កម្មវិធីជាតិសម្រាប់ការអភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ (២០១០-២០១៩) ត្រូវបានរៀបចំឡើង ក្នុងគោលបំណងដូចខាងក្រោម៖
គោលបំណង ៖
- ដើម្បីអភិវឌ្ឍតាមបែបប្រជាធិបតេយ្យ ដោយមានការចូលរួម និងមានសមធម៌
- លើកកម្ពស់បរិមាណ គុណភាព និងការទទួលបានសេវាឱ្យមានភាពប្រសើឡើងនិង
- រួមចំណែកការកាត់បន្ថយភាពក្រីក្រ។
គោលដៅ៖
- បង្កើតប្រព័ន្ធគ្រប់គ្រងនៅថ្នាក់រាជធានី ខេត្ដ ក្រុង ស្រុក ខណ្ឌ និងឃុំ សង្កាត់ ផ្អែកតាមគោលការណ៍នៃការចូលរួមតាមបែបប្រជាធិបតេយ្យ ដែលធានាដល់ការអនុវត្ដប្រកបដោយតម្លាភាព និងគណនេយ្យភាព សំដៅលើកកម្ពស់ការអភិវឌ្ឍមូលដ្ឋាន និងការផ្ដល់សេវាសាធារណៈ ដើម្បីឆ្លើយតបតម្រូវការប្រជាពលរដ្ឋ និងរួមចំណែកកាត់បន្ថយភាពក្រីក្រនៅតាមមូលដ្ឋាននីមួយៗ។
ដើម្បីសម្រេចបាននូវគោលបំណង និងគោលដៅខាងលើ កម្មវិធីជាតិបានផ្តោតទៅលើសមាសធាតុ៥គឺ ៖
- ការរៀបចំស្ថាប័នថ្នាក់ក្រោមជាតិ៖ មានគោលបំណង បង្កើតស្ថាប័នរដ្ឋបាលថ្នាក់ក្រោមជាតិតាមរយៈការរៀបចំនូវរចនាសម្ព័ន្ធ ប្រព័ន្ធគ្រប់គ្រងមួយ ផ្អែកតាមគោលការណ៍នៃការចូលរួមតាមបែបប្រជា ធិបតេយ្យ។
- ប្រព័ន្ធគ្រប់គ្រង និងការអភិវឌ្ឍធនធានមនុស្ស៖ មានគោលបំណង រៀបចំឱ្យមានមន្ដ្រីរាជការស៊ីវិលប្រកបដោយវិជ្ជាជីវៈ និងមានឆន្ទៈមោះមុត ក្នុងការបំពេញការងារនៅរដ្ឋបាលថ្នាក់ក្រោមជាតិដែលមានគណនេយ្យភាពចំពោះក្រុមប្រឹក្សា និងគ្រប់គ្រងដោយក្រុមប្រឹក្សា។
- ការផ្ទេរមុខងារ៖ មានគោលបំណង លើកកម្ពស់បរិមាណ និងគុណភាពសេវាសាធារណៈតាមរយៈការផ្ទេរមុខងារទៅឱ្យរដ្ឋបាលថ្នាក់ក្រោមជាតិ ដោយភ្ជាប់ជាមួយនូវការទទួលខុសត្រូវ សិទ្ធិអំណាច និងធនធានដែលពាក់ព័ន្ធនឹងការអនុវត្ដមុខងារទាំងនោះ។
- ប្រព័ន្ធគ្រប់គ្រងថវិកា ហិរញ្ញវត្ថុ និងទ្រព្យសម្បត្ដិរបស់រដ្ឋបាលថ្នាក់ក្រោមជាតិ៖ មានគោលបំណង បង្កើតប្រព័ន្ធគ្រប់គ្រងហិរញ្ញវត្ថុមួយរបស់រដ្ឋបាលថ្នាក់ក្រោមជាតិ ដើម្បី ឱ្យរដ្ឋបាលថ្នាក់ក្រោមជាតិ មានលទ្ធភាពកៀរគរ និងទទួលបានធនធាន គ្រប់គ្រាន់ ព្រមទាំងមានសិទ្ធិអំណាចក្នុងការគ្រប់គ្រង និងបែងចែក ធនធានទាំងនោះ ប្រកបដោយតម្លាភាព និងគណនេយ្យភាព។
- ស្ថាប័នគាំទ្រកំណែទម្រង់វិមជ្ឈការ និងវិសហមជ្ឈការ៖ មានគោលបំណង ពង្រឹងស្ថាប័នថ្នាក់ជាតិនានាសម្រាប់ដឹកនាំ ការអនុវត្ដកម្មវិធីជាតិរយៈ ពេល១០ឆ្នាំ និងគាំទ្រដល់រដ្ឋបាលថ្នាក់ក្រោមជាតិ។
ដើម្បីសម្រេចបាននូវគោលបំណង និងគោលដៅខាងលើ កម្មវិធីជាតិត្រូវបានអនុវត្តជា៣ដំណាក់កាល គឺ ដំណាក់កាលទី១ (ផែនការអនុវត្តរយៈពេល៣ឆ្នាំ ២០១១-២០១៤) ហៅកាត់ថា (ផ.អ.៣ ទី១), ដំណាក់កាលទី២ (ផែនការអនុវត្តរយៈពេល៣ឆ្នាំ ២០១៥-២០១៧) ហៅកាត់ថា (ផ.អ.៣ ទី២) និងដំណាក់កាលទី៣ (ផែនការអនុវត្តរយៈពេល៣ឆ្នាំ២០១៨-២០២០) ហៅកាត់ថា (ផ.អ.៣ ទី៣) ។
ផអ៣ទី១ (២០១១-២០១៤) ផ្តោតការយកចិត្តទុកដាក់ទៅលើការពង្រឹង និងការអភិវឌ្ឍសមត្ថភាពរបស់រដ្ឋបាលថ្នាក់ក្រោមជាតិ ជាពិសេសរដ្ឋបាលក្រុង ស្រុក ឱ្យក្លាយជាស្ថាប័នអភិបាលកិច្ចមូលដ្ឋាន និងអភិវឌ្ឍមូលដ្ឋានយ៉ាងពិតប្រាកដ។ មូលដ្ឋានគ្រឹះសំខាន់ៗ ដូចជារចនាសម្ព័ន្ធ នីតិវិធី ប្រព័ន្ធ និងឧបករណ៍ជាច្រើនសម្រាប់ការបំពេញការងាររបស់រដ្ឋបាលថ្នាក់ក្រោមជាតិត្រូវបានរៀបចំឡើងវិញ និងបានផ្តល់ជាបង្អែកយ៉ាងរឹងមាំសម្រាប់ការបោះជំហានឆ្ពោះទៅមុខ។ ទាំងនេះបណ្តាលឲ្យផអ៣ទី១ ក្លាយជាកម្លាំងចលករមួយដ៏សំខាន់ សម្រាប់ការងារកំណែទម្រង់ និងជាសនិទានកម្មដ៏សំខាន់ ដែលនាំឲ្យរាជរដ្ឋាភិបាល តាមរយៈកិច្ចប្រជុំលើកទី១០ របស់ គ.ជ.អ.ប កាលពីខែធ្នូ ឆ្នាំ២០១៤ បានសម្រេចបន្តអនុវត្តដំណាក់កាលទី២ (ផអ៣ទី២) ដែលចាប់ផ្តើមពីឆ្នាំ២០១៥ ដល់ ឆ្នាំ២០១៧។
ចក្ខុវិស័យនៃផអ៣ទី២នេះគឺ “រដ្ឋបាលថ្នាក់ក្រោមជាតិផ្តល់សេវា និងអភិវឌ្ឍមូលដ្ឋានបានកាន់តែច្រើន កាន់តែល្អប្រសើរ កាន់តែមានលក្ខណៈឆ្លើយតបចំពោះសេចក្តីត្រូវការរបស់ប្រជាពលរដ្ឋរបស់ខ្លួន”។ ផអ៣ទី២បន្តផ្តោតការយកចិត្តទុកដាក់ជាសំខាន់ទៅលើរដ្ឋបាលក្រុង ស្រុក ប៉ុន្តែក៏មានការពាក់ព័ន្ធជាមួយនឹងថ្នាក់រដ្ឋបាលថ្នាក់ក្រោមជាតិផ្សេងៗទៀតផងដែរ។ ទាក់ទងជាមួយភ្នាក់ងារអនុវត្តនៅថ្នាក់ជាតិ ក្នុងក្របខណ្ឌផអ៣ទី២ នឹងមិនអនុវត្តដោយអនុកម្មវិធីទៀតទេ។ ភ្នាក់ងារអនុវត្តនៅថ្នាក់ជាតិ គឺជាក្រសួងស្ថាប័នទាំងឡាយណាដែលមានការពាក់ព័ន្ធជាមួយការងារកំណែទម្រង់ ជាពិសេសការផ្ទេរមុខងារនិងធនធានក្នុងការផ្តល់សេវានិងការអភិវឌ្ឍមូលដ្ឋាន។ សមិទ្ធផលសំខាន់ៗ នៃការផ្ទេរមុខងារគឺរដ្ឋបាលថ្នាក់ក្រោមជាតិមានលទ្ធភាព ក្នុងការឆ្លើយតបទៅនឹងតម្រូវការរបស់ប្រជាពលរដ្ឋក្នុងការទទួលបាននូវសេវា ហើយការផ្តល់សេវានឹងត្រូវអនុវត្តដោយរដ្ឋបាលថ្នាក់ក្រោមជាតិដែលមានលក្ខណៈសមស្រប និងនៅកៀកបំផុតនឹងប្រជាពលរដ្ឋ។ ការផ្ទេរមុខងារជាបឋមមានការផ្ទេរមុខងារជាក់លាក់និងសមស្របមួយចំនួនពីក្រសួងទៅរដ្ឋបាលថ្នាក់ក្រោមជាតិ និងការផ្ទេរមុខងារនៃសេវាទីប្រជុំជនពីរដ្ឋបាលខេត្ត ទៅរដ្ឋបាលក្រុងស្រុក។
ចក្ខុវិស័យសម្រាប់ធនធានមនុស្សនៅរដ្ឋបាលថ្នាក់ក្រោមជាតិ គឺការប្រើប្រាស់ធនធានទាំងអស់ដែលមានរួមទាំងមន្ត្រីរាជការស៊ីវិល បុគ្គលិកកិច្ចសន្យា ទាំងផ្នែកឯកជន និងអង្គការសង្គមស៊ីវិល។ ការបង្កើតមណ្ឌលអភិវឌ្ឍន៍ធនធានមនុស្សនៅរាជធានី ខេត្ត គឺជាយន្តការថ្មីមួយទៀតនៃផអ៣ទី២ ដែលសង្ឃឹមថានឹងធានាបាននូវការរៀបចំវិធីសាស្រ្តនៃការអភិវឌ្ឍសមត្ថភាពដែលមានលក្ខណៈឆ្លើយតប និងប្រកបដោយការផ្តួចផ្តើម សំដៅសម្រេចបានដោយជោគជ័យក្នុងការអភិវឌ្ឍសមត្ថភាពនៅរដ្ឋបាលថ្នាក់ក្រោមជាតិ។
ការអភិវឌ្ឍសមត្ថភាពដល់មន្ត្រីរាជការនឹងត្រូវបន្តពង្រឹងតាមរយៈទីប្រឹក្សានៅថ្នាក់ជាតិ និងនៅថ្នាក់ក្រោមជាតិ។ ជាលទ្ធផលនៃការអភិវឌ្ឍសមត្ថភាព គេសង្ឃឹមថាជំនួយបច្ចេកទេសនឹងត្រូវបានបន្ថយជាបណ្តើរៗ ឬជំនួយបច្ចេកទេសទាំងនេះត្រូវបានបង្វែរពីថ្នាក់រាជធានី ខេត្ត ទៅថ្នាក់ក្រុង ស្រុក ជាពិសេសគឺត្រូវធ្វើការផ្លាស់ប្តូរ នូវទម្លាប់និងឥរិយាបថនៃការប្រើប្រាស់ជំនួយបច្ចេកទេស ដែលទីប្រឹក្សាតែងតែបំពេញការងារជំនួសមន្ត្រីរាជការ ទៅជាបែបផែនដែលទីប្រឹក្សាត្រូវផ្តោតតែលើការអភិវឌ្ឍសមត្ថភាពដល់មន្ត្រីរាជការ។ ដូចនេះ បុគ្គលិកកិច្ចសន្យា ទីប្រឹក្សាដែលស្ថិតនៅក្នុងក្របខណ្ឌផអ៣ទី២ ចាំបាច់ត្រូវផ្តោតការយកចិត្តទុកដាក់ទៅលើការសម្របសម្រួល និងការផ្តល់កិច្ចអន្តរាគមន៍ផ្នែកអភិវឌ្ឍន៍សមត្ថភាពឱ្យបានច្រើនជាងមុន ប្រកបដោយគុណភាពនិងភាពសក្កិសិទ្ធ ជាជាងទម្លាប់នៃការធ្វើជំនួស។ បុគ្គលិកកិច្ចសន្យា