(រដ្ឋបាលខេត្តកំពង់ធំ): ថ្លែងនៅក្នុងពិធីចែកអំណោយជូនប្រជាពលរដ្ឋចំនួន ១៣០គ្រួសារ ដែលមានជីវភាពខ្វះខាតនិងគ្រួសារងគ្រោះមួយចំនួននៅក្នុងកំឡុងពេលកូវីដ ១៩ នាពេលកន្លងទៅថ្មីៗនេះ នៅសៀលថ្ងៃទី៩ ខែធ្នូ ឆ្នាំ២០២១នេះ ឯកឧត្តម ងួន រតនៈ អភិបាលខេត្តកំពង់ធំ បានក្រើនរំលឹកដល់ប្រជាពលរដ្ឋដែលបានចាក់វ៉ាក់សាំងការពារជំងឺកូវីដ១៩រួច មិនត្រូវភ្លេចអនុវត្តវិធានការ បីកុំ និងបីការពារ ទោះបីបានទទួលវ៉ាក់សាំងរួចហើយក៍ដោយ។
ទន្ទឹមនឹងនោះដែរ ឯកឧត្តម ងួន រតនៈ អភិបាលខេត្តកំពង់ធំ រួមទាំងប្រជាពលរដ្ឋទូទាំងខេត្តកំពង់ធំ សូមគោរពថ្លែងអំណរគុណ និងអរគុណចំពោះ សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានផ្តល់ វ៉ាក់សាំងការពារជំងឺកូវីដ១៩ ដល់ប្រជាពលរដ្ឋគ្រប់រូប ទាំងជនជាតិខ្មែរនិងបរទេស ដែលកំពុងរស់នៅក្នុងប្រទេសកម្ពុជា ដោយឥតគិតថ្លៃ បានយ៉ាងរហ័ស មិនថាចំពោះប្រជាពលរដ្ឋទូរទៅដែលគ្រប់អាយុ ដែលបានកំណត់នោះទេ ថែមទាំងប្អូនៗកុមារតូចៗត្រូវបានផ្ដល់ ឱកាសទទួលបាននូវការចាក់វ៉ាក់សាំងកូវីដ១៩ ជាហូរហែរបន្តបន្ទាប់ទៀត។ ទាំងនេះពិតជាបានស្តែងអោយឃើញពី ការគិតគូរ ការយកចិត្ត ទុកដាក់ នឹងការទទួលខុសត្រូវខ្ពស់របស់ ប្រមុខនៃរាជរដ្ឋាភិបាល កម្ពុជា ជូនចំពោះប្រជាជាតិទាំងមូល។