(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ ដឹកនាំក្រុមការងារ និងមន្ត្រីជំនាញពាក់ព័ន្ធ ចុះពិនិត្យចុះពិនិត្យទិដ្ឋភាពជាក់ស្តែងបន្ថែមទៀត ដីតំបន់២ និងតំបន់៣ នៃបឹងទន្លេសាប ដែលប្រជាពលរដ្ឋដែលបានរស់នៅ និងកំពុងអាស្រ័យផលរយៈពេលជាយូរឆ្នាំ ស្ថិតនៅក្នុងឃុំព្នៅ និងឃុំកកោះ ស្រុកសន្ទុក ខេត្តកំពង់ធំ នាព្រឹកថ្ងៃទី២៧ ខែកក្កដា ឆ្នាំ២០២២។
ឆ្លៀតក្នុងឱកាសនោះដែរ ឯកឧត្តម ងួន រតនៈ មានប្រសាសន៍ថា ការចុះមកពិនិត្យស្ថានភាពភូមិសាស្ត្រដីតំបន់៣ និងតំបន់២ នេះ ដើម្បីពិនិត្យមើលទិដ្ឋភាពជាក់ស្តែង ស្តាប់នូវប្រវត្តិសាវតាពីអាជ្ញាធរមូលដ្ឋាន និងពីបងប្អូនប្រជាពលរដ្ឋ ដែលបានចូលមកកាន់កាប់ និងអាស្រ័យផលកន្លងមក ដើម្បីក្រុមការងារប្រមូលទិន្នន័យ និងស្រង់យកព័ត៌មានពីអាជ្ញាធរមូលដ្ឋាន បងប្អូនប្រជាពលរដ្ឋដែលបានរស់នៅនិងកំពុងអាស្រ័យផលនៅក្នុងតំបន់នេះ ដូច្នេះសូមបងប្អូនសូមមេត្តារង់ចាំ ដើម្បីធ្វើរបាយការណ៍ជូនសម្តេចតេជោ ស្នើសុំកាត់ឆ្វៀលជូនចំពោះប្រជាពលរដ្ឋ ដែលបានរស់នៅអាស្រ័យផលយូរឆ្នាំជាក់ស្ដែង។ ដូច្នេះ ការកែសម្រួលនេះ ប្រជាពលរដ្ឋ នឹងអាចទទួលបានដីកម្មសិទ្ធ ឬអាស្រ័យផលដោយស្របច្បាប់ ទៅតាមការចុះសិក្សារបស់អាជ្ញាធរជំនាញ។
ឯកឧត្តម អភិបាលខេត្តកំពង់ធំបន្ថែមទៀតថា ការចុះពិនិត្យបន្ថែមនេះ គឺអនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន កាលពីថ្ងៃទី២៨ ខែវិច្ឆិកា ឆ្នាំ២០២១ បានដាក់ចេញនូវបទបញ្ជា ឲ្យអភិបាលខេត្តជាប់បឹងទន្លេសាប ត្រូវធ្វើការទប់ស្កាត់ និង បង្រ្កាបជាបន្ទាន់ចំពោះជនខិលខូចមួយចំនួន ដែលលួចកាប់ព្រៃលិចទឹក និងវាទទីយកដីនៅតាមបឹងទន្លេសាប គឺមិនអនុញ្ញាតឲ្យធ្វើការអាស្រ័យផលនោះទេ ទន្ទឹមនឹងនោះ ឯកឧត្តម អភិបាលខេត្តកំពង់ធំ បានថ្លែងអំណរគុណដល់បងប្អូនប្រជាពលរដ្ឋគ្រប់រូប ដែលបានចូលរួមអនុវត្តនូវបទបញ្ជារបស់សម្ដេចតេ ដោយការស្ម័គ្រចិត្តក្នុងការប្រគល់ដីជូនរាជរដ្ឋាភិបាលវិញ ក្នុងគោលបំណងរួមគ្នាអភិរក្ស និងអភិវឌ្ឍតំបន់ជុំវិញបឹងទន្លេសាបឲ្យមានភាពល្អប្រសើរឡើងវិញ។
ឯកឧត្តម ងួន រតនៈ បន្តទៀតថា បន្ទាប់ពីទទួលបានសំណូមពរពីបងប្អូនប្រជាពលរដ្ឋ កាលពីថ្ងៃទី ២៧ ខែឧសភា ឆ្នាំ២០២២ សម្តេចតេជោ ហ៊ុន សែន បានដាក់ចេញនូវបទបញ្ជាថ្មីមួយទៀតឲ្យអាជ្ញាធរពាក់ព័ន្ធ ចុះសិក្សាដីរបស់ប្រជាពលរដ្ឋ ដែលស្ថិតនៅក្នុងតំបន់២ និងតំបន់៣ នៃបឹងទន្លេសាប ត្រូវធ្វើការកាត់ឆ្វៀលជូនចំពោះប្រជាពលរដ្ឋ ដែលបានរស់នៅអាស្រ័យផលយូរឆ្នាំជាក់ស្ដែង។
ប្រជាពលរដ្ឋបាន ថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាល ដែលបានគិតគូរ អំពីសុខទុក្ខ ក៏ដូចជាផលប្រយោជន៍របស់ពួកគាត់ ដែលបានកាន់កាប់ និងអាស្រ័យផលយូរឆ្នាំមកហើយ។