់ប្រមុខរាជរដ្ឋាភិបាល បានដឹកនាំប្រទេស រក្សាសុខសន្តិភាព សុវត្ថិភាព ជានិរន្តបន្តទៀត ៕