(រដ្ឋបាលខេត្តកំពង់ធំ)៖ កម្មសិក្សាការីសាលាភូមិន្ទរដ្ឋបាលវគ្គវិក្រឹត្យការចំនួន ១៧រូប ដែលជាមន្រ្តីរាជការក្នុងខេត្តកំពង់ធំ ទើបបញ្ចប់វគ្គសិក្សា ត្រូវបានឯកឧត្តម ងួន រតនៈ អភិបាលខេត្តកំពង់ធំ អនុញ្ញាតឲ្យចូលជួបសម្តែងការគួរសម ដើម្បីចែករំលែកចំណេះដឹង និងបទពិសោធន៍ការងារមួយចំនួនទៀត ក្នុងការដឹកនាំ គ្រប់គ្រង ចាត់ចែងការងារទូទៅប្រចាំថ្ងៃ មុនទៅបម្រើការនៅតាមអង្គភាពដើមវិញ នារសៀលថ្ងៃទី២២ ខែធ្នូ ឆ្នាំ២០២១។
ឆ្លៀតក្នុងឱកាសនោះដែរ ឯកឧត្តម ងួន រតនៈ មានប្រសាសន៍លើកឡើងថា សិស្សកម្មសិក្សាការីសាលាភូមិន្ទរដ្ឋបាលវគ្គវិក្រឹត្យការទាំងអស់នេះ គឺជាធនធានមនុស្សដ៏ល្អបន្ថែមទៀត ពោពេញទៅដោយសមត្ថភាព សម្រាប់ធ្វើជាថ្នាក់ដឹកនាំ នៅតាមមន្ទីរអង្គភាពទៅថ្ងៃអនាគត និងធ្វើជាគម្រូល្អដល់មន្ត្រីរាជការជំនាន់ក្រោយ ដោយយកបទពិសោធន៍ផ្សារភ្ជាប់ជាមួយមេរៀន ខិតខំប្រឹងធ្វើការងារឲ្យអង្គភាពមានការរីកចម្រើនបន្តទៀត។
ទន្ទឹមនឹងនោះ ឯកឧត្តម ងួន រតនៈ ក៏បានផ្តល់អនុសាសន៍ណែនាំ ដល់កម្មសិក្សាការីទាំងអស់ដែលបានបញ្ចប់ការសិក្សានេះ សូមយកចំណេះដឹងដែលបានសិក្សាកន្លងមក ធ្វើការអនុវត្តន៍ក្នុងសកម្មភាពការងារនៅតាមអង្គភាពសាម៉ីឱ្យមានប្រសិទ្ធភាពខ្ពស់ ដើម្បីរួមចំណែកក្នុងការអភិវឌ្ឍន៍ខេត្តមានដំណើរការរលូនបន្ថែមទៀត។