និងទីប្រឹក្សាត្រូវផ្ទេរចំណេះដឹងដល់ដៃគូរបស់ខ្លួនយ៉ាងតិចក្នុង២ដំណាក់កាល៖ ដំណាក់កាលទី១ គឺជាការបង្រៀនផងនិងជួយធ្វើការផងដូចជា ជាបឋមត្រូវតម្រង់ទិសឲ្យយល់អំពីតួនាទីនិងភារកិច្ចរបស់ខ្លួន និងស្ថាប័នរបស់ខ្លួន របៀបបំពេញការងារ ការរៀបចំផែនការការងារ ការចាត់អាទិភាពការងារ ការនាំឲ្យចូលរួមផ្ទាល់ក្នុងសិក្ខាសាលា វគ្គបណ្តុះបណ្តាល និងកិច្ចប្រជុំតាមមូលដ្ឋានជាដើម។ ដំណាក់កាលទី២ គឺជាការពង្រឹងបន្ថែម និងការកែតម្រូវតាមរយៈការត្រួតពិនិត្យលើការបំពេញការងារ ដោយផ្អែកលើគុណភាព ភាពទាន់ពេល និងភាពមានទំនុកចិត្តក្នុងការបំពេញការងារ។ នេះជាលក្ខណៈវិនិច្ឆ័យចម្បងនៃការវាយតម្លៃការបំពេញការងាររបស់បុគ្គលិកកិច្ចសន្យានិងទីប្រឹក្សាកម្មវិធី។
ផ.អ.៣ ទី២ (២០១៥-២០១៧) មាន គោលបំណង គោលដៅ និងសមិទ្ធិផលដូចខាងក្រោម៖
គោលបំណង
លើកកម្ពស់សុខុមាលភាព និងគុណភាពជីវិតរបស់ប្រជាពលរដ្ឋទាំងអស់ និងពង្រឹងភាពអង់អាចប្រជាពលរដ្ឋនៅមូលដ្ឋាន(ពីគ្រប់ក្រុមនានាក្នុងសង្គម)តាមរយៈកិច្ចដំណើរការផ្នែកនយោបាយ និងផ្នែកផ្សេងទៀត ដើម្បីធានាសមភាព យុត្តិធម៌ និងកិច្ចការពារសិទ្ធិជាមូលដ្ឋាននានា។
គោលដៅ
លើកកម្ពស់សមត្ថភាពការគ្រប់គ្រង អភិបាលកិច្ច ការផ្តល់សេវា និងការអភិវឌ្ឍមូលដ្ឋានរបស់រដ្ឋបាលថ្នាក់ក្រោមជាតិ ដើម្បីធានាសម្រេចបាននូវអាណត្តិនៃការអភិវឌ្ឍតាមបែបប្រជាធិបតេយ្យរបស់ខ្លួន។
ចរិកលក្ខណៈនៃផអ៣ទី២ ផ្តោតលើទិដ្ឋភាពសំខាន់ៗ ៖
- ការធ្វើវិមជ្ឈការមុខងារក្នុងការផ្តល់សេវា និងការអភិវឌ្ឍមូលដ្ឋានចាំបាច់នានា
- ការលើកកម្ពស់គណនេយ្យភាពរបស់រដ្ឋបាលថ្នាក់ក្រោមជាតិ
- ការបង្កើននូវគំនិតផ្តួចផ្តើម និងស្វ័យភាពមូលដ្ឋាន
- ការបង្កើនធនធានរបស់រដ្ឋបាលថ្នាក់ក្រោមជាតិ
សមិទ្ធិផលនៃផអ៣ទី២ មាន ៥ គឺ៖
- ទី១៖ការគ្រប់គ្រងកិច្ចដំណើរការកំណែទម្រង់៖ មានគោលដៅ លើកកម្ពស់ការគ្រប់គ្រងកិច្ចដំណើរការកំណែទម្រង់ការអភិវឌ្ឍតាមបែបប្រជាធិបតេយ្យ សំដៅឈានឆ្ពោះទៅរកការគ្រប់គ្រងដែលធានាឲមានការផ្លាស់ប្តូរ ។
