(រដ្ឋបាលខេត្តកំពង់ធំ)៖ ឯកឧត្តម នួន ផារ័ត្ន អភិបាលខេត្តកំពង់ធំ បានដឹកនាំកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលខេត្តកំពង់ធំ ដើម្បីស្តាប់នូវរបាយការណ៍វឌ្ឍនៈភាពរបស់ខេត្ត និងបញ្ហាមួយចំនួនដែលយើងត្រូវពិភាក្សាគ្នា ដូចមាននៅក្នុងរបៀបវារៈនៃកិច្ចប្រជុំ នាព្រឹកថ្ងៃទី០៦ ខែសីហា ឆ្នាំ២០២៤ នៅសាលប្រជុំសាលាខេត្តកំពង់ធំ។
ថ្លែងនៅក្នុងកិច្ចប្រជុំ ឯកឧត្តម នួន ផារ័ត្ន មានប្រសាសន៍លើកឡើងថា នៅចំពោះមុខ ខេត្តកំពង់ធំ បានទទួលការគំរាមកំហែងពីទឹកជំនន់ ដែលបង្ករឱ្យមានផលប៉ះពាល់ដល់នៅដ្ឋានប្រជាពលរដ្ឋ ហេដ្ឋានរចនាសម្ព័ន ជាពិសេស ដំណាំស្រូវប្រាំងប៉ែកខាងក្រោម នៅក្រុងស្ទឹងសែន និងស្រុកកំពង់ស្វាយ ដែលកំពុងប្រមូលផល ត្រូវបានទឹកជន់លិចក្នុងរយៈពេលជិតមួយសប្តាហ៍កន្លងមកនេះ។
ឯកឧត្តម អភិបាលខេត្តកំពង់ធំ បានថ្លែងអំណគុណ ដល់កងកម្លាំងទាំងