(រដ្ឋបាលខេត្តកំពង់ធំ)៖ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និងជាអគ្គលេខាធិការសមាគមអតីតយុទ្ធជនកម្ពុជា (ស អ.ក) អមដំណើរដោយ ឯកឧត្តម សុខ លូ អភិបាលខេត្តកំពង់ធំ និងជាប្រធានកិត្តិយសសមាគមអតីតយុទ្ធជនខេត្តកំពង់ធំ រួមទាំងឧត្តមសេនីយ៍ទោ សោម ស៊ុន ប្រធានសមាគមអតីតយុទ្ធជនកម្ពុជាខេត្ត ដោយមានការអញ្ជើញចូលរួមពីសំណាក់មន្រ្តីជំនាញសូរិយោដី ប្រធានសមាគមស្រុកក្រុង និងលោកយាយ លោតា ដែលជាអតីតយុទ្ធជនចូលរួម ក្នុងពិធីចាប់ឆ្នោតយកក្បាលដី និងផ្ទះ ស្ថិតនៅក្នុងដីសម្បទានសង្គមកិច្ច ឃុំក្រយា ស្រុកសន្ទុក ខេត្តកំពង់ធំ នៅព្រឹកថ្ងៃទី២២ ខែឧសភា ឆ្នាំ ២០២១។
ថ្លែងក្នុងពិធីនោះដែរឧត្តមសេនីយ៍ទោ សោម ស៊ុន មេបញ្ចាការតំបន់ប្រតិបត្តិការសឹករងកំពង់ធំ និងជាប្រធានសមាគមអតីតយុទ្ធជន កម្ពុជាខេត្តកំពង់ធំ បានឡើងធ្វើរបាយការណ៍សង្ខេប និងមានប្រសាសន៍លើកឡើងថា ថ្ងៃនេះខេត្តកំពង់ធំ ពិតជាមានមោទនភាពខ្លាំងណាស់ ដែលជាប្រវត្តិសាស៍ សម្រាប់អតីតយុទ្ធជនកម្ពុជា ដែលមានជីវភាពលំបាកខ្វះខាត គ្មានដី គ្មានផ្ទះ កន្លងមកសុំបងប្អូនសាច់ញាតិស្នាក់នៅ និងពុំមានលទ្ធភាពសាងសង់លំដីដ្ឋានបានសមរម្យ ពេលនេះទទួលបានសិទ្ធិក្នុងការចាប់ឆ្នោតយកដីសម្បទានសង្គមកិច្ច ចំនួន១៤០គ្រួសារ ក្នុងមួយគ្រួសារទទួលបានផ្ទះមួយខ្នង ដែលមានទំហំ ៥ម គុណ ៧ម រួមទាំងដីសម្រាប់បង្ករបង្កើនផល ចំនួនមួយហិចតាកន្លះ ដែលជាអំណោយដ៏ថ្លៃថ្លាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ។
ជាមួយគ្នានោះឯកឧត្តម សុខ លូ ប្រធានកិត្តិយសសមាគមអតីតយុទ្ធជនខេត្តកំពង់ធំ បានរៀបរាប់ពីប្រវត្តដីមុននិងបានមកជាដីសម្បទានសង្គមកិច្ច ព្រមទាំងបានចាត់តាំងក្រុមការងារគណកម្មការ អាជ្ញាធរ ស្រុក ឃុំ និងមន្ត្រីជំនាញពាក់ព័ន្ឋទាំងអស់ ចូលរួមតាមការសិក្សា និងពិនិត្យឃើញថា ដីតំបន់នេះជាប្រភេទដីព្រៃរេចរិល និងពុំមានការកាន់កាប់ពីសំណាក់ប្រជាពលរដ្ឋ ក៏សម្រេចយកទីតាំងនេះដែលមានផ្ទៃដីសរុប ១៩៧៨ហិចតា ដាក់ស្នើរសុំជាដីសម្បទានសង្គមកិច្ច សម្រាប់ការពារទុកចែកជូនអតីតយុទ្ធជនកម្ពុជាក្នុងខេត្តកំពង់ធំដែលមានជាភាពខ្វះខាត។ ហើយរហូតមកដល់ពេលនេះគឺយើងបានសាងសង់ផ្ទះជូនអតីតយុទ្ធជនមានរយៈពេល ៦០ ថ្ងៃ មានផ្ទះចំនួន ៧៣ខ្នងផ្ទះរួចជាស្ថាពរ ក្នុងចំណោម ១៤០ខ្នងផ្ទះ ក្នុងនោះបានបោះបង្គោលដីលំនៅដ្ឋាន និងដីកសិកម្មបានចំនួន ១៤០ឡូ និងបានសាងសង់ផ្លូវសរុប ១២គីឡូម៉ែត្រ។
ទន្ទឹមនឹងនោះឯកឧត្តមទេសរដ្ឋមន្រ្តី គន់ គីម បានថ្លែងអំណរគុណនិងកោតសរសើរដល់ថ្នាក់ដឹកនាំខេត្តកំពង់ធំដែលមានសាមគ្គីភាពឯកភាពផ្ទៃក្នុងបានល្អប្រសើរ ក្នុងការសម្របសម្រួលការងារ រហូតទទួលបានលទ្ធផលដ៏ត្រចះត្រចង់ក្នុងរយៈពេលខ្លី។ ឯកឧត្តមទេសរដ្ឋមន្រ្តី បានមានប្រសាសន៍បន្តថា សម្តេចតេជោ ហ៊ុន សែន បានគិតគូរគ្រប់សព្វបែបយ៉ាងមកលើអតីតយុទ្ធជន និងប្រជាជនជាធំ ដោយផ្តល់វ៉ាក់សាំងការពារជំងឺកូវីដ១៩ ចាក់ជូនអតីតយុទ្ធជន ដើម្បីជៀសផុតពីការឆ្លងជំងឺកូវីដ១៩ ដែលជាអ្នកបូរឈាមស្រស់ សាច់ស្រស់ការពារបូរណភាពទឹកដី ដែលយើងមិនអាចបំភ្លេចនូវគុណបំណាច់នេះបានទេ។