(រដ្ឋបាលខេត្តកំពង់ធំ): ឯកឧត្តម សុខ លូ អភិបាលខេត្តកំពង់ធំ នាព្រឹកថ្ងៃទី ៩ ខែសីហា ឆ្នាំ២០២១ បានដឹកនាំក្រុមការងារចុះត្រួតពិនិត្យស្ថានភាពផ្សារសេរីស្ទោង បន្ទាប់ពីបានបិទខ្ទប់ជាលើកទី២ កាលពីថ្ងៃទី០១ ខែសីហា ដើម្បីរៀបចំសណ្ដាប់ធ្នាប់ អនាម័យ និងរបៀបរៀបរយបានល្អប្រសើរ ចៀសបាននូវហានិភ័យនៃការឆ្លងជំងឺកូវីដ-១៩ មុននឹងបើកឲ្យដំណើរការលក់ដូរឡើងវិញ ចាប់ពីថ្ងៃទី១០ ខែសីហា ឆ្នាំ២០២១ ស្អែកនេះ។
ជាមួយគ្នានោះដែរឯកឧត្តម សុខ លូ អភិបាលខេត្តកំពង់ធំ បានអប់រំណែនាំដល់ក្រុមតំណាងអាជីវករទាំងអស់ ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត ដោយគោរពតាមវិធានការ ៣ការពារ: ត្រូវពាក់ម៉ាស់ឲ្យជាប់, ឧស្សាហ៍លាងដៃជាមួយសាប៊ូ អាល់កុល នៅពេលប៉ះជាមួយសម្ភារផ្សេង, ត្រូវរក្សាវគម្លាតសុវត្ថិភាពបុគ្គល ៣កុំ: កុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នា ដើម្បីជៀសឆ្ងាយពីជំងឺកូនវីដ១៩ ប្រភេទ Delta ដ៏កាចសាហាវមួយនេះ។
ជាមួយនឹងការបើកឲ្យដំណើរការលក់ដូរឡើងវិញនេះ បងប្អូនអាជីវករនៅផ្សារសេរីស្ទោង មានចិត្តសប្បាយរីករាយណាស់ ព្រមទាំងបានសន្យាធានានៅចំពោះមុខក្រុមការងារទាំងអស់ ក្នុងការអនុវត្តវិធានការរបស់រាជរដ្ឋាភិបាល ក៏ដូចជាគោរពតាមការណែនាំរបស់ក្រសួងសុខាភិបាលឲ្យបានខ្ជាប់ខ្ជួន ។
ក្នុងថ្ងៃដដែលនោះ ឯកឧត្តម សុខ លូ បានបន្តដំណើរចុះត្រួតពិនិត្យនៅតាមមណ្ឌលចាក់វ៉ាក់សាំងកូវីដ១៩ នៅក្នុងស្រុកស្ទោង និងក្រុងស្ទឹងសែន បន្ថែមទៀត ព្រមទាំងអំពាវនាវដល់បងប្អូនប្រជាពលរដ្ឋទាំងអស់ ចេះការពារខ្លួនឯង ស្មើនឹងការពារក្រុមគ្រួសាររបស់យើង កុំអោយឆ្លងជំងឺកូវីដ១៩។ ឯកឧត្តមបន្ថែមទៀតថា ប្រសិនបើបងប្អូនបានចាក់វ៉ាក់សាំងចំនួន ២ដងរួចហើយ សូមបងប្អូនកុំបារម្ភ ទោះបីឆ្លងក៏មិនឈឺធ្ងន់នោះដែរ។ ម្យ៉ាងវិញទៀតសូមបងប្អូនប្រជាពលរដ្ឋទាំងអស់ ត្រូវប្រុងប្រយ័ត្នក្មេងៗតែនៅផ្ទះ និងចាស់ៗដែលមិនទាន់បានចាក់វ៉ាក់សាំង ព្រោះអាចឆ្លងនូវជំងឺកូវីដ១៩បាន។