រដ្ឋបាលខេត្តកំពង់ធំ៖ ក្នុងឱកាសទទួលជួបពិភាក្សាការងារជាមួយក្រុមហ៊ុនសម្ព័ន្ធកៅស៊ូវៀតណាមក្នុងខេត្តកំពង់ធំ នារសៀលថ្ងៃចន្ទ ៣កើត ខែពិសាខ ឆ្នាំកុរ ឯកស័ក ព.ស២៥៦២ ត្រូវនឹងថ្ងៃទី០៦ ខែឧសភា ឆ្នាំ២០១៩នេះ ឯកឧត្ដម សុខ លូ អភិបាលខេត្តកំពង់ធំ បានស្នើក្រុមហ៊ុនសម្ព័ន្ធកៅស៊ូវៀតណាមក្នុងខេត្តកំពង់ធំទាំងអស់ បន្តយកចិត្តទុកដាក់បង្កើតកន្លែងសម្រាប់ព្យាបាលជំងឺដល់បងប្អូនកម្មករនៅក្នុងក្រុមហ៊ុនរបស់ខ្លួន ឱ្យត្រូវតាមបទដ្ឋានបច្ចេកទេសដែលមានចែងនៅក្នុងកិច្ចសន្យាការងារ ដែលបានចុះកិច្ចព្រមព្រាងជាមួយរាជរដ្ឋាភិបាលកម្ពុជា។
ជាមួយគ្នានេះដែរឯកឧត្ដមក៏បានធ្វើការដោះស្រាយ ឆ្លើយតបនឹងកង្វល់មួយចំនួន ដែលក្រុមហ៊ុនសម្ព័ន្ធកៅស៊ូវៀតណាមបានលើកជាសំណូមពរ មករដ្ឋបាលខេត្តឱ្យជួយសម្របសម្រួល និងដោះស្រាយ មានដូចជា បញ្ហាកម្មករភាគច្រើនដែលថាមិនមានអត្តសញ្ញាណប័ណ្ណ បញ្ហាកង្វះខាតកម្មករ និង បញ្ហាគ្រឿងញាណជាដើម។ ឯកឧត្តមក៏បានស្នើដល់ក្រុមហ៊ុនសហការជាមួយអាជ្ញាធរ និងមន្ទីរជំនាញពាក់ព័ន្ធនានា រួមគ្នាដោះស្រាយរាល់បញ្ហាដែលកើតមានឡើងនៅតាមក្រុមហ៊ុន ឱ្យកាន់តែមានប្រសិទ្ធភាពខ្ពស់៕
