(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ និងក្រុមការងារ អញ្ជើញចុះពិនិត្យទីតាំង និងស្ពានបេតុងឆ្លងស្ទឹងសែន ជាអំណោយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដើម្បីត្រៀមសម្ពោធដាក់ឲ្យប្រើប្រាស់នាពេលខាងមុខនេះ ស្ថិតនៅភូមិកាលមេឃ ឃុំត្បូងក្រពើ ស្រុកសន្ទុក ខេត្តកំពង់ធំ នារសៀលថ្ងៃទី១៨ ខែមករា ឆ្នាំ២០២៣។
នៅក្នុងឱកាសនេះឯកឧត្តម ងួន រតនៈ បន្ថែមទៀតថា សម័យតេជោសន្តិភាព ប្រទេសជាតិមានការរីកចម្រើន បង្កើតបាននូវសមិទ្ធផលជាច្រើននៅទូទាំងប្រទេស រួមទាំងខេត្តកំពង់ធំផងដែរ។ ហើយនៅក្នុងរយៈពេលបីឆ្នាំចុងក្រោយនេះ ខេត្តកំពង់ធំ ទទួលបានស្ពានបេតុងឆ្លងស្ទឹងសែនចំនួន ២ សម្រាប់សម្រួលការធ្វើដំណើររបស់បងប្អូនប្រជាពលរដ្ឋមានភាពងាយស្រួល និងមានសុវត្ថិភាព ក្នុងការដឹកជញ្ជូនផលិតផលផ្សេងៗនៅក្នុងមូលដ្ឋាន។
