(រដ្ឋបាលខេត្តកំពង់ធំ)៖ ក្រុមប្រឹក្សាខេត្តកំពង់ធំ បើកកិច្ចប្រជុំសាមញ្ញលើកទី៥១ អាណត្តិទី៣ ដើម្បីពិនិត្យពិភាក្សាកែលម្អរបាយការណ៍ និងកំណត់ហេតុប្រចាំខែ អោយមានភាពត្រឹមត្រូវ មានអត្ថន័យច្បាស់លាស់ ព្រមទាំងពិនិត្យលទ្ធផលការងារដែលបានអនុវត្តកន្លងមក និងលើកឡើងអំពីបញ្ហាប្រឈមនានា ក្នុងភូមិសាស្ត្រខេត្តកំពង់ធំ ដើម្បីរួមគ្នាស្វែងរកដំណោះស្រាយឲ្យបានឆាប់រហ័ស និងទាន់ពេលវេលា។
កិច្ចប្រជុំនេះ ប្រព្រឹត្តិទៅនៅថ្ងៃទី០៧ ខែកញ្ញា ឆ្នាំ២០២៣ ក្រោមអធិបតីភាព ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម ងួន រតនៈ អភិបាលខេត្តកំពង់ធំ ដែលមានការអញ្ជើញចូលរួមពី ឯកឧត្តម លោកជំទាវគណៈអភិបាលខេត្ត លោកនាយក នាយករងរដ្ឋបាលខេត្ត ថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ និងមន្ត្រីពាក់ព័ន្ធជាច្រើនរូប នៅសាលាប្រជុំសាលាខេត្តកំពង់ធំ ។
ជាមួយគ្នានោះដែរ របៀបវារៈនៃកិច្ចប្រជុំនាពេលនេះ រួមមាន ៖
១- ពិនិត្យ និងអនុម័ត កំណត់ហេតុនៃកិច្ចប្រជុំសាមញ្ញលើកទី៥០ របស់ក្រុមប្រឹក្សាខេត្ត
២- ពិនិត្យ និងអនុម័ត របាយការណ៍ប្រចាំខែ សីហា ឆ្នាំ២០២៣ របស់រដ្ឋបាលខេត្ត
៣- ពិនិត្យ និងអនុម័ត សេចក្តីព្រាង សេចក្ដីសម្រេចស្ដីពី ដំណើរការវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកំពង់ធំ
៤- ពិនិត្យ និងអនុម័ត គម្រោងចំណូល ចំណាយថវិកា របស់រដ្ឋបាលខេត្តកំពង់ធំ សម្រាប់ការគ្រប់គ្រងឆ្នាំ២០២៤
៥- បញ្ហាផ្សេងៗ
របៀបវារៈខាងលើនេះត្រូវបានដាក់ជូនអង្គប្រជុំពិនិត្យ និងពិភាក្សាយោបល់រួមគ្នារួចមក ដោយអនុម័តយល់ព្រមពីប្រធាន និងសមាជិកក្រុមប្រឹក្សាខេត្តដោយការលើកដៃ។
