(រដ្ឋបាលខេត្តកំពង់ធំ)៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញប្រារព្ធពិធីក្រុងពាលី សម្ពោធស្ពានសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន (សំពៅត្រៃលោកត្រៃលក្ខណ៍) ឆ្លងស្ទឹងសែន ដែលតភ្ជាប់ពីឃុំត្បូងក្រពើ ស្រុកសន្ទុក ទៅឃុំព្រៃគុយ ស្រុកកំពង់ស្វាយ ខេត្តកំពង់ធំ ដោយមានការអញ្ជើញចូលរួមពីឯកឧត្តម ងួន រតនៈ អភិបាលខេត្តកំពង់ធំ និងលោកជំទាវ ព្រមទាំងថ្នាក់ដឹកនាំជាច្រើនរូប នារសៀលថ្ងៃទី២៥ ខែមីនា ឆ្នាំ២០២៣ ។
តាមប្រពៃណីព្រះពុទ្ធសាសនា មុននឹងមានការសាងសង់សំណង់អ្វីមួយ ឬសម្ពោធសមិទ្ធផលណាមួយដែលទើបបានសាងសង់រួច គេតែងប្រារព្ធពិធីសែនក្រុងពាលីសុំម្ចាស់ទឹកម្ចាស់ដី និងជូនដំណឹងដល់អ្នកថែរក្សាទឹកដីនោះសុំជួយបីបាច់ថែរក្សាឲ្យដំណើរការនៃការសាងសង់នោះ សម្រេចបានជោគជ័យប្រកបដោយសុវត្ថិភាព និងរីកចម្រើនជារៀងរហូតទៅ។ ចំណែកឯថ្ងៃស្អែក ស្ពាននេះ នឹងត្រូវសម្ពោធដាក់ឲ្យដំណើរការជាផ្លូវការហើយ ។