(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត បានជំរុញប្រធានគណៈបញ្ជាការឯកភាពរដ្ឋបាលក្រុងស្រុក រួមគ្នាអនុវត្តនូវគោលនយោបាយ “ភូមិ ឃុំ មានសុវត្ថិភាព” ឲ្យមានប្រសិទ្ធភាព ជាពិសេសត្រូវពង្រឹងសន្តិសុខសណ្តាប់ធ្នាប់សាធារណៈ ការបង្ក្រាបល្បែងស៊ីសងនៅតាមមូលដ្ឋាន បញ្ហាគ្រឿងញៀន ការបង្រ្កាប ទប់ទស្កាត់បទល្មើសផ្សេងៗ ព្រមទាំងការដោះស្រាយនូវបញ្ហា សំណូមពរ ក៏ដូចជាទុក្ខកង្វល់របស់ប្រជាពលរឲ្យបានឆាប់រហ័ស។
ការថ្លែងយ៉ាងដូច្នេះ ឯកឧត្តម អភិបាលខេត្តកំពង់ធំ លើកឡើងនៅក្នុងពិធី អញ្ជើញជាអធិបតីក្នុងកិច្ចប្រជុំប្រចាំខែកញ្ញា គណៈបញ្ជាការឯកភាពរដ្ឋបាលខេត្តកំពង់ធំ នាព្រឹកថ្ងៃទី៩ ខែកញ្ញា ឆ្នាំ២០២២ នៅសាលាប្រជុំសាលាខេត្ត។
ឯកឧត្តម អភិបាលខេត្តកំពង់ធំ បន្ថែមទៀតថា នៅពេលខាងមុខនេះ ដល់ពិធីបុណ្យកាន់បិណ្ឌ និងភ្ជុំបិណ្ឌ នឹងត្រូវឈានមកដល់ ដូច្នេះ សូមអាជ្ញាធរ និងកងកម្លាំងគ្រប់ជាន់ថ្នាក់ ត្រូវពង្រឹងសន្តិសុខនៅគ្រប់ទីវត្តអារ៉ាម ក៏ដូចជានៅតាមតំបន់រមណីយដ្ឋាននានានៅក្នុងខេត្ត ឲ្យបានល្អប្រសើរ ក្នុងគោលបំណងដើម្បីការពារសន្តិសុខសណ្តាប់ធ្នាប់សាធារណៈ និងសម្រួលចរាចរណ៍ក្នុងការធ្វើដំណើរកំសាន្តរបស់បងប្អូនប្រជាពលរដ្ឋ ចៀសវាងមានការកកស្ទះ ជាដើម។
