ស្ថានភាពទូទៅ និងសក្តានុពលរបស់ខេត្តកំពង់ធំ
ខេត្តកំពង់ធំ ស្ថិតនៅកណ្តាលនៃព្រះរាជាណាចក្រកម្ពុជា មានចម្ងាយ ១៦៨គីឡូម៉ែត្រ ពីរាជធានីភ្នំពេញ មានព្រំប្រទល់ជាប់ខេត្តព្រះវិហារ ស្ទឹងត្រែង ក្រចេះ កំពង់ចាម កំពង់ឆ្នាំង ពោធិ៍សាត់ និងសៀមរាប ចែកជាក្រុង០១ ស្រុក០៨ ឃុំ៧៣ សង្កាត់០៨ ភូមិ៧៦៧ ដែលមានប្រជាពលរដ្ឋចំនួន ១៧៧.៧២៨គ្រួសារ ស្មើនឹង ៨៣៩.៩៩១នាក់ ស្រី៤២៥.៨៤៦នាក់ ដង់ស៊ីតេប្រជាពលរដ្ឋ ៥៥នាក់/គ.ម២។ ខេត្តមានផ្ទៃដីសរុបចំនួន ១៥.០៦១គ.ម២ ស្មើនឹង ១.៥០៦.១៩៧ហ.ត ចែកជាពីរសណ្ឋានដីគឺ តំបន់ខាងក្រោមផ្លូវជាតិលេខ៦ ជាតំបន់វាលទំនាប លាតសន្ធឹងរហូតដល់មាត់បឹងទន្លេសាប អំណោយផលយ៉ាងខ្លាំងដល់ការដាំដុះស្រូវ និងការនេសាទ។ តំបន់ខាងលើផ្លូវជាតិលេខ៦ ជាតំបន់ខ្ពង់រាបសមប្រកបបំផុតសម្រាប់ដំណាំចម្ការដូចជាកៅស៊ូ ស្វាយចន្ទី និងដំឡូងមីជាដើម។
ខេត្តកំពង់ធំមានផ្លូវទឹកសំខាន់ៗចំនួន ០៤ខ្សែ៖
- ស្ទឹងសែន៖ ប្រវែង៥២០គម មានប្រភពពីជួរភ្នំដងរែក ហូរកាត់ខេត្តកំពង់ធំប្រវែង ២៥៧គម ផ្ទៃរងទឹកភ្លៀងទំហំ ១.៦៣៤៤២១ហត
- ស្ទឹងជីនិត៖ ប្រវែង២៧៥គ.ម មានប្រភពនៅព្រៃឡង់ និងព្រៃអង់តែន ផ្ទៃរងទឹកភ្លៀងទំហំ ៧០៧.០៤១ហ.ត ។ នៅលើស្ទឹងនេះ មានការសាងសង់សំណង់កាត់ស្ទឹងចំនួន០១កន្លែង គឺទំនប់អាងទឹកស្ទឹងជីនិត ឬ១មករា ដែលដំណើរការស្រោចស្រពរាល់ថ្ងៃ។
- ស្ទឹងតាំងក្រសាំង៖ ប្រវែង ១០៣គ.ម ផ្ទៃរងទឹកភ្លៀងទំហំ ១១៦.៦២៧ហ.ត ។ នៅលើស្ទឹង នេះមានការសាងសង់សំណង់កាត់ស្ទឹងចំនួន ០១កន្លែងគឺ ទំនប់អាងទឹកតាំងក្រសាំង ឬ៦ មករា ដែលដំណើរការស្រោចស្រពរាល់ថ្ងៃ។
- ស្ទឹងស្ទោង៖ ប្រវែង ១៥៥គម ផ្ទៃរងទឹកភ្លៀងទំហំ ៤៣៥.២៣៩ហត។ នៅលើស្ទឹងនេះមាន ការសាងសង់សំណង់ ០២កន្លែងគឺ ទំនប់អាងទឹកស្ទោង ឬ៣០កញ្ញា និងសំណង់ស្ទាក់ទឹកបត់ត្រង់។
ខេត្តមានផ្លូវជាតិសំខាន់ៗឆ្លងកាត់ចំនួន ០៥ខ្សែគឺ៖
- ផ្លូវជាតិលេខ៦ ប្រវែង ១៤៤គ.ម ពីព្រំប្រទល់ខេត្តកំពង់ចាម ដល់ព្រំប្រទល់ខេត្តសៀមរាប
