(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ ដឹកនាំកិច្ចប្រជុំពង្រឹងរបៀបរបបការងារ ឱ្យមានផែនការច្បាស់លាស់ និងស្តាប់នូវរបាយការណ៍វឌ្ឍនៈភាពទាក់ទងនឹងការដោះស្រាយបញ្ហាទំនាស់ដីធ្លី នៅតាមបណ្តាក្រុងស្រុកទាំង ៩ ដែលបានកើតមានឡើងនៅក្នុងដែលសមត្ថកិច្ចរបស់ខ្លួន នាព្រឹកថ្ងៃទី២៩ ខែកក្កដា ឆ្នាំ២០២២។
បន្ទាប់ពីបានស្តាប់របាយការណ៍វឌ្ឍនៈរបស់អភិបាលក្រុងស្រុករួចមក ឯកឧត្តម ងួន រតនៈ បានជំរុញដល់លោកអភិបាលក្រុងស្រុកទាំងអស់ ជាប្រធានគណៈកម្មការសុរិយោដីក្រុងស្រុក ត្រូវតែបណ្តុះបណ្តាលវគ្គជំនាញដោះស្រាយទំនាស់ដីធ្លីក្រៅប្រព័ន្ធតុលាការបន្ថែមទៀត បន្តសហការជាមួយយន្តការថ្នាក់ខេត្ត ខិតខំដោះស្រាយបញ្ហាទំនាស់ដីធ្លីដែលនៅសេសសល់ ជាបញ្ហាអទិភាព ក្នុងចំណោមបញ្ហាអទិភាព ធ្វើការងារជាប្រចាំ ត្រូវមានវិធានការក្នុងការដោះស្រាយឲ្យបានច្បាស់លាស់។ ឯកឧត្តម បន្តទៀតថា សំណុំរឿងខ្លះ រដ្ឋបាលខេត្តកំពង់ធំ ទទួលបានពាក្យបណ្តឹងពីប្រជាពលរដ្ឋ សំណុំរឿងខ្លះទៀតទទួលបានលិខិតពីក្រសួងមហាផ្ទៃ ដែលប្រជាពលរដ្ឋផ្ញើសារចូលក្នុងផេកសម្ដេចក្រឡាហោម ។ ឯកឧត្តម បន្ថែមទៀតថា ករណីសំណុំរឿងទាំងអស់នេះ រដ្ឋបាលខេត្តកំពង់ធំ បានចាត់ចែងបន្តបញ្ជូនដីកាទៅតាមមន្ទីរជំនាញ រដ្ឋបាលក្រុងស្រុក ឲ្យធ្វើការដោះស្រាយ និងមានកំណត់ហេតុបំភ្លឺច្បាស់លាស់។ ឯកឧត្តម អភិបាលខេត្តកំពង់ធំ បញ្ជាក់បន្ថែមទៀតថា ក្នុងករណីរសំណុំរឿងក្តីណាមួយមានបញ្ហាប្រឈម សូមរាយការណ៍មករដ្ឋបាលខេត្ត ដើម្បីស្នើសុំគោលការណ៍ណែនាំពីថ្នាក់ដឹកនាំខេត្តបន្តទៀត ទៅតាមគោលបំណងនៃពាក្យបណ្ដឹង ឬក៏ប្រភេទនៃពាក្យបណ្ដឹង។