នាព្រឹកថ្ងៃទី១៣ ខែតុលា ឆ្នាំ២០១៧ រដ្ឋបាលខេត្តកំពង់ធំ រៀបចំបើកសិក្ខាសាលា ស្តីពី «វិធីសាស្ត្រចងក្រងប្រវត្តិសាស្ត្ររាជធានីខេត្ត» ក្រោមអធិបតីភាព ឯកឧត្តមបណ្ឌិតសភាចារ្យ ស៊ន សំណាង ទីប្រឹក្សារាជរដ្ឋាភិបាល និង ឯកឧត្តម ហួន វ៉ាន់និត អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម សុខ លូ អភិបាលខេត្ត ដោយមានការចូលរួមពីសំណាក់ សមាជិកក្រុមប្រឹក្សាខេត្ត និងថ្នាក់ដឹកនាំមន្ទីរ អង្គភាព ព្រមទាំង មន្ត្រីរាជការសាលាខេត្តកំពង់ធំ។
ស្ថិតក្នុងឱកាសដ៏មានសារៈសំខាន់នេះ ឯកឧត្តមបណ្ឌិតសភាចារ្យ ស៊ន សំណាង ទីប្រឹក្សារាជរដ្ឋាភិបាល បានធ្វើបទឧទ្ទេសនាម លើប្រវត្តិគ្រប់គ្រងរដ្ឋបាលដែនដីខ្មែរ ចាប់ពីសម័យអានានិគមន៍បារាំង រហូតដល់ខ្មែរទទួលបានឯករាជ្យពីបារាំង ក្នុងនោះក៏បាននិយាយអំពីប្រវត្តិគ្រប់គ្រងរបស់ខេត្តកំពង់ធំយើងដែរ រួមមានខេត្តកំពង់ស្វាយ ខេត្តបារាយណ៍ ខេត្តសន្ទុក ខេត្តជីក្រែង ខេត្តស្ទោង ដែលសម័យនោះផ្ទៃដីខេត្ត ស្មើរស្រុក ហើយមានចៅហ្វាយស្រុកខេត្តនីមួយៗស្ថិតក្រោមរេស៊ីដង់ខេត្តរបស់បារាំង។
ក្នុងឱកាសនេះដែរ ឯកឧត្តមបណ្ឌិតសាភាចារ្យ បានថ្លែងថា «យើងចាប់ផ្តើមមានគំនិតចងក្រងប្រវត្តិសាស្ត្រឡើងវិញនេះដោយសារយើងសោកស្តាយប្រវត្តិសាស្ត្រយើងដែលខំចងក្រងទុក ដូច្នេះយើងក៏រៀបចំកម្រោងចងក្រងនេះស្នើទៅសម្តេចអគ្គមហាសេនាបតីតេជោ នាយករដ្ឋមន្ត្រីដើម្បីធ្វើការចងក្រង។ អ្វីដែលគួរឱ្យភ្ញាក់ផ្អើលនោះគឺមិនត្រឹមតែសម្តេចមិនបដិសេធទេ ថែទាំងគាំទ្រថែមទៀត ដូចនេះយើងសប្បាយរីករាយនឹងធ្វើការងារនេះណាស់» គួរបញ្ជាក់ផងដែរថា ក្រុមការងារដែលរៀបចំចងក្រងនេះរួមមានក្រុមការងាររបស់ឯកឧត្តមផ្ទាល់ ក្រុមបណ្ណាសារដ្ឋានជាតិ និងជំនាញការបារាំងផងដែរ។ ការរៀបចំចងក្រងប្រវត្តិសាស្ត្រនេះ យើងបានយកគំរូពីប្រទេសបារាំងចាប់តាំងពីឆ្នាំ១៩០៣ ដែលមានរដ្ឋបាលខេត្តអ្នកសរសេរ ហើយបារាំងជាអ្នកត្រួតពិនិត្យ ប៉ុន្តែបច្ចុប្បន្ននេះប្រទេសកម្ពុជាទទួលបានឯករាជ្យ ជាប្រទេសមានអធិបតេយ្យភាព ដូចនេះការចងក្រងប្រវត្តិសាស្ត្រ ត្រូវមានការសហការរវាង ក្រុមការងារចងក្រងប្រវត្តិសាស្ត្រ ជាមួយនឹងរាជធានីខេត្តទាំងអស់ដើម្បីរៀបចំចងក្រងប្រវត្តិសាស្ត្រ។ ឯកឧត្តមបណ្ឌិតសភាចារ្យ បានបន្ថែមទៀតផងដែរថា «ដើម្បីឲ្យគម្រោងនេះបានជោគជ័យ ជំហ៊ានដំបូងត្រូវបណ្តុះបណ្តាល មន្ត្រីរាជការ ឬនិសិ្សត ដែលមានឯកទេសប្រវត្តិវិទ្យា ដោយផ្តល់អាហារូបករណ៍ថ្នាក់ បណ្ឌិត និងអនុបណ្ឌិត ក្រោមគម្រោងបណ្តុះបណ្តាលប្រលឹងជាតិ ដល់ថ្នាក់រាជធានីខេត្ត»។
ជាចុងក្រោយ ឯកឧត្តមបណ្ឌិតសភាចារ្យ ថ្លែងអំណរគុណដល់រដ្ឋបាលខេត្តកំពង់ធំ ដែលយកចិត្តទុកដាក់លើការងារចងក្រងប្រវត្តិសាស្ត្រ និងផ្តល់កិច្ចសហការយ៉ាងរលូន។ ឯកឧត្តមសង្ឃឹមយ៉ាងមុតមាំថានឹងទទួលលទ្ធផលល្អប្រសើរក្នុងការចងក្រងប្រវត្តិសាស្ត្រក្នុងខេត្តកំពង់ធំ។