(រដ្ឋបាលខេត្តកំពង់ធំ): ឯកឧត្តម ងួន រតនៈ អភិបាលខេត្តកំពង់ធំ អញ្ជើញជួបសំណេះសំណាលជាមួយប្រជាពលរដ្ឋ និងប្រកាសសុពលភាពវិញ្ញាបនបត្រសម្គាល់ម្ចាស់អចលនវត្ថុ លើដីដែលបានកាត់ឆ្វៀលពីតំបន់ ២ មកតំបន់ ១ មានផ្ទៃដីសរុបចំនួន ១៤.៣៥១ហិកតា ស្មើនឹង ២.៦៤២គ្រួសារ នៅក្នុងសង្កាត់អូរកន្ធរ និងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ នាព្រឹកថ្ងៃទី ២៤ ខែឧសភា ឆ្នាំ២០២២។
បន្ទាប់ពីបានស្ដាប់នូវរបាយការណ៍របស់លោក ម៉ាក់ ប៊ុនហុង អភិបាលក្រុងស្ទឹងសែន និងលោក អ៉ឹម សុឌីណា ប្រធានមន្ទីររៀបចំដែនដីនគររូបនីយកម្មសំណង់ និងសុរិយោដីខេត្ត ដែលបានបញ្ជាក់ច្បាស់ អំពីការចុះបញ្ជីកន្លងទៅ រួចមក ឯកឧត្តម ងួន រតនៈ អភិបាលខេត្តកំពង់ធំ មានប្រសាសន៍បន្តថា ការចុះបញ្ជីលក្ខណៈជាប្រព័ន្ធនេះ គឺការចុះបញ្ជីដីធ្លី ទាំងដីឯកជន និងដីរដ្ឋ ដែលអនុវត្តទៅតាមនីតិវិធី ដោយមិនចំណាយប្រាក់ច្រើនក្នុងការធ្វើប្លង់រឹង ដើម្បីធានានូវសិទ្ធិធ្វើជាម្ចាស់កាន់កាប់អចលនវត្ថុ ជាឯកសារសំអាង រឹងមាំ ដោយមិននណាម្នាក់មកបំពានយកដី ព្រំប្រទល់ដីបាននោះទេ។
ឯកឧត្តមបានបន្ថែមទៀតថា សមិទ្ធផលទាំងនេះ គឺជាអំណោយរបស់សម្ដេចតេជោឆ្នាំ២០២២ នេះសម្រាប់ចែកជូនបងប្អូនប្រជាពលរដ្ឋដែលបានអាស្រ័យផលនៅលើដីតំបន់ ២ ឱ្យមានសិទ្ធិបន្ថែម លើការគ្រប់គ្រង ការចាត់ចែង អាចផ្តល់ជាអំណោយឱ្យទៅកូន ឬ ដាក់បញ្ចាំ និងលក់ដីបន្តបាន។ ហើយនេះ គឺជាស្នាដៃមួយក្នុងចំណោមស្នាដៃជាច្រើនផ្សេងទៀតសម្តេចបានគិតគូរពីសុខមាលភាព អាយុជីវិត នឹងបញ្ហាជីវភាពរបស់បងប្អូនប្រជាពលរដ្ឋ ។
ជាមួយគ្នានោះដែរ ប្រជាពលរដ្ឋនៅសង្កាត់អូរកន្ធរ និងសង្កាត់ស្រយ៉ូវ បានថ្លែងអំណរគុណដល់សម្ដេចតេជោ ហ៊ុន សែន ដែលបានមើលឃើញពីទុក្ខលំបាករបស់ពួកគាត់ បានអបអរសារទរ សប្បាយចិត្តរីករាយ ដែលសម្តេចតេជោ ហ៊ុន សែន បានយកចិត្តទុក្ខដាក់ពីផលលំបាករបស់ពួកគាត់ ដែលមានដីកំពុងអាស្រ័យផលនៅក្នុងតំបន់២ ដោយផ្តល់សិទ្ធិពេញលេញ អាស្រ័យផលស្របច្បាប់ ដោយឆ្វៀលចេញពីដីតំបន់២ មកតំបន់១វិញ។ សូមគោរពជូនពរសម្តេចតេជោ មានសុខភាពល្អ បន្តដឹកនាំប្រទេសជាតិ មានការរីកចម្រើន សម្បូរសប្បាយ ក្រោមម្លប់សន្តិភាពបន្តទៀត។
