(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ នាព្រឹកថ្ងៃទី១១ ខែមករា ឆ្នាំ២០២៤ បានអញ្ជើញដឹកនាំកិច្ចប្រជុំគណៈកម្មាធិការសម្របសម្រួលបច្ចេកទេស ដើម្បីពិនិត្យ និងផ្តល់យោបល់លើសេចក្តីព្រាងកម្មវិធីវិនិយោគបីឆ្នាំរំកិល២០២៤-២០២៦ នៅសាលប្រជុំសាលាខេត្តកំពង់ធំ។
នៅក្នុងកិច្ចប្រជុំ ឯកឧត្តម ងួន រតនៈ ថ្លែងថា កិច្ចប្រជុំនៅថ្ងៃនេះ គឺជាការអនុវត្តតួនាទី និងការទទួលខុសត្រូវរបស់គណៈកម្មាធិការសម្របសម្រួលបច្ចេកទេស ដើម្បីពិនិត្យ និងផ្តល់យោបល់លើសេចក្តីព្រាងកម្មវិធីវិនិយោគបីឆ្នាំរំកិល២០២៤-២០២៦ ឲ្យបានគ្រប់ជ្រុងជ្រោយមុនដាក់ឆ្លងក្រុមប្រឹក្សា ដើម្បីពិនិត្យ និងអនុម័ត។
ឆ្លៀតក្នុងឧកាសនេះ ឯកឧត្តម អភិបាលខេត្តកំពង់ធំ បានស្នើដល់ថ្នាក់ដឹកនាំស្ថាប័ន អង្គភាពជំនាញ និងមន្ត្រីជំនាញពាក់ព័ន្ធកិច្ចការងារនេះ ដែលជាអ្នកទទួលខុសត្រូវ សូមយកចិត្តទុកដាក់ពិនិត្យឡើងវិញ នូវភាពត្រឹមត្រូវនៃសេចក្តីព្រាងដែលបានផ្តល់ជូននាពេលនេះ ដើម្បីឲ្យសេចក្តីព្រាងកម្មវិធីវិនិយោគបីឆ្នាំរំកិល ២០២៤-២០២៦ នឹងត្រូវបានពិនិត្យ កែសម្រួលកាន់តែល្អថែមទៀតប្រកបដោយការទទួលខុសត្រូវខ្ពស់។
ឯកឧត្តម ងួន រតនៈ បន្ថែមទៀតថា ដោយផ្អែកលើយុទ្ធសាស្ត្រចតុកោណដែលបាននឹងកំពុងអនុវត្តរបស់រាជរដ្ឋាភិបាលនីតិកាលទី៧នៃរដ្ឋសភា បានកំណត់យុទ្ធសាស្ត្របញ្ចកោណដំណាក់កាលទី១ សម្រាប់អនុវត្ត ដោយផ្តោតលើបាវចនា៥ គឺ កំណើន ការងារ សមធម៌ ប្រសិទ្ធភាព និងចីរភាព ក្នុងនោះគន្លឹះអាទិភាព៥ ដែលត្រូវអភិវឌ្ឍគឺ មនុស្ស ផ្លូវ ទឹក ភ្លើង និងបច្ចេកវិទ្យា។ ហើយដើម្បីសម្រេចបានយុទ្ធសាស្ត្របញ្ចកោណដំណាក់កាលទី១ រាជរដ្ឋាភិបាលបានកំណត់គោលដៅយុទ្ធសាស្រ្ត៥គឺ
១)* ធានាឲ្យបាននូវកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់៧% ប្រកបដោយភាពធន់នឹងវិបត្តនានា
២)* បង្កើតការងារឲ្យបានកាន់តែច្រើន ទាំងបរិមាណនិងគុណភាពជូនដល់ប្រជាពលរដ្ឋ ពិសេសយុវជន
៣)* ម្រេចឲ្យបានគោលដៅកាត់បន្ថយភាពក្រីក្រក្នុងអត្រាទាបជាង១០% និងបន្តទាញទម្លាក់ឲ្យនៅក្នុងកម្រឹតជាអប្បបរមា
៤)* ពង្រឹងអភិបាលកិច្ច និងលើកកម្ពស់គុណភាពស្ថាប័ន ទាំងថ្នាក់ជាតិ និងថ្នាក់ក្រោមេជាតិ និងធានាចីរភាពនៃការអភិវឌ្ឍសង្គម-សេដ្ឋកិច្ច
៥)* ការកសាងភាពធន់ទៅនឹងការប្រែប្រួលអាកាសធាតុ។
