(រដ្ឋបាលខេត្តកំពង់ធំ) ៖ ឯកឧត្តម សុខ លូ អភិបាលខេត្តកំពង់ធំ បានអំពាវនាវដល់ប្រជាពលរដ្ឋទាំងអស់សូមចូលរួមគោរពនូវវិធានការ ៣ការពារ ៣កុំ របស់រាជរដ្ឋាភិបាលកម្ពុជា និងអនុវត្តតាមការណែនាំរបស់ក្រសួងសុខាភិបាលឲ្យបានខ្ជាប់ខ្ជួន ទោះបីទទួលបាននូវការចាក់វ៉ាក់សាំងកូវីដ១៩ ហើយរួចក៏ដោយ។
ការអំពាវនាវនេះ ក្នុងឱកាសដែលឯកឧត្តម សុខ លូ អភិបាលខេត្តកំពង់ធំ អញ្ជើញចូលរួមបើកយុទ្ធនាការចាក់វ៉ាក់សាំងកូវីដ១៩ ជូនបងប្អូនប្រជាពលរដ្ឋរស់នៅក្នុង ស្រុកសណ្តាន់ ស្រុកប្រាសាទសំបូរ និង ស្រុកប្រាសាទបល្ល័ង្ក នាព្រឹកថ្ងៃទី០៦ ខែសីហា ឆ្នាំ២០២១នេះ ដែលជាស្រុកចុងក្រោយគេបង្អស់ ក្នុងចំណោម ៩ ក្រុងស្រុក នៃខេត្តកំពង់ធំ។
ថ្លែងក្នុងពិធីនោះដែរឯកឧត្តម សុខ លូ មានប្រសាសន៍បន្ថែមទៀតថា វ៉ាក់សាំងទាំងនេះគឺបានមកពីការខិតខំប្រឹងប្រែងរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជាប្រមុខដឹកនាំដ៏ឈ្លាសវៃបំផុត ដែលតែងតែយកចិត្តទុកដាក់ខ្ពស់ ចំពោះសុខមាលភាពរបស់បងប្អូនប្រជាពលរដ្ឋកម្ពុជា ជាពិសេសការទប់ស្កាត់ការរីករាលដាលជំងឺឆ្លងកូវីដ១៩។
ទន្ទឹមនឹងនោះដែរឯកឧត្តម សុខ លូ អភិបាលខេត្ត និងប្រជាពលរដ្ឋទូទាំងខេត្តកំពង់ធំ សូមគោរពថ្លែងអំណរគុណ និងអរគុណចំពោះសម្ដេចតេជោ ដែលបានផ្ដល់វ៉ាក់សាំងមកចាក់ជូនបងប្អូនប្រជាពលរដ្ឋនៅក្នុងខេត្តកំពង់ធំ ក៏ដូចជាប្រជាពលរដ្ឋទូទាំងប្រទេសកម្ពុជា ព្រមទាំងថ្លែងអំណរគុណដល់ក្រុមគ្រូពេទ្យទាំងអស់ និងអាជ្ញាធរគ្រប់លំដាប់ថ្នាក់ដែលបានខិតខំជួយសម្របសម្រួលចាក់វ៉ាក់សាំងជូនបងប្អូនប្រជាពលរដ្ឋ មានរបៀបរៀបរយ រក្សាគម្លាតសុវត្ថិភាពបានល្អ ធ្វើឲ្យដំណើរការនៃការចាក់វ៉ាក់សាំងនេះប្រព្រឹត្តទៅដោយរលួននិងទៅតាមផែនការដែលបានគ្រោងទុក។
