ព្រឹកថ្ងៃទី ២២ ខែមិថុនា ឆ្នាំ២០១៧ ឯកឧត្តម ញឹក បានខេង អភិបាលរងខេត្ត និងជាតំណាងដ៏ខ្ពស់ខ្ពស់របស់ ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ បានចូលរួមជាអធិបតី ក្នុងពិធីបើកសិក្ខាសាលាស្តីពី “ការកសាងសមត្ថភាព លើការរៀបចំផែនការ រដ្ឋាភិបាលអេឡិកត្រូនិក” ។ ឯកឧត្តមបានលើកឡើងថា រដ្ឋាភិបាលនានាលើពិភពលោកកំពុងប្រឈមមុខនឹងបញ្ហាក្នុងការផ្ដល់ និងទ្រទ្រង់គុណភាពសេវាសាធារណៈជូនប្រជាពលរដ្ឋរបស់ខ្លួន និងដើម្បីជម្រុញកំណើនសេដ្ឋកិច្ច ។ ការវិនិយោគ និងការអនុវត្តរដ្ឋាភិបាលអេឡិកត្រូនិកបានបង្ហាញថា គឺជាយន្តការដ៏ត្រឹមត្រូវ ក្នុងការបង្កើនគុណភាពលើការផ្ដល់សេវាសាធារណៈ ។
នៅក្នុងសិក្ខាសាលាស្ដីពី “ការកសាងសមត្ថភាពលើការរៀបចំផែនការរដ្ឋាភិបាលអេឡិកត្រូនិក” រយៈពេល ២ ថ្ងៃនេះ សិក្ខាកាមនឹងសិក្សាអំពីទិដ្ឋភាពស្នូលនៃមូលដ្ឋានរបស់រដ្ឋាភិបាលអេឡិកត្រូនិក, និន្នាការបច្ចេកវិទ្យាគន្លឹះដែលជះឥទ្ធិពលដល់រដ្ឋាភិបាលអេឡិកត្រូនិក យុទ្ធសាស្រ្តរដ្ឋាភិបាលអេឡិកត្រូនិករបស់អន្តរជាតិ ការតម្រង់យុទ្ធសាស្រ្តរដ្ឋាភិបាលអេឡិកត្រូនិកជាមួយនឹងអាទិភាពជាតិ ការយល់ដឹងអំពីជំហានក្នុងការធ្វើផែនការរសកម្មភាពអភិវឌ្ឍរដ្ឋាភិបាលអេឡិកត្រូនិក និងការអនុវត្តគម្រោង ។
សិក្ខាកាមដែលត្រូវអញ្ជើញឲ្យចូលរួមសិក្ខាសាលានេះ គឺជាមន្ត្រីគ្រប់គ្រងសេវាសាធារណៈ មកពីមន្ទីរអាទិភាពនានាក្នុងខេត្ត រួមទាំងមន្ត្រីសាលាខេត្តផងដែរ ។ សិក្ខាកាម ត្រូវបានរៀបចំជាក្រុមដែលមានសមាជិកពី ៥ទៅ៦នាក់ ដើម្បីធ្វើការពិភាក្សាលើបញ្ហាប្រឈម នៃការផ្តល់សេវាសាធារណៈ ការប្រើប្រាស់បច្ចេកវិទ្យាសម្រាប់ស្ថាប័ន និង ការកំណត់ព័ត៌មានអំពីសេវាដែលមន្ទីរនីមួយៗកំពុងផ្តល់ជូនប្រជាពលរដ្ឋ ។ រាល់លទ្ធផលនៃការពិភាក្សានេះ នឹងប្រើប្រាស់ជាធាតុចូលក្នុងការរៀបចំផែនការសកម្មភាពទំនើបកម្មគេហទំព័រសាលាខេត្តកំពង់ធំ ។
ឆ្លៀតឱកាសនេះ ឯកឧត្តម ញឹក បានខេង បានជម្រាបដល់ លោក លោកស្រី ជ្រាបថា បន្ទាប់ពីសិក្ខាសាលារយៈពេលពីរថ្ងៃនេះ ក្រសួងប្រៃសណីយ៍ និងទូរគមនាគមន៍ នឹងបន្តសហការក្នុងការគាំទ្ររាល់ការងារបច្ចេកទេសក្នុងការរៀបចំ និងអនុវត្តផែនការសកម្មភាពទំនើបកម្មគេហទំព័រសាលាខេត្តកំពង់ធំ ហើយមន្ត្រីដែលចូលរួមក្នុងសិក្ខាសាលានេះផងដែរ នឹងក្លាយជាមន្ត្រីបង្គោលតំណាងឲ្យមន្ទីរស្ថាប័ននៅក្នុងការចូលរួមផ្តល់ព័ត៌មានបង្កើតសេវារបស់ស្ថាប័នខ្លួន នឹងដាក់ដំណើរការសេវាទាំងអស់នោះរួមគ្នាតែមួយ ។
ជាកិច្ចបញ្ចប់ ឯកឧត្តម បានថ្លែងអំណរគុណយ៉ាងជ្រាលជ្រៅដល់នាយកដ្ឋានរដ្ឋាភិបាលអេឡិកត្រូនិកនៃក្រសួងប្រៃសណីយ៍ និងទូរគមនាគមន៍ ក្រុមការងារគេហទំព័រសាលាខេត្តកំពង់ធំ និងមន្ត្រីពាក់ព័ន្ធនានា ដែលបានចូលរួមយ៉ាងសកម្មក្នុងការរៀបចំសិក្ខាសាលានេះ ៕