- ទី២៖គណនេយ្យភាពបែបប្រជាធិបតេយ្យ៖ មានគោលដៅ ដើម្បីឲ្យរដ្ឋបាលថ្នាក់ក្រោមជាតិបំពេញមុខងារជាស្ថាប័នប្រជាធិបតេយ្យនៅមូលដ្ឋានដែលមានស្វ័យភាព និងមានគណនេយ្យភាពចំពោះក្រុមប្រឹក្សា ចំពោះប្រជាពលរដ្ឋ និងគោរពតាមក្របខណ្ឌច្បាប់ និងស្តង់ដារនានារបស់ជាតិ
- ទី៣៖ការគ្រប់គ្រង និងការអភិ វឌ្ឍធនធានមនុស្ស៖ មានគោលដៅ ដើម្បីឲ្យរដ្ឋបាលថ្នាក់ក្រោមជាតិគ្រប់គ្រង និងអភិវឌ្ឍធនធានមនុស្សរបស់ខ្លួនប្រកបដោយស្វ័យភាព និងប្រសិទ្ធភាព ដើម្បីសម្រេចបាននូវអាណត្តិ និងអាទិភាពនានាក្នុងការផ្តល់សេវា និងការអភិវឌ្ឍមូលដ្ឋាន
- ទី៤៖ ការផ្ទេរមុខងារ និងធនធានក្នុងការផ្តល់សេវា និងការអភិវឌ្ឍមូលដ្ឋាន៖ មានគោលដៅ ដើម្បីឲ្យ រដ្ឋបាលថ្នាក់ក្រោមជាតិអាចឆ្លើយតបចំពោះការរំពឹងទុករបស់ប្រជាពលរដ្ឋក្នុងការទទួលបាននូវសេវា និងកិច្ចអភិវឌ្ឍមូលដ្ឋាន
- ទី៥៖ វិមជ្ឈការហិរញ្ញវត្ថុ៖ មានគោលដៅ ធានាថា ធនធានហិរញ្ញវត្ថុត្រូវបានគ្រោងយ៉ាងត្រឹមត្រូវ និងចាត់ចែងបានយ៉ាងល្អ ព្រមទាំងមានចំនួនសមស្របសម្រាប់រដ្ឋបាលថ្នាក់ក្រោមជាតិ ក្នុងការឆ្លើយតបទៅនឹងការអនុវត្តមុខងារតាមអាណត្តិរបស់ខ្លួន
សម្រាប់ខេត្តកំពង់ធំ ការអនុវត្តផ.អ.៣ទី២ ក្នុងឆ្នាំ២០១៧ នេះ មានថវិកាសរុប 297,734 ដុល្លារ ដែលមានភ្នាក់ងារអនុវត្តចំនួន៣ គឺ មន្ទីរផែនការ មន្ទីរកិច្ចការនារី និងរដ្ឋបាលក្រុងស្រុក ដែលប្រើប្រាស់ទៅលើសកម្មភាពជាអាទិភាពដូចខាងក្រោម៖
លេខកូដ | បរិយាយ | ថវិកា (ដុល្លារ) | ភ្នាក់ងារអនុវត្ត |
2.2.1.1 | ការអនុវត្តផែនការស្តីពីការងារគណនេយ្យភាពសង្គមក្នុងស្រុកគោលដៅចំនួន៩០ស្រុក | 42,800 | |
2.2.1.1.7 | រៀបចំសិក្ខាសាលាផ្សព្វផ្សាយស្តីពីកិច្ចដំណើរការនៃការអនុវត្តផែនការយុទ្ធសាស្ត្រគណនេយ្យភាពសង្គមដល់ថ្នាក់ដឹក នាំខេត្ត និងស្រុក | 1,894 | មណ្ឌលអភិវឌ្ឍន៍ធនធានមនុស្សខេត្ត |
2.2.1.1.8 | រៀបចំវគ្គបណ្តុះបណ្តាលស្តីពីកិច្ចដំណើរការនៃការអនុវត្តផែនការគណនេយ្យភាពសង្គម (ការប្រមូលទិន្នន័យនិងការ បោះពុម្ព ការបិទផ្សាយផ្ទាំងកញ្ចប់ព័ត៌មានសម្រាប់ប្រជាពលរដ្ឋ) និងប្រព័ន្ធតាមដាននិងត្រួតពិនិត្យដល់ឃុំ មណ្ឌល សុខភាព សាលាបឋមសិក្សា និងមន្ត្រីស្រុក | 1,324 | មណ្ឌលអភិវឌ្ឍន៍ធនធានមនុស្សខេត្ត |
