(រដ្ឋបាលខេត្តកំពង់ធំ)៖ ឯកឧត្តម សៅ សុភាព រដ្ឋលេខាធិការក្រសួងបរិស្ថាន ឯកឧត្តម សុខ លូ អភិបាលខេត្តកំពង់ធំ និងលោក ម៉ាធ្យូ អែដវុធសិន ប្រធានគម្រោងព្រៃឡង់បៃតងដែលបានទទួលជំនួយពី ពលរដ្ឋអាមេរិក បានអញ្ជើញជាអធិបតីក្នុងពិធីចុះបញ្ជីដីរដ្ឋនៅដែនជម្រកសត្វព្រៃ “ព្រៃឡង់” និងតាមបណ្ដា តំបន់ការពារធម្មជាតិ ភូមិសាស្ត្រខេត្តកំពង់ធំព្រឹកថ្ងៃទី ២៦ ខែមិថុនាឆ្នាំ ២០២០ នៅសាលាខេត្តកំពង់ធំ។
ថ្លែងនៅក្នុងកម្មវិធីនេះឯកឧត្តម សុខ លូ អភិបាលខេត្តកំពង់ធំ បានលើកឡើងពីការបោះបង្គោលព្រំរៀបចំផែនការនិងបញ្ជីដីរដ្ឋ នៅក្នុងតំបន់ការពារធម្មជាតិនេះឲ្យបានរលូន មានប្រសិទ្ធភាពនិងកាត់បន្ថយទំនាស់ដីធ្លី និងការប្រើប្រាស់ធនធានធម្មជាតិនៅក្នុងតំបន់ការពារធម្មជាតិឲ្យលើមានកម្រិតអប្បបរមា។ ក្រុមការងារត្រូវស្វែងយល់ឲ្យបានច្បាស់ អំពីចំនួនតំបន់ដែលត្រូវបែងចែកនៅក្នុងតំបន់ការពារធម្មជាតិនីមួយៗ និងគោលបំណងគ្រប់គ្រងនៅតំបន់មួយដំណើរការនៃការបែងចែកតំបន់ និងវិធីសាស្ត្រសម្របសម្រួល។
ក្រៅពីនេះការបែងចែកតំបន់ដែលត្រូវបានគិតគូរយ៉ាងល្អិតល្អន់អំពីតម្លៃសេដ្ឋកិច្ចសង្គមនិងវប្បធម៌នៃតំបន់នីមួយៗដើម្បីបម្រើសេចក្តីត្រូវការនៃការរស់នៅរបស់មនុស្សជាតិផងដែរ។ ឆ្លៀតក្នុងឱកាសនេះផងដែរឯកឧត្តម សៅ សុភាព រដ្ឋលេខាធិការក្រសួងបរិស្ថាន បានមានប្រសាសន៍ពីការស្វែងយល់ឲ្យមានចំណេះដឹងបន្ថែម ស្ដីពីច្បាប់ អនុក្រឹត្យប្រការ និងលិខិតបទដ្ឋានពាក់ព័ន្ធមួយចំនួនដូចជា ច្បាប់ស្ដីពីតំបន់ការពារធម្មជាតិ ច្បាប់ស្តីពីព្រៃឈើ ច្បាប់ភូមិបាល អនុក្រឹត្យដីពីនីតិវិធីនៃការចុះបញ្ជីដីសហគមន៍ជនជាតិដើមភាគតិច គោលការណ៍ណែនាំស្ដីពីការបង្កើតសហគមន៍តំបន់ការពារធម្មជាតិ។
ឯកឧត្តម សៅ សុភាព ក៏បានបន្តទៀតថា ការរាំងស្ទះនៃការចុះធ្វើការនៅតំបន់ការពារធម្មជាតិ ប្រជាពលរដ្ឋមួយចំនួននៅតែលបលួចចូលកាប់ព្រៃឈើធ្វើចម្ការ ក្នុងសហគមន៍និងតំបន់ការពារ។ មានភូមិដីចំការ និងស្រែមួយចំនួនស្ថិតក្នុងតំបន់ការពារ និងក្នុងសហគមន៍តំបន់ការពារធម្មជាតិ។មានការនេសាទខុសច្បាប់នៅតែលួចធ្វើសកម្មភាព។
ជាចុងក្រោយឯកឧត្តម សៅ សុភាព ក៏បានផ្ដាំផ្ញើបន្តការផ្សព្វផ្សាយច្បាប់ និងពង្រឹងការនាំច្បាប់ស្ដីពីតំបន់ការពារធម្មជាតិ។ចុះល្បាតឃ្លាំងមើលទប់ស្កាត់ ការរំលោភដីធ្លីក្នុងព្រៃឡង់ និងជួយអន្តរាគមន៍បង្ក្រាបបទល្មើសផ្សេងៗ។ ទំនាក់ទំនងជិតស្និទ្ធជាមួយអង្គការនានាដើម្បីគាំទ្រដល់សកម្មភាពទប់ស្កាត់បង្ក្រាបបទល្មើសនិងកែលំអរមុខរបរចិញ្ចឹមជីវិតរបស់ប្រជាពលរដ្ឋដែលរស់នៅក្បែរជាប់និងក្នុងតំបន់ការពារធម្មជាតិនេះ។
