(រដ្ឋបាលខេត្តកំពង់ធំ)៖ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានជំរុញដល់អាជ្ញាធរ និងមន្ត្រីជំនាញ ខិតខំពង្រឹងយន្តការតាមដានរាល់បទល្មើសព្រៃឈើ បទល្មើសជលផល និងការកាប់រុករានយកដីព្រៃ ដោយល្មើសច្បាប់គ្រប់រូបភាព ទប់ស្កាត់ភ្លើងឆេះព្រៃ ឬព្រៃលិចទឹក ព្រមទាំងដាំដុះព្រៃឈើឡើងវិញ ជាពិសេសគ្រប់គ្រងធនធានធម្មជាតិ ទឹក ដី ព្រៃឈើ ប្រកបដោយប្រសិទ្ធភាព ដើម្បីបង្កើននូវប្រសិទ្ធភាព ប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរាំងស្ងួត ក្នុងឆ្នាំ២០២២នេះ។
ការលើកឡើងនេះ ឯកឧត្តម រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ អញ្ជើញជាអធិបតីថ្លែងក្នុងពិធីទិវាពិភពលោកប្រយុទ្ធប្រឆាំងនឹងការធ្លាក់ចុះគុណភាពដី និងគ្រោះរាំងស្ងួតឆ្នាំ២០២២ ដោយមានការអញ្ជើញចូលរួមអមដំណើរពីឯកឧត្តម ងួន រតនៈ អភិបាលខេត្តកំពង់ធំ ឯកឧត្តម លោកជំទាវ ថ្នាក់ដឹកនាំមន្ទីរអង្គភាពជុំវិញខេត្ត និងបងប្អូនប្រជាពលរដ្ឋប្រមាណជាង៣០០នាក់ ស្ថិតនៅសហគមន៍ព្រៃឈើឃ្មុំស្រករថ្លុកឬស្សី ភូមិត្រពាំងថ្ម ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ នាព្រឹកថ្ងៃទី១៧ ខែមិថុនា ឆ្នាំ២០២២។
បន្ទាប់ពីឯកឧត្តម ងួន រតនៈ អភិបាលខេត្តកំពង់ធំ ឡើងថ្លែងរបាយការណ៍ស្វាគមន៍ អំពីស្ថានភាពភូមិសាស្ត្រនៅក្នុងសហគមន៍ និងនៅក្នុងខេត្តកំពង់ធំរួចមក ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានក្រើនរំលឹកដល់មន្ត្រីមន្ទីរកសិកម្ម រុក្ខាប្រមាញ់ និងនេសាទខេត្ត និងអ្នកពាក់ព័ន្ធទាំងអស់ ត្រូវអនុវត្តឱ្យបានខ្ជាប់ខ្ជួននូវកម្មវិធីទាំង៥ ដែលមានចែងច្បាស់នៅក្នុងកម្មវិធីសកម្មភាពជាតិ ដើម្បីប្រយុទ្ធប្រឆាំង នឹងការធ្លាក់ចុះគុណភាពដី ក្នុងនោះរួមមាន៖ ១.ការប្រែប្រួលអាកាសធាតុ ២.ការធ្វើសមាហរណកម្មផែនការប្រើប្រាស់ដីសម្រាប់ធានាការគ្រប់គ្រងដីប្រកបដោយចីរភាព ៣. ការគាំទ្រចំពោះគោលនយោបាយក្នុងការបញ្ចូលការគ្រប់គ្រងដី ការប្រើប្រាស់ដីកសិកម្ម និងកំណត់តំបន់ដាំដុះដំណាំ ៤. ការអភិវឌ្ឍធនធានមនុស្ស សម្រាប់ការគ្រប់គ្រងដីកសិកម្មប្រកបដោយគុណភាព ៥.ការកៀរគរធនធានថវិកា ដើម្បីគាំទ្រថវិកាដល់សកម្មភាពអាទិភាពនានា ពង្រឹងយន្តការតាមដានរាល់បទល្មើសព្រៃឈើ បទល្មើសជលផល និងការកាប់រុករានយកដីព្រៃ ដោយល្មើសច្បាប់គ្រប់រូបភាព ជាពិសេសបង្កើននូវប្រសិទ្ធភាព និងការទប់ស្កាត់ភ្លើងឆេះព្រៃ ឬព្រៃលិចទឹក ព្រមទាំងជំរុញការដាំដុះព្រៃឈើការគ្រប់គ្រងធនធានធម្មជាតិទឹកដីព្រៃឈើប្រកបដោយប្រសិទ្ធភាព។
ជាចុងក្រោយឯកឧត្តម វេង សាខុន ក៏បានលើកទឹកចិត្តដល់បងប្អូនប្រជាពលរដ្ឋនៅក្នុងមូលដ្ឋានត្រូវ គឺរួមគ្នាប្រយុទ្ធប្រឆាំង នឹងគ្រោះរាំងស្ងួតដែលផ្សារភ្ជាប់ទៅនឹងគោលដៅអភិវឌ្ឍរបស់មូលដ្ឋាន ដើម្បីឆ្លើយតបទៅនឹងការយកចិត្តទុកដាក់របស់សម្ដេចតេជោ ហ៊ុន សែន ដែលបានលើកឡើងថា ទុក្ខកង្វល់របស់ប្រជាពលរដ្ឋខ្មែរ គឺជាទុក្ខកង្វល់របស់ប្រមុខរាជរដ្ឋាភិបាល ហើយសេដ្ឋកិច្ចរបស់ប្រទេសជាតិ មិនអាចអភិវឌ្ឍបានទេប្រសិនបើសុខមាលភាពរបស់ប្រជាពលរដ្ឋមិនបានល្អប្រសើរ។