- ផ្លូវជាតិលេខ៦២ ប្រវែង ៣៦គ.ម ពីទីប្រជុំជនខេត្ត ដល់ព្រំប្រទល់ខេត្តព្រះវិហារ
- ផ្លូវជាតិលេខ៧១ ប្រវែង ១៥គ.ម ពីស្រុកបារាយណ៍ ដល់ព្រំប្រទល់ខេត្តកំពង់ចាម
- ផ្លូវជាតិលេខ៥០C ប្រវែង១៩គ.ម ពីភូមិត្រពាំងវែង ដល់ស្រុកកំពង់លែង ខេត្តកំពង់ឆ្នាំង
- ផ្លូវជាតិលេខ ៦០B ប្រវែង ៥២គ.ម ពីទីប្រជុំជនឃុំកំពង់ថ្ម ដល់ខេត្តកំពង់ចាម។
វិស័យកសិកម្មជាវិស័យដែលចំបងក្នុងការរក្សាលំនឹងសេដ្ឋកិច្ចជូនប្រជាពលរដ្ឋ ក្នុងខេត្តកំពង់ធំ។ ក្នុងឆ្នាំ២០២១កន្លងទៅ ផ្ទៃដីដាំដុះស្រូវមានសរុបចំនួន ៣០៦.៧២៥ហ.ត ក្នុងនោះស្រូវប្រាំងសរុបចំនួន ៧៦.៩៥៦ហ.ត និងស្រូវវស្សា ២២៩.៧៦៩ហ.ត។ ផ្ទៃដីប្រមូលផលសរុបចំនួន ៣០៥.៦១៦ហ.ត ទិន្នផលជាមធ្យម ៣,១៩១តោនក្នុង១ហិកតា។ ជារួម តុល្យភាពស្បៀងប្រចាំឆ្នាំ២០២១ ក្រោយកាត់ទុក១៣%សម្រាប់ធ្វើពូជ ធ្វើចំណីសត្វ និងសម្រាប់តម្រូវការហូបចុកក្នុងខេត្ត នៅសល់ស្រូវ ចំនួន ៨៤៨.៤៦៤តោន គិតជាអង្ករស្មើនឹង ៥៤៣.០១៧តោន។
ផ្ទៃដីដាំដុះដំណាំបន្លែ សរុបចំនួន ១.០៩៣ហិកតា ផលជាមធ្យម ៦,៤០៣ តោន/ហិកតា បរិមាណផលសរុប ៦.៩៩៩តោន។
ផលនេសាទចាប់បានសរុប ៤២.៩៧០តោន ដែលក្នុងនោះ នេសាទគ្រួសារក្នុងដែននេសាទសរុប ២៧.០០០តោន នេសាទគ្រួសារតាមវាលស្រែ ១៥.៩៧០តោន និងការចិញ្ចឹមត្រីទឹកសាបទទួលផល ៤០.៩៥០តោន។
ក្រុមហ៊ុនវិនិយោគដីសម្បទានសេដ្ឋកិច្ចមានចំនួន ២៧ក្រុមហ៊ុន(ក្រុមហ៊ុនអវិនិយោគ០១ក្រុមហ៊ុន) (ក្រុមហ៊ុនវៀតណាម ១១ក្រុមហ៊ុន កូរ៉េ ០១ក្រុមហ៊ុន និងខ្មែរ ១៦ក្រុមហ៊ុន) លើផ្ទៃដី ១២៤.៧២៦,០០ហ.ត ផ្ទៃដីឈូសឆាយ ៧៧.០៤៥,០៣ហ.ត ផ្ទៃដីអាជីវកម្ម ៨១.៧៤៧,៨២ហ.ត ផ្ទៃដីដាំដុះកៅស៊ូបានចំនួន ៦១.៩២៦,១៤ហ.ត ផ្ទៃដីចៀរជ័រ ៥០.៩៣៧,៨៤ហ.ត ផ្ទៃដីចុះបញ្ជីចំនួន ៦៤.៨៦៧,៣២២៩ហ.ត។
សហគមន៍ព្រៃឈើមានសរុបចំនួន ៨៣កន្លែង ដែលមានផ្ទៃដីសរុបចំនួន ៧៤.៥៥៨,០២ហ.ត សមាជិក ១២.៥៨៣គ្រួសារ ស្មើនឹង ៣៤.៦០១នាក់ គ្របដណ្តប់លើ ១០២ភូមិ ២៧ឃុំ ៦ស្រុក។
