នៅថ្ងៃទី០៣ ខែមេសា ឆ្នាំ២០១៧ រដ្ឋបាលខេត្តកំពង់ធំ បានរៀបចំពិធីប្រកាសចូលកាន់មុខតំណែងអភិបាលរងខេត្តកំពង់ធំ ក្នុងរចនាសម្ព័ន្ធរដ្ឋបាលខេត្តកំពង់ធំ ក្រោមអធិបតីភាពដ៏ខ្ពង់ខ្ពស់ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នៅសាលប្រជុំសាលាខេត្តកំពង់ធំ។ សមាសភាពដែលបានអញ្ជើញចូលរួមមាន ឯកឧត្តមអនុរដ្ឋលេខាធិការ ឯកឧត្តមអគ្គនាយក ឯកឧត្តម-លោកជំទាវ ប្រតិភូអមដំណើរ ឯកឧត្តមប្រធានក្រុមប្រឹក្សាខេត្ត ឯកឧត្តមអភិបាលខេត្ត ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្តផងដែរ។ ការរៀបចំពិធីប្រកាសនេះគឺក្នុងគោលបំណងឆ្លុះបញ្ចំាងឲ្យឃើញពីការយកចិត្តទុកដាក់ពីសំណាក់ថ្នាក់ដឹកនាំក្រសួងមហាផ្ទៃ សំដៅធ្វើយ៉ាងណាឲ្យរដ្ឋបាលខេត្តកំពង់ធំ អនុវត្តឲ្យបាននូវគុណភាពសេវាសាធារណៈ និងប្រសិទ្ធភាពការងារក្នុងជួរគណៈអភិបាល រួមទំាងមន្ត្រីក្រោម និងការបំពេញតួនាទី ភារកិច្ចរបស់រដ្ឋបាលថ្នាក់ក្រោមជាតិក្នុងការអភិវឌ្ឍនានាដោយអនុវត្តតាមគោលនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល ដើម្បីបំពេញនូវតម្រូវការរបស់ប្រជាពលរដ្ឋនៅតាមូលដ្ឋាននៅក្នុងខេត្តកំពង់ធំ។