(រដ្ឋបាលខេត្តកំពង់ធំ)៖ នាព្រឹកថ្ងៃទី១៣ ខែកក្កដា ឆ្នាំ២០២១ ឯកឧត្តម ព្រឹម រដ្ឋា អភិបាលរងខេត្តកំពង់ធំ និងជាអនុប្រធានគណៈកម្មការគ្រប់គ្រងអាងស្ទឹងជីនិតតំណាងឯកឧត្តម សុខ លូ អភិបាលនៃគណៈអភិបាល ខេត្តកំពង់ធំ និងជាប្រធានគណៈកម្មការគ្រប់គ្រងអាងស្ទឹងជីនិត អញ្ជើញចូលរួមបើកកិច្ចប្រជុំស្តីពីនិរន្តរភាពនៃការអនុវត្តផែនការសកម្មភាពយុទ្ធសាស្ត្រគ្រប់គ្រងអាងស្ទឹងជីនិត និងការប្រកាសបិទបញ្ចប់គម្រោងភាពជាដៃគូរចីរភាពធនធានទឹកនៅកម្ពុជា ដោយមានការចូលរួមពីលោក មិន ប៊ុណ្ណារ៉ា ប្រធានគម្រោងភាពជាដៃគូនៃចីរភាពធនធានទឹកនៅកម្ពុជា លោកអភិបាលស្រុក លោក លោកស្រីតំណាងមន្ទីរពាក់ពន្ធ័ (តាមរយៈប្រព័ន្ធ video online) ។
លោក មិន ប៊ុណ្ណារ៉ា ប្រធានគម្រោងភាពជាដៃគូរនៃចីរភាពធនធានទឹកនៅកម្ពុជា បានធ្វើរបាយការណ៍សង្ខេប និងរាយការណ៍អំពីគោលបំណងសំខាន់ក្នុងកិច្ចប្រជុំ គឺចង់បង្ហាញពីប្រភពមូលនិធិសំខាន់ៗសម្រាប់គាំទ្រដល់ការអនុវត្តន៍ផែនការសកម្មភាពយុទ្ធសាស្ត្រអាងស្ទឹងជីនិត (មូលនិធិឃុំ ឬ ស្រុក និងខេត្ត) ព្រមទាំងការគាំទ្របច្ចេកទេស និងការទទួលខុសត្រូវពី ស្ថាប័ននានាជុំវិញខេត្ត ជាពិសេសគឺការធ្វើសមាហរណកម្មផែនការសកម្មភាពយុទ្ធសាស្ត្រនេះ ទៅក្នុងផែនការស្ថាប័ន និងផែនការអភិវឌ្ឍ ឃុំ ស្រុក ដែលពាក់ព័ន្ធសន្តិសុខទឹក មានន័យទូលំទូលាយណាស់សម្រាប់ការងារអភិវឌ្ឍន៏លើគ្រប់វិស័យទាំងអស់ ជាពិសេសដើម្បីពង្រឹងសមត្ថភាពដល់អ្នកពាក់ព័ន្ធគ្រប់លំដាប់ថ្នាក់ក្នុងតំបន់ទីជម្រាល ស្ទឹងជីនិត បានយល់ដឹងកាន់តែច្បាស់នូវអ្វីទៅជាសន្តិសុខទឹក ក៏ដូចជាការទ្រទ្រង់ដល់ដំណើរការ នៃការអភិវឌ្ឍគ្រប់គ្រងធនធានទឹកប្រកបដោយនិរន្តភាព។
ឆ្លៀតក្នុងឱកាសនេះឯកឧត្តម ព្រឹម រដ្ឋា បានថ្លែងអំណរគុណចំពោះជំនួយរបស់ទីភ្នាក់ងារសហរដ្ឋអាមេរិក សម្រាប់ការអភិវឌ្ឍអន្តរជាតិ (USAID) តាមរយៈ អង្គការវីនរ៉កអន្តរជាតិ ក្នុងការឧបត្ថម្ភគាំទ្រដល់ គម្រោងភាពជាដៃគូនចីរភាពធន ធានទឹកនៅកម្ពុជា អនុវត្តន៍ក្នុងតំបន់ទីជម្រាលស្ទឹងជីនិត ខេត្តកំពង់ធំ និងសូមកោតសរសើរ ដល់មន្ទីរវិស័យជំនាញជុំវិញខេត្ត ចូលរួមពីដើមដល់ចប់គម្រោង ក៏ដូចជាការខិតខំរបស់អាជ្ញាធរខេត្តដើម្បីបន្តគាំទ្រដល់កិច្ចប្រតិបត្តិ ការរបស់លេខាធិការដ្ឋានគណៈកម្មការគ្រប់គ្រងអាងស្ទឹងជីនិតក្រោយគម្រោងត្រូវបានបញ្ចប់ និង បន្តអនុវត្តន៍ផែនការសកម្មភាយុទ្ធសាស្ត្រ(SAP) តាមរយៈការដាក់បញ្ចូលទៅក្នុងផែនការសា្ថប័ន ផែនការសមាហរណកម្មនៃកម្មវិធីវិនិយោគស្រុក និងឃុំដើម្បីជាផលប្រយោជន៍រួមរបស់ប្រជាពល រដ្ឋក្នុងខេត្តកំពង់ធំរបស់យើងទាំងមូល។
ជាចុងក្រោយឯកឧត្តម ព្រឹម រដ្ឋា បានផ្ដាំផ្ញើដល់មន្ត្រីជំនាញពាក់ព័ន្ធ នៃគណៈកម្មការគ្រប់គ្រងអាងស្ទឹងជីនិតទាំងអស់ សូមមេត្តាយកចិត្តទុកដាក់អោយបានខ្ពស់បំផុត និងចូលរួមកិច្ចពិភាក្សាបញ្ចេញមតិយោបល់អោយបានផុសផុលប្រកបដោយភាពរលូន ផ្លែផ្កា និង មានប្រសិទ្ធភាពខ្ពស់ ពីព្រោះលទ្ធផលនៃកិច្ចពិភាក្សានេះពិតជាមានសារៈសំខាន់ណាស់សម្រាប់ ការងារបន្តបន្ទាប់ទៀតក្នុងការកៀរគរធនធានក៏ដូចជាការចូលរួមពីភាគីដែលពាក់ព័ន្ធអនុវត្តន៍ផែនការសកម្មភាពយុទ្ធសាស្ត្រដើម្បីលើកកម្ពស់ សន្តិសុខទឹកសម្រាប់ប្រជាពលរដ្ឋក្នុងតំបន់ទីជម្រាល ស្ទឹងជីនិតនៃខេត្តកំពង់ធំរបស់យើងអោយបានកាន់តែល្អប្រសើរនាពេលអនាគត។