ដំណាំកសិ-ឧស្សាហកម្មមានដូចជា៖
- ដំណាំស្វាយចន្ទី៖ ផ្ទៃដីដាំដុះ ១១៧.៩៩០ហត ផ្ទៃដីប្រមូលផល ៨១.៦០០ហត ទិន្នផល ១,៨តោន/ហត បរិមាណផល ១៤៦.៨៦១តោន
- ដំណាំស្វាយ៖ ផ្ទៃដីដាំដុះ ៨.៧៧១ហត ផ្ទៃដីប្រមូលផល ៤.០៧៤ហត ទិន្នផល ២៤តោន/ហតបរិមាណផល ៩៧.៧៧៦តោន
- ដំឡូងមី៖ ផ្ទៃដីដាំដុះ ៥៣.៣៨៥ហត ផ្ទៃដីប្រមូលផល ៣៩.២២១ហត ទិន្នផល ២៣តោន/ហត
ស្ថិតិសត្វចិញ្ចឹមមានដូចជា៖ គោ ក្របីចំនួន ២១៥.៧០០ក្បាល ជ្រូកចំនួន ៥៣.៣៨០ក្បាល សេះចំនួន ៨២ក្បាល ចៀមចំនួន ២៤៦ក្បាល ពពែ១៣៩ក្បាល បក្សីចំនួន១.៣៥៧.៣២០ក្បាល។
កត្តាដែលមិនអាចខ្វះបានដែលផ្តល់លទ្ធភាពឲ្យវិស័យកសិកម្មអាចប្រព្រឹត្តទៅបានល្អប្រសើរគឺប្រព័ន្ធធារាសាស្រ្ត។ ក្នុងខេត្តកំពង់ធំប្រព័ន្ធធារាស្ត្រមានចំនួន២៥៨ (ស្តារ ជួសជុល និងសាងសង់ថ្មីចំនួន៥៣) ក្នុងនោះ ប្រព័ន្ធខ្នាតធំចំនួន៣ (ធំជាង៥.០០០ហ.ត) ប្រព័ន្ធខ្នាតមធ្យម១៦១ (២០០ ទៅ ៥.០០០ហ.ត) ប្រព័ន្ធខ្នាតតូច៩៤ (តូចជាង ២០០ហ.ត) ដែលអាចស្រោចស្រពបាន ស្រូវវស្សា ១២៣.៩៥៦ហ.ត ស្មើ នឹង ៥៣,៩៤% និងស្រូវប្រាំង ២.៩១៩ហ.ត ស្មើនឹង ៤០,០៩%។ ប្រព័ន្ធធារាស្ត្រធំទាំង៣មានដូចជា៖
- ប្រព័ន្ធធារាសាស្ត្រស្ទឹងជីនិត៖ អាចរក្សាទឹកទុកបាន ២៩.០០០.០០០ម៣ ដែលមានលទ្ធ ភាព ស្រោចស្រពស្រូវប្រជាពលរដ្ឋក្នុងឃុំចំនួន ១៣ នៃស្រុកសន្ទុក បារាយណ៍ និងតាំងគោក
- ប្រព័ន្ធធារាសាស្ត្រតាំងក្រសាំង៖ អាចរក្សាទឹកទុកបាន ២៥.០០០.០០០ម៣ និងអាចរក្សា ទឹកតាមប្រឡាយមេបាន ៥.០០០.០០០ម៣ ដែលមានលទ្ធភាពស្រោចស្រពផ្ទៃដីស្រូវវស្សា ៩.៨៦៩ហ.ត និងស្រូវប្រាំង ២.០១៩ហ.ត ក្នុងឃុំចំនួន ៤ នៃស្រុកសន្ទុក
- ប្រព័ន្ធធារាសាស្ត្រ ៣០កញ្ញា៖ អាចរក្សាទឹកទុកបាន ៣៥០០០.០០០ម៣ ដែលមានលទ្ធ ភាពអាចស្រោចស្រពផ្ទៃដីស្រែវស្សា ១០០០០ហ.ត និងស្រូវប្រាំង ៣.៥០០ហ.ត ក្នុងឃុំ ចំនួន ១១ នៃស្រុកប្រាសាទបល្ល័ង្ក ស្ទោង និងកំពង់ស្វាយ។
