(រដ្ឋបាលខេត្តកំពង់ធំ)៖ ឯកឧត្តម ញឹក បានខេង អភិបាលរងខេត្តកំពង់ធំ ដឹកនាំកិច្ចប្រជុំពង្រឹងការរៀបចំរបាយការណ៍ការងាររបស់រដ្ឋបាលខេត្ត ដើម្បីពង្រឹងប្រសិទ្ធភាពការងារឲ្យកាន់តែល្អប្រសើរ នារសៀលថ្ងៃទី២០ ខែកញ្ញា ឆ្នាំ២០២៣ នៅសាលាខេត្តកំពង់ធំ។
ថ្លែងនៅក្នុងកិច្ចប្រជុំនោះដែរ ឯកឧត្តម ញឹក បានខេង ថ្លែងថា ការជួបជុំគ្នាថ្ងៃនេះ គឺផ្សព្វផ្សាយអំពីការរៀបចំធ្វើរបាយការណ៍ទម្រង់ថ្មីរបស់មន្ទីរអង្គភាពជុំវិញខេត្ត ក្នុងការកត់ត្រានូវវឌ្ឍនភាព និងសមិទ្ធផលការងារដែលសម្រេចបាន បញ្ហាប្រឈម ដំណោះស្រាយ និងទិសដៅការងារសម្រាប់អនុវត្តបន្តក្នុង ក្របខ័ណ្ឌដែនសមត្ថកិច្ចរបស់ខ្លួន ស្របតាមមុខងារនិងតួនាទី ភារកិច្ចដែលច្បាប់ និងលិខិត បទដ្ឋានគតិយុត្តនានាបានកំណត់។
ឯកឧត្តម ញឹក បានខេង ក្រើនរំលឹកដល់ស្ថាប័ន មន្ទីរអង្គភាព ក៏ដូចជាទីចាត់ការ ក្រោមចំណុះឲ្យរដ្ឋបាលខេត្ត សូមជួយផ្តល់របាយការណ៍ប្រចាំខែ របាយការណ៍ប្រចាំឆមាស និងរបាយការណ៍ប្រចាំឆ្នាំ ឱ្យបានទៀងទាត់ និងសមស្របទៅតាមទម្រង់គំរូ ដូចបានភ្ជាប់នៅក្នុងឧបសម្ព័ន្ធ និងតាមពេលវេលាដែល បានកំណត់។ ដើម្បីធានាឱ្យការបូកសរុបរបាយការណ៍រដ្ឋបាលខេត្តប្រកបដោយគុណភាព និងប្រសិទ្ធភាព។
