រដ្ឋបាលខេត្តកំពង់ធំ៖ នៅក្នុងពិធីលែងត្រីពូជ ចូលក្នុងអាងទឹកស្ទឹងជីនិត ស្រុកសន្ទុក ឯកឧត្តម សុខ លូ អភិបាលខេត្តកំពង់ធំបានលើកឡើងថា ការប្រារព្ធពិធីលែងកូនត្រីពូជនេះក្នុងន័យបំផុសមហាជន ឲ្យមានស្មារតីចូលរួមការពារ អភិរក្ស និងអភិវឌ្ឍធនធានជលផល ឲ្យបានយល់ជ្រួតជ្រាបដល់គ្រប់ស្រទាប់ប្រជាពលរដ្ឋ មន្ត្រីរាជការ ស្ថាប័នរដ្ឋ និងឯកជន ជាពិសេសកូនចៅជំនាន់ក្រោយសំដៅធានាដល់ការគ្រប់គ្រង និងការប្រើប្រាស់ធនធានជលផលឲ្យមាននិរន្តរភាពតាមយុទ្ធសាស្ត្រកំណែទម្រង់វិស័យជលផលដ៏ស៊ីជម្រៅរបស់រាជរដ្ឋាភិបាលកម្ពុជា។
ឯកឧត្តមបន្ថែមទៀតថា ក្នុងនាមជាមន្រ្តី ខណ្ឌជលផលខេត្ត និងអាជ្ញាធរពាក់ព័ន្ធត្រូវមានភារកិច្ចធ្វើការផ្សព្វផ្សាយច្បាប់ស្តីពីជលផល លិខិតបទដ្ឋានគតិយុត្តិនានា ជូនដល់ប្រជាពលរដ្ឋឲ្យបានទូលំទូលាយ ត្រូវធ្វើការបង្កា្របបទល្មើសនេសាទឲ្យមានប្រសិទ្ធិភាព ដោយធ្វើការសហការណ៍ជាមួយអាជ្ញាធរមូលដ្ឋាន កងកម្លាំង និងមន្ទីរពាក់ព័ន្ធ។ ធ្វើការបំផុសការអភិវឌ្ឍ វារីវប្បកម្ម ពង្រឹងសមត្ថភាពដល់មន្រ្តីជំនាញ សហគមន៍នេសាទដែលបានបង្កើតរួចឲ្យបានរឹងមាំ។ រៀបចំការបោះបង្គោលព្រំកន្លែងអភិរក្ស និងកន្លែងនេសាទគ្រួសារឲ្យបានច្បាស់លាស់ ត្រូវចាត់វិធានការ លើជនល្មើសបំផ្លាញព្រៃលិចទឹក និងរក្សាព្រៃលិចទឹកឲ្យបានគង់វង្ស ជាពិសេសគឺធ្វើការទប់ស្កាត់ និងអំពាវនាវដល់បងប្អូនកុំឲ្យ ធ្វើការនេសាទខុសច្បាប់ដោយប្រើឧបករណ៍ឆក់ និងស្បៃមុងដែលនាំឲ្យ វិនាសពូជត្រីទាំងស្រុងនាពេលអនាគត។
ឆ្លៀតក្នុងឱកាសនេះដែរ ឯកឧត្តមក៏បានអំពាវនាវដល់បងប្អូនទាំងអស់ ចូលរួមគោរពច្បាប់ចរាចរណ៍ រាល់ការធ្វើដំណើរត្រូវពាក់មួកសុវត្ថិភាព និងបើកដោយប្រុងប្រយ័ត្នខ្ពស់ ជាពិសេសត្រូវនៅឲ្យឆ្ងាយពីគ្រឿងញៀនទាំងអស់គ្នា។
លោក ប៉ែន វណ្ណរិទ្ធ នាយខណ្ឌរដ្ឋបាលជលផល បានអានរបាយការណ៍អំពីស្ថានភាព អាងទំនប់ទឹក១ មករា និងបានបញ្ជាក់ថា ពិធីនេះ ជាលើកទី១៧ហើយ ហើយថ្ងៃនេះយើងនឹងរៀបចំពិធីប្រលែងកូនត្រីពូជចំនួន ៥ម៉ឺនក្បាល ដោយក្នុងនោះកូនត្រីឆ្ពិន៤៥ពាន់ក្បាល និងកូនត្រីប្រលូង ៥ពាន់ក្បាល និងត្រីមេពូជ ចំនួន១០០គីឡូក្រាម មានត្រី ក្រាញ់ ត្រីផ្ទក់ត្រីអណ្ដែង និង អន្ទង់។
ពិធីនេះត្រូវបានប្រារព្ធឡើងនៅព្រឹកថ្ងៃទី៦ ខែសីហា ឆ្នាំ២០១៩ ក្រោមអធិបតីភាព ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តកំពង់ធំ នៅអាងទំនប់ទឹក១មករា ស្ថិតនៅភូមិស្នោ ឃុំកំពង់ថ្ម ស្រុកសន្ទុក ខេត្តកំពង់ធំ ដោយមានការអញ្ជើញចូលរួមពីឯកឧត្តម លោកជំទាវក្រុមប្រឹក្សាខេត្ត ឯកឧត្តមអភិបាលរងខេត្ត លោក លោកស្រី ប្រធានមន្ទីរអង្គភាពជុំវិញខេត្ត ព្រមទាំងប្រជាពលរដ្ឋ និងសិស្សានុសិស្ស ប្រមាណ ៥០០នាក់៕