ក្រៅពីវិស័យកសិកម្ម វិស័យទេសចរណ៍ក៏បានដើរតួនាទីយ៉ាងសំខាន់ក្នុងការជួយគាំទ្រដល់សេដ្ឋកិច្ចគ្នុងខេត្តកំពង់ធំ។ តំបន់ទេសចរណ៍ដែលមានសក្តានុពលមានដូចជា រមណីយដ្ឋានវប្បធម៌ប្រវត្តិសាស្ត្រ ប្រាសាទសំបូរព្រៃគុក ដែលត្រូវបានដាក់ចូលជាសម្បត្តិបេតិកភ័ណ្ឌពិភពលោក និងប្រាសាទគុហនគរ រមណីយដ្ឋានធម្មជាតិ និងសប្បនិម្មិតដូចជា ភ្នំសន្ទុក ស្ទឹងជីនិត ស្ទឹងព្រៃប្រស់ បឹងសំរិទ្ធ ជាដើមដែលភ្ញៀវទេសចរចូលចិត្តទៅទស្សនាកំសាន្តច្រើនជាងគេ។ កាលពីឆ្នាំ២០២១កន្លងទៅ រមណីយដ្ឋានទាំងនេះបានទាក់ទាញភ្ញៀវឲ្យមកសម្រាកកំសាន្តចំនួន ៦៤.៧១០នាក់ក្នុងនោះ ទេសចរជាតិ ៦៤.២៧៦នាក់ ទេសចរអន្តរជាតិ ៤៣៤នាក់។
ចក្ខុវិស័យ៖
រដ្ឋបាលខេត្តកំពង់ធំគឺជារដ្ឋបាលសាធារណៈមួយ ដែលមានលក្ខណៈអព្យាក្រឹត្យក្នុងការផ្តល់សេវាតម្រូវការ សេវាសំណូមពរ និងសេវាជាកាតព្វកិច្ចនានាប្រកបដោយប្រសិទ្ធភាព តម្លាភាព ដើម្បីបន្តចូលរួមលើកកម្ពស់ជីវភាព និងកាត់បន្ថយភាពក្រីក្រប្រជាពលរដ្ឋ តាមរយៈការកែលម្អស្ថានភាពសេដ្ឋកិច្ច សង្គមកិច្ច វប្បធម៌ សន្តិសុខ សណ្តាប់ធ្នាប់សាធារណៈដោយធានាបាននូវនិរន្តរភាពធនធានធម្មជាតិ និងប្រកបដោយបរិយាប័ន្ន។
បេសកកម្ម៖
កាត់បន្ថយភាពក្រីក្ររបស់ប្រជាពលរដ្ឋ តាមរយៈការបង្កើត ការផ្តល់ និងការធ្វើឲ្យប្រសើរឡើងនូវមុខរបររបស់ប្រជាពលរដ្ឋ ផលិតភាពកសិកម្ម សុខមាលភាព ការផ្តល់សេវាសុខភាពដោយសមធម៌ ធានាការគ្រប់គ្រង ការប្រើប្រាស់ដីធ្លី ធនធានធម្មជាតិ និងបរិស្ថានប្រកបដោយនិរន្តរភាព ពង្រឹងការគ្រប់គ្រងរដ្ឋបាល ច្បាប់ សន្តិសុខ និងសណ្តាប់ធ្នាប់សាធារណៈឲ្យកាន់តែប្រសើរឡើង។
គុណតម្លៃ
១. វិន័យ និងសីលធម៌ នាំមកនូវសេចក្តីថ្លៃថ្នូរ
២. គោរពពេលវេលា ធ្វើឲ្យការងាររីកចម្រើន
៣. តម្លាភាព នាំឲ្យមានការគាំទ្រ
៤. ភាពស្មោះត្រង់ នាំមកនូវការជឿជាក់
៥. សាមគ្គីភាពផ្ទៃក្នុង នាំមកនូវភាពជោគជ័យ
៦. ការឲ្យតម្លៃគ្នាទៅវិញទៅមក គឺជាការលើកកម្ពស់សមភាពយេនឌ័រ