(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ ជួបសំណេះសំណាល និងជូនដំណើរយោធិននៃកងរាជអាវុធហត្ថ ទើបជ្រើសរើសថ្មី(ជាប់ជាស្ថាពរ) ចំនួន ៥០នាក់ ទៅហ្វឹកហ្វឺននៅមជ្ឈមណ្ឌលហ្វឹកហ្វឺនកងរាជអាវុធហត្ថ(ភ្នំជុំសែនរីករាយ) ខេត្តកំពង់ឆ្នាំង ដោយមានការអញ្ជើញចូលរួមពីលោកឧត្ដមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ ឯកឧត្តម លោកជំទាវ ប្រធានអនុប្រធានមន្ទីរជុំវិញខេត្ត និងនាយទាហាន នាយទាហានរង កងរាជអាវុធហត្ថខេត្តកំពង់ធំ ព្រមទាំងក្រុមគ្រួសារយុវជនស្ម័គ្រចិត្ត នាព្រឹកថ្ងៃទី២១ ខែមេសាឆ្នាំ២០២៣។
លោកឧត្ដមសេនីយ៍ត្រី មាស យ៉ត មេបញ្ជាការកងរាជអាវុធហត្ថខេត្តកំពង់ធំ បានឡើងរាយការណ៍អំពីសកម្មភាពមួយចំនួន អំពីបេក្ខជនគ្រប់លក្ខណសម្បត្តិ(ជាប់ជាស្ថាពរ)ទាំង៥០នាក់ ត្រូវបានក្រសួងការពារជាតិ ចេញប្រកាសបញ្ចូលក្របខ័ណ្ឌកងយោធពលខេមរភូមិន្ទ បំពេញឱ្យក្របខ័ណ្ឌកងរាជអាវុធហត្ថ ក្លាយជាយោធិននយកងរាជអាវុធហត្ថជាផ្លូវការ និងបានប្រមូលផ្តុំ រៀបចំពិធីសំណេះសំណាល និងជូនដំណើរទៅហ្វឹកហ្វឺននៅមជ្ឈមណ្ឌលហ្វីលហ្វឺនកងរាជអាវុធហត្ថ(ភ្នំជុំសែនរីករាយ) ខេត្តកំពង់ឆ្នាំង នាពេលនេះ។ ចំពោះបេក្ខជនគ្រប់លក្ខណសម្បត្តិ (ជាប់ត្រៀមបម្រុង) គឺសម្រាប់ត្រៀមស្នើបញ្ចូលក្របខ័ណ្ឌកងយោធពលខេមរភូមិន្ទ បំពេញអោយក្របខ័ណ្ឌកងរាជអាវុធហត្ថ ពេលមានតម្រូវការចាំបាច់(ប្រសិនបើមាន) ។
ក្នុងពិធីនេះដែរ ឯកឧត្តម ងួន រតនៈ មានប្រសាសន៍ថា ក្នុងនាមជាថ្នាក់ដឹកនាំខេត្តសូមអបអសាទរ ចំពោះយុវជនស្ម័គ្រចិត្តចូលបម្រើកងយោធពលខេមរភូមិន្ទ ក្នុងក្របខ័ណ្ឌកងរាជអាវុធហត្ថ ដែលមានគ្រប់ លក្ខណសម្បត្តិ( ជាប់ជាស្ថាពរ)ក្នុងការប្រឡង ហើយត្រូវបានស្នើសុំបញ្ចូលក្របខ័ណ្ឌកងយោធពលខេមរភូមិន្ទ ក្លាយជាយោធិននៃកងរាជអាវុធហត្ថទាំងអស់ ដែលត្រូវបានជូនដំណើរ និងត្រូវចូលហ្វឹកហ្វឺននៅ មជ្ឈមណ្ឌលហ្វឹកហ្វឺនកងរាជអាវុធហត្ថ(ភ្នំជុំសែនរីករាយ) ដើម្បីបន្តទៅហ្វឹកហាត់រៀនសូត្រជំនាញផ្សេងៗ ហើយក៏ជាឱកាសសម្រាប់ជួបជុំមិត្ដថ្មីបានធ្វើការរស់នៅប្រមូលផ្ដុំ ត្រូវចេះអត់ឱន យោគយល់ ចេះដាស់តឿនគ្នាអំពីវិន័យ ក្នុងនាមមិត្តរួមជំនាន់។
ជាចុងក្រោយឯកឧត្តម ងួន រតនៈ សូមផ្តាំផ្ញើដល់យោធិននៃកងរាជអាវុធហត្ថនាទាំងអស់ខិតខំរៀនសូត្រ និងបំពេញតួនាទី/ភារកិច្ច និងបេសកកម្មកងរាជអាវុធហត្ត ឱ្យទទួលបានជោគជ័យ នឹងត្រូវគោរពច្បាប់លក្ខន្តិកៈនៃកងយោធពលខេមរភូមិន្ទ បទវិន័យទូទៅសម្រាប់កងយោធពលខេមរភូមិន្ទ បទបញ្ជា និងការចាត់តាំង របស់ឯកឧត្តម នាយឧត្តមសេនីយ៍ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេសពេលបញ្ចប់វគ្គ និងសូមថ្លែងអំណរគុណនិងកោតសរសើរចំពោះទឹកចិត្តរបស់ក្រុមគ្រួសារ ឬអាណាព្យាបាលយុវជនស្ម័គ្រចិត្តទាំងអស់ ដែលបាន អនុញ្ញាតិឱ្យកូនចៅ ចូលបម្រើកងយោធពលខេមរភូមិន្ទ បំពេញឲ្យក្របខ័ណ្ឌកងរាជអាវុធហត្ថ ដើម្បីបម្រើ ប្រទេសជាតិមាតុភូមិនៃយើង ។