(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ និងក្រុមការងារ បើកវេទិការសាធារណៈផ្សព្វផ្សាយអំពីបញ្ហាដីធ្លីជូនប្រជាពលរដ្ឋ ដើម្បីដោះស្រាយបញ្ហាប្រឈម ស្ថិតនៅឃុំបឹងល្វា ស្រុកសន្ទុក ខេត្តកំពង់ធំ នាព្រឹកថ្ងៃទី៩ ខែកុម្ភៈ ឆ្នាំ២០២៣។
ក្រោយពីបានស្ដាប់ក្តីកង្វល់ដែលបានលើកឡើងរបស់បងប្អូនប្រជាពលរដ្ឋធ្លាប់អាស្រ័យផល ដីនៅក្នុងគម្របព្រៃឆ្នាំ ២០០២ ក្នុងនោះមានដីគម្របព្រៃឡង់ ដីគម្របព្រៃអង់តែន និងដីស្ថានីយ៍ស្តារឡើងវិញ រួចមក ឯកឧត្តម ងួន រតនៈ ថ្លែងថា វេទិការនេះ ពិតជាមានសារៈសំខាន់សម្រាប់បងប្អូនប្រជាពលរដ្ឋ មានឱកាសលើកឡើងនូវទុកកង្វល់ បញ្ហាប្រឈម ក៏ដូចជាសំណូមពរនានា ជូនថ្នាក់ដឹកនាំ ដើម្បីស្វែងរកដំណោះស្រាយឲ្យបានល្អប្រសើរ ។
ឯកឧត្តមបន្តទៀតថា កន្លងមកក្តីកង្វល់ប្រជាពលរដ្ឋដែលបានកាន់កាប់អាស្រ័យផលលើដីរដ្ឋ ចំណងផ្លូវច្បាប់ និងមានការហាមឃាត់ពីមន្ត្រីជំនាញ ក្នុងនោះ អភិបាលខេត្តកំពង់ធំ បានផ្តល់នូវគោលការណ៍មួយចំនួនដល់មន្ត្រីជំនាញ មិនត្រូវចុះទៅរុះរើផ្ទះ បំផ្លាញដំណាំ បងប្អូនទៀតទេ ត្រូវបន្តចុះពិនិត្យស្រាវជ្រាវប្រវត្តិដីបន្ថែមទៀត ដើម្បីពិនិត្យលទ្ធភាពដីដែលត្រូវកាត់ឆ្វៀលជូនប្រជាពលរដ្ឋ និងដីរដ្ឋត្រូវរក្សាទុកនាពេលអនាគត ហើយបងប្អូនប្រជាពលរដ្ឋ ត្រូវមានភាពស្មោះត្រង់ និងហាមដាច់ខាត មិនមានការកាប់រុករានដីព្រៃបន្ថែមទៀតនោះទេ។ លើសពីនេះទៀត អាជ្ញាធរដែននី ត្រូវសហការជាមួយប្រជពលរដ្ឋ ផ្សព្វផ្សាយគោលនយោបាយដីធ្លីឲ្យបានទូលំទូលាយ និងមានភាពច្បាស់លាស់ ។
ឯកឧត្តម អភិបាលខេត្តកំពង់ធំ បានអំពាវនាវដល់បងប្អូនប្រជាពលរដ្ឋទាំងអស់សូមកុំឲ្យមានការចាញ់បោកចំពោះបុគ្គលមួយចំនួនដែលតែងយកលេសថារត់ការ ដើម្បីបានចេញប្លង់កម្មសិទ្ធិឲ្យសោះ។ ហើយនេះជាការគិតគូររបស់សម្ដេចដែលមិនយកទោសពៃកន្លងទៅ ឱ្យតែបងប្អូនអត់ដីពិតប្រាកដ ដូចវត្តមានរបស់សម្តេចជាក់ស្ដែង ឆ្នាំ២០១២ ជាការកង្វល់របស់សម្ដេច ហើយនៅតែបន្តដោះស្រាយ ប៉ុន្តែត្រូវបញ្ចប់នៅវគ្គនេះហើយ មិនអាចគោលនយោបាយអីទៅកាប់ថែម ហើយសុំគោលនយោបាយទៀតទេ បើយើងអត់ដីរដ្ឋមានគោលការណ៍មួយទៀត គឺសុំដីសម្បទាន សម្តេចអត់ចង់ឱ្យយើងទៅសម្រេចចិត្តកាប់ខ្លួនឯងទេ អ្នកណាមានលទ្ធភាពបានច្រើន អ្នកណាអត់លទ្ធភាពបានតិច វាអត់ស្មើគ្នា បើយើងបានដីសម្បទាន គឺយើងគ្រួសារធំ គ្រួសារតូច ស្ត្រីមេម៉ាយដែលត្រូវបានតាមអាទិភាពនៃការខ្វះខាតដី ។