2.2.1.1.9 | រៀបចំកិច្ចប្រជុំប្រចាំត្រីមាស និងប្រចាំឆមាសស្តីពីការអនុវត្តការងារគណនេយ្យភាពសង្គម | 1,283 | មណ្ឌលអភិវឌ្ឍន៍ធនធានមនុស្សខេត្ត |
2.2.1.1.10 | តាមដាន និងផ្តល់ការគាំទ្រក្រុង ស្រុកក្នុងការអនុវត្តការងារគណនេយ្យភាពសង្គម | 900 | មណ្ឌលអភិវឌ្ឍន៍ធនធានមនុស្សខេត្ត |
2.2.1.1.11 | រៀបចំវគ្គបណ្តុះបណ្តាលស្តីពីកិច្ចដំណើរការនៃការអនុវត្តផែនការគណនេយ្យភាពសង្គម (ការប្រមូលទិន្នន័យនិងការ បោះពុម្ព ការបិទផ្សាយផ្ទាំងកញ្ចប់ព័ត៌មានសម្រាប់ប្រជាពលរដ្ឋ) និងប្រព័ន្ធតាមដាននិងត្រួតពិនិត្យដល់ឃុំ មណ្ឌល សុខភាព និងសាលាបឋមសិក្សា | 15,079 | ក្រុងស្រុក |
2.2.1.1.12 | ប្រមូល បញ្ចូល បោះពុម្ព និងផ្សព្វផ្សាយទិន្នន័យស្តីពីគណនេយ្យភាពសង្គម | 2,906 | ក្រុងស្រុក |
2.2.1.1.13 | រៀបចំកិច្ចប្រជុំប្រចាំត្រីមាស ប្រចាំឆមាស និងប្រចាំឆ្នាំស្តីពីការអនុវត្តការងារគណនេយ្យភាពសង្គម | 9,830 | ក្រុងស្រុក |
2.2.1.1.14 | រៀបចំសិក្ខាសាលាឆ្លុះបញ្ចាំងស្តីពីដំណើរការអនុវត្តសកម្មភាពគណនេយ្យភាពសង្គម (លទ្ធផលJAAP និងផែនការបន្ត) | 7,222 | ក្រុងស្រុក |
2.2.1.1.15 | តាមដានការបិតផ្សាយព័ត៌មានស្តីពីការងារគណនេយ្យភាពសង្គមនៅឃុំ មណ្ឌលសុខភាព និងសាលាបឋមសិក្សា | 2,364 | ក្រុងស្រុក |
3.1.6.1 | ការលើកកម្ពស់ និងការបញ្រ្ជាបយេនឌ័រ និងបរិយាប័ន្ននិងសមធម៌សង្គមនៅរដ្ឋបាលថ្នាក់ក្រោមជាតិ | 15,304 | |
3.1.6.1.12 | ពង្រឹងការអនុវត្តមុខងាររបស់ គ.ក.ស.ក. រាជធានី ខេត្តក្នុងការបញ្រ្ជាបបរិយាប័ន្ន និងសមធម៌សង្គមក្នុងផែនការ គម្រោង និងកម្មវិធីនានាក៏ដូចជាការសម្របសម្រួល និងស្វែងរកការគាំទ្ររបស់រាជធានី ខេត្ត និងស្ថាប័នពាក់ព័ន្ធនានាក្នុងការលើកកម្ពស់សេវាសង្គម | 1,512 | គកសកខេត្ត |
3.1.6.1.13 | ពង្រឹងការអនុវត្តមុខងាររបស់ គ.ក.ស.ក. ក្រុង ស្រុក ខណ្ឌក្នុងការបញ្រ្ជាបបរិយាប័ន្ន និងសមធម៌សង្គមក្នុងផែនការ គម្រោង និងកម្មវិធីនានាក៏ដូចជាការសម្របសម្រួល និងស្វែងរកការគាំទ្ររបស់ក្រុង ស្រុក ខណ្ឌ និងស្ថាប័នពាក់ព័ន្ធនានាក្នុងការលើកកម្ពស់សេវាសង្គម | 7,731 | គកសកក្រុងស្រុក |
