(រដ្ឋបាលខេត្តកំពង់ធំ)៖ នារសៀលថ្ងៃទី២៤ ខែកក្កដា ឆ្នាំ២០២៤ លោក ស ប៉ាហូ និង លោក យស បញ្ញារិទ្ធិ នាយករងរដ្ឋបាលសាលាខេត្តកំពង់ធំ បានអញ្ជើញដឹកនាំកិច្ចប្រជុំរៀបចំរបាយការណ៍ ត្រៀមធ្វើបទបង្ហាញ និងធ្វើកិច្ចសម្ភាសន៍នៅស្ថានីយវិទ្យុ និងទូរទស្សន៍ក្រសួងមហាផ្ទៃ ដែលនឹងប្រព្រឹត្តិទៅនៅថ្ងៃទី០៧ ខែសីហា ឆ្នាំ២០២៤ ខាងមុខនេះ។
នៅក្នុងកិច្ចប្រជុំនោះដែរ លោក ស ប៉ាហូ បានណែនាំដល់មន្ត្រីទទួលបន្ទុកបូកសរុបរបាយការណ៍របស់មន្ទីរអង្គភាព ក្រុងស្រុក សូមធ្វើការសិក្សាស្រាវជ្រាវ ប្រមូលទិន្ន័យ អំពីការគ្រប់គ្រងរដ្ឋបាលដែនដី ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម និងការអភិវឌ្ឍមូលដ្ឋាន រយៈពេល០៥ឆ្នាំកន្លងមក ដោយធ្វើរបាយការណ៍បញ្ជូនមករដ្ឋបាលខេត្តកំពង់ធំត្រឹមថ្ងៃទី០១ ខែសីហា ឆ្នាំ២០២៤ជាកំណត់។
ជាមួយគ្នានោះ លោក យស បញ្ញារិទ្ធិ បានបញ្ជាក់បន្ថែមទៀតថា ក្នុងន័យនេះ ដើម្បីឲ្យរដ្ឋបាលខេត្ត មានមូលដ្ឋានត្រៀមរៀបចំរបាយការណ៍ និងធ្វើបទបង្ហាញ ជូនឯកឧត្តមអភិបាលខេត្តបានទាន់ពេលវេលា ស្នើសុំដល់អភិបាលរងទទួលបន្ទុក និងមន្ត្រីទទួលបន្ទុកបូកសរុបរបាយការណ៍ និងសមាសភាពពាក់ព័ន្ធ ជួយពន្លឿន និងពិនិត្យលើរបាយការណ៍ឲ្យមានទិន្នន័យគ្រប់ជ្រុងជ្រោយ ទៅតាមគំរូទម្រង់របាយការណ៍ដែលរដ្ឋបាលខេត្តផ្តល់ជូន។
អត្ថបទដោយ៖ លោក ឈួន ឆេងមួន
