(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ បានជំរុញឲ្យអាជ្ញាធរពាក់ព័ន្ធទាំងអស់បន្តដោះស្រាយវិវាទទំនាស់ដីធ្លីដល់បងប្អូនប្រជាពលរដ្ឋឲ្យបានទាន់ពេលវេលា ជៀសវាងការពន្យារពេលដោះស្រាយដែលធ្វើឲ្យពួកគាត់នាំគ្នាមកតវ៉ាដល់សាលាខេត្តកំពង់ធំ ។
ឯកឧត្តម ងួន រតនៈ បានថ្លែងដូចនេះនៅក្នុងកិច្ចប្រជុំគណៈបញ្ជាការឯកភាពខេត្ត នារសៀលថ្ងៃទី ០៥ ខែ មិថុនា ឆ្នាំ ២០២៣។
ជាមួយគ្នានោះដែរ ឯកឧត្តមអភិបាលខេត្តកំពង់ធំ បានជំរុញឲ្យជំនាញខាងសុរិយោដី ត្រូវធ្វើយ៉ាងណាសម្របសម្រួល និងចែកប្លង់កម្មសិទ្ធិជូនបងប្អូនប្រជាពលរដ្ឋឲ្យបានទាន់ពេលវេលា និងសម្របសម្រួលចំពោះដីដែលមិនទាន់បានទទួលប្លង់កម្មសិទ្ធិ ដោយពន្យល់ពីមូលហេតុ និងភាពលំបាករបស់ក្រុមការងារថ្នាក់ខេត្ត ក៏ដូចជាក្រុមការងារថ្នាក់ក្រសួង ក្នុងការចេញប្លង់កម្មសិទ្ធិ។
លើសពីនេះទៅទៀតក្នុងនាមរដ្ឋបាលខេត្តកំពង់ធំឯកឧត្តម ងួន រតនៈ បានជំរុញដល់អាជ្ញាធរពាក់ព័ន្ធក្រុងស្រុកទាំងអស់ត្រូវធ្វើយ៉ាងណាការពារសន្តិសុខជូនដល់បងប្អូនប្រជាពលរដ្ឋនៅពេលបោះឆ្នោតដែលនឹងប្រព្រឹត្តទៅនៅថ្ងៃទី ២៣ ខែកក្កដាឆ្នាំ ២០២៣ ខាងមុខនេះ ដូច្នេះគ្រប់ភាគីពាក់ព័ន្ធទាំងអស់ត្រូវធានាថាការបោះឆ្នោតគ្រប់ការិយាល័យទាំងអស់ត្រូវប្រកបទៅដោយភាពរលូននិងសុខសុវត្ថិភាព។
ឯកឧត្តម ងួន រតនៈ អភិបាលបានក្រើនរំលឹកដល់ប្រធានមន្ទីរអង្គភាពនិងអភិបាលក្រុងស្រុកទាំងអស់ត្រូវធ្វើយ៉ាងណាពង្រឹងនៅវិន័យការងារក្នុងពេលប្រជុំរៀងរាល់ខែក្នុងករណីចាំបាច់ដែលអវត្តមាននៅក្នុងកិច្ចប្រជុំបើអវត្តមានត្រូវមានសុំច្បាប់ការអនុញ្ញាតនិងប្រាប់ពីមូលហេតុទុក្ខធុរៈហើយផ្ញើចូលគ្រុបតេឡេក្រាមដើម្បីងាយស្រួលសម្រាប់នាយករដ្ឋបាលសាលាខេត្តក្នុងការធ្វើកំណត់ហេតុឲ្យបានច្បាស់លាស់ចំពោះអ្នកមកយឺតពេលវេលាត្រូវដាក់អវត្តមានតែម្តង។