3.1.6.1.14 | រៀបចំកិច្ចប្រជុំ និងសិក្ខាសាលានានាជាមួយមន្ទីរ ការិយាល័យ និងអង្គភាពជំនាញ អង្គការមិនមែនរដ្ឋាភិបាល និង អ្នកពាក់ព័ន្ធនានាដើម្បីលើកកម្ពស់សមភាពយេនឌ័រ ការពង្រឹងភាពអង់អាចដល់ស្ត្រី និងបរិយាប័ន្ន និងសមធម៌សង្គម | 718 | មន្ទីរកិច្ចការនារី |
3.1.6.1.15 | អភិវឌ្ឍសមត្ថភាពអ្នកពាក់ព័ន្ធនានាអំពីការវិភាគយេនឌ័រ និងការលើកម្ពស់បរិយាប័ន្ន និងសមធម៌សង្គមនៅថ្នាក់ក្រោម ជាតិ | 3,987 | មន្ទីរកិច្ចការនារី |
3.1.6.1.17 | តាមដាន និងផ្តល់គាំទ្របច្ចេកទេសសកម្មភាពអភិវឌ្ឍន៍សមត្ថភាពនានារបស់រាជធានី ខេត្ត និងក្រុង ស្រុក ខណ្ឌពាក់ ព័ន្ធនឹងការបញ្រ្ជាបយេនឌ័រ ការពង្រឹងភាពអង់អាចរបស់ស្ត្រី និងការលើកកម្ពស់បរិយាប័ន្ន និងសមធម៌សង្គម | 1,356 | មន្ទីរកិច្ចការនារី |
3.2.1.1 | ការលើកកម្ពស់សមត្ថភាពរដ្ឋបាលថ្នាក់ក្រោមជាតិ ដោយប្រើប្រាស់ស្ថាប័នរដ្ឋាភិបាលដែលមានស្រាប់ និងកិច្ចសហការ រវាងស្ថាប័នរដ្ឋ អង្គការសង្គមស៊ីវិល និងវិស័យឯកជននានា | 21,570 | |
3.2.1.1.9 | រៀបចំ និងអនុវត្តផែនការអន្តរាគមន៍ប្រចាំឆ្នាំរបស់រាជធានី ខេត្តក្នុងការអភិវឌ្ឍស្ថាប័ននៅរដ្ឋបាលថ្នាក់ក្រោមជាតិ | 17,216 | មណ្ឌលអភិវឌ្ឍន៍ធនធានមនុស្សខេត្ត |
3.2.1.1.12 | រៀបចំ និងអនុវត្តផែនការអភិវឌ្ឍសមត្ថភាពជាក់លាក់របស់រដ្ឋបាលក្រុង ស្រុក ខណ្ឌ | 4,354 | ក្រុងស្រុក |
5.8.1.1 | ការផ្សព្វផ្សាយ និងការណែនាំសេចក្តីណែនាំបច្ចេកទេសស្តីពីកិច្ចដំណើរការកសាងផែនការអភិវឌ្ឍន៍ និងការកសាងកម្មវិធីវិនិយោគបីឆ្នាំរំកិលរបស់រដ្ឋបាលថ្នាក់ក្រោមជាតិ ស្របតាមប្រភេទថ្នាក់រដ្ឋបាលនីមួយៗ | 6,512 | |
5.8.1.1.4 | រដ្ឋបាលថ្នាក់ក្រោមជាតិរៀបចំវគ្គបណ្តាលសេចក្តីណែនាំបចេ្ចកទេសកសាងផែនការអភិវឌ្ឍន៍ និងកម្មវិធីវិនិយោគបីឆ្នាំរំកិល | 3,012 | មន្ទីរផែនការខេត្ត |
5.8.1.1.12 | ចុះបេសកកម្មតាមដាន និងគាំទ្រស្រុក ណិងឃុំគោលដៅក្នុងការបញ្រ្ជាបភាពបន្ស៊ាំទៅនឹងការប្រែប្រួលអាកាសធាតុក្នុង ផែនការ និងកម្មវិធីវិនិយោគឃុំ សង្កាត់ និងការអនុវត្តគម្រោង | 1,820 | ទីចាត់ការផែនការនិងវិនិយោគខេត្ត |
