(រដ្ឋបាលខេត្តកំពង់ធំ)÷ នៅព្រឹកថ្ងៃទី២២ ខែឧសភា ឆ្នាំ២០២១ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងគណៈប្រតិភូអមដំណើរដោយ ឯកឧត្តម សុខ លូ អភិបាលខេត្តកំពង់ធំ លោក ការីម៉ាកា អាក្សីស៊ី (ឧបទូតនៃស្ថានទូតជប៉ុន) លោកស្រី Claire Conan នាយិកាប្រចាំប្រទេសអង្គការកម្មវិធីស្បៀងអាហារពិភពលោក ឯកឧត្តមលោកជំទាវ លោក លោកស្រីប្រធានមន្ទីរជុំវិញខេត្ត អភិបាលស្រុក លោកមេឃុំ/មេភូមិ ប្រជាការពារ និងបងប្អូនជាពលរដ្ឋ ស្ថិតនៅវត្តខ្សាច់ដីរស់ ភូមិខ្សាច់ដីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ។
ថ្លែងនៅក្នុងកម្មវិធីនេះផងដែរឯកឧត្តម សុខ លូ អភិបាលខេត្តកំពង់ធំបានមានប្រសាសន៍ថា ចំពោះទីទួលសុវត្ថិភាពក្នុងខេត្តកំពង់ធំមានចំនួន០២ទីតាំងគឺ៖
១.ទីទួលសុវត្ថិភាពស្ថិតនៅភូមិសំបូរ ឃុំសំបូរ ស្រុកប្រាសាទសំបូរ ដែលមានប្រវែង បណ្ដោយ ៥២,២៥ម៉ែត្រ និងទទឹងប្រវែង ៣២,២៥ម៉ែត្រ ផ្ទៃក្រឡា ១៦៨៥,០៦ ម៉ែត្រការ៉េដែលអាច ផ្ទុកមនុស្សបានចាប់ពី ៥០០ ទៅ ៦០០ នាក់ ត្រូវបានបំពាក់ដោយបន្ទប់ទឹក ផ្ទះ បាយ ឃ្លាំង បណ្តាញអគ្គិសនី។
២.ទីទួលសុវត្ថិភាពស្ថិតនៅភូមិខ្សាច់ជីរស់ ឃុំកំពង់គោ ស្រុកកំពង់ស្វាយ ខេត្តកំពង់ធំ ដែលបានសាងសង់រួចគឺមានប្រវែងទទឹង ២៦ម៉ែត្រ និងបណ្តោយ ៣៤ម៉ែត្រ អាចផ្ទុកមនុស្ស បានចំនួន ១៥០នាក់ ទៅ ២៥០នាក់ ដែលត្រូវបានបំពាក់ដោយបន្ទប់ទឹក ផ្ទះបាយ ឃ្លាំង បណ្តាញអគ្គិសនី ទីទួលសុវត្ថិភាពទាំងពីរទីតាំងនេះត្រូវបានសាងសង់រួចជាស្ថាព ដែលមាន ការជួយគាំទ្ររបស់រាជរដ្ឋាភិបាលជប៉ុនទទួលបានតាមរយៈអង្គការស្បៀងអារហារពិភពលោក (WFP)។
ឯកឧត្តមក៏បានបន្តទៀត មណ្ឌលទីទួលសុវត្ថិភាពគឺមានគោលដៅពីរធំៗគឺ៖ ពេលដែលមានទឹកជំនន់ អាចធ្វើការជម្លៀសប្រជាពលរដ្ឋមករស់នៅក្នុងមណ្ឌលទីទួលសុវត្ថិភាព ។ ប្រសិនបើមិនមានទឹកជំនន់កើនឡើង អាចប្រើប្រាស់មជ្ឈមណ្ឌលដើម្បីផ្តល់សវាសង្គម សេវាសុខាភិបាល និងសេវាផ្សេងៗទៅតាមអ្វីដែលអាចប្រើប្រាស់បាន ។
ឆ្លៀតក្នុងឱកាសនោះឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស ជា អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា ដោយមានការបម្រែបម្រួលអាកាសធាតុជាសកល បូករួមនឹងកត្តាភូមិសាស្ត្រ និងកត្តា បន្ទាប់បន្សំ ផ្សេងៗផងនោះ បានជួបប្រទះនូវគ្រោះ មហន្តរាយមួយចំនួន នាពេលកន្លងមក នេះដូចជា៖ ខ្យល់កន្ត្រាក់ រន្ទះបាញ់ អគ្គីភ័យ ដែលធ្វើឲ្យ ប៉ះពាល់ដល់វិស័យកសិកម្ម វិស័យសង្គម និងវិស័យនានា។ ជាក់ស្ដែងរាជរដ្ឋាភិបាលជប៉ុន ដែលបានសហការមូលនិធិគាំទ្រតាមរយៈអង្គការស្បៀងអាហារពិភពលោក របស់អង្គការសហប្រជាជាតិប្រចាំនៅកម្ពុជា រួមទាំងទទួលបានការសហការជាមួយគណៈកម្មាធិការជាតិគ្រប់គ្រងគ្រោះមហន្តរាយ និងគណៈកម្មាធិការខេត្ត ព្រមទាំងអាជ្ញាធរគ្រប់លំដាប់ថ្នាក់ ក្នុងកសាងសង់ទីទួលសុវត្ថិភាព ដើម្បីដាក់ឲ្យប្រជាពលរដ្ឋជម្លៀស នៅពេលមានគ្រោះទឹកជំនន់ ។
ជាចុងក្រោយឯកឧត្តមនាយឧត្តមសេនីយ៍ គន់ គីម ក៏បានអំពាវនាវដល់បងប្អូនប្រជាពលរដ្ឋទាំងអស់ត្រូវជួយថែរក្សាអគារទីទួលសុវត្ថិភាពទាំងពីរនេះឲ្យបានល្អប្រសើរឡើង ព្រមទាំងរក្សានូវ (បីកុំបីការពារ និងពីរចូលរួម) តាមការណែនាំរបស់ក្រសួងសុខាភិបាលដើម្បីចៀសផុតពីជំងឺកូវីដ-១៩ ទាំងអស់គ្នា។