5.8.1.1.13 | ចុះបេសកកម្មតាមដាន និងគាំទ្រឃុំគោលដៅក្នុងការបញ្រ្ជាបភាពស៊ាំទៅនឹងការប្រែប្រួលអាកាសធាតុក្នុងផែនការ និងកម្មវិធីវិនិយោគឃុំ សង្កាត់ និងការអនុវត្តគម្រោង | 1,680 | ក្រុងស្រុក |
5.8.4.1 | ការពង្រឹងការផ្សព្វផ្សាយ និងការប្រើប្រាស់ទិន្នន័យមូលដ្ឋាន និងឯកសារ ពាក់ព័ន្ធរួមបញ្ចូលទាំងទិន្នន័យអំពីសេវាសង្គម ការប្រែប្រួលអាកាសធាតុ សម្រាប់កិច្ចដំណើរការនៃការកសាងផែនការរបស់រដ្ឋបាលថ្នាក់ក្រោមជាតិ | 4,308 | |
5.8.4.1.6 | រៀបចំ ធ្វើបច្ចុប្បន្នភាព និងផលិតទិន្នន័យ ប្រព័ន្ធទិន្នន័យមូលដ្ឋានភូមិ និងឯកសារនានាសម្រាប់ការកសាងផែនការ | 1,797 | មន្ទីរផែនការខេត្ត |
5.8.4.1.7 | រៀបចំការអភិវឌ្ឍសមត្ថភាព និងការផ្សព្វផ្សាយនានាស្តីពីទិន្នន័យ ប្រព័ន្ធទិន្នន័យមូលដ្ឋាន ឯកសារ ព័ត៌មាន និងឧបករណ៍នានាសម្រាប់ការកសាងផែនការ | 1,758 | មន្ទីរផែនការខេត្ត |
5.8.4.1.8 | រៀបចំទិន្នន័យ និងឯកសារនានាសម្រាប់គាំទ្រការរៀបចំសិក្ខាសាលា និងវេទិកានានាស្តីពីការកសាងផែនការរបស់ រដ្ឋបាលថ្នាក់ក្រោមជាតិ | 753 | មន្ទីរផែនការខេត្ត |
9.1.1.1 | ការជ្រើសរើស និងការបំពេញភារកិច្ចរបស់បុគ្គលិកកិច្ចសន្យា និងទីប្រឹក្សាដោយមានការយកចិត្តទុកដាក់លើសមធម៌យេនឌ័រក្នុងការបំពេញការងារ | 129,360 | |
9.1.1.1.2 | ទីបឹ្រក្សា និងបុគ្គលិកកិច្ចសន្យាថ្នាក់រាជធានី ខេត្តត្រូវបានជ្រើសរើស និងគ្រប់គ្រងប្រកបដោយប្រសិទ្ធភាព | 70,800 | ទីចាត់ការគ្រប់គ្រងធនធានមនុស្ស |
9.1.1.1.3 | ទីបឹ្រក្សា និងបុគ្គលិកកិច្ចសន្យាថ្នាក់ក្រុង ស្រុក ខណ្ឌត្រូវបានជ្រើសរើស និងគ្រប់គ្រងប្រកបដោយប្រសិទ្ធភាព | 58,560 | ក្រុងស្រុក |
9.1.1.3 | ចំណាយប្រតិបត្តិសម្រាប់ការការគាំទ្រ និងការសម្របសម្រួលកម្មវិធី | 77,880 | |
9.1.1.3.2 | គាំទ្រការចំណាយប្រតិបត្តិការជាប្រចាំសម្រាប់ថ្នាក់រាជធានី ខេត្ត | 28,577 | មណ្ឌលអភិវឌ្ឍន៍ធនធានមនុស្សខេត្ត |
9.1.1.3.3 | គាំទ្រការចំណាយប្រតិបត្តិការជាប្រចាំសម្រាប់ថ្នាក់ក្រុង ស្រុក ខណ្ឌ | 49,303 | ក្រុងស្រុក |
សរុប | 297,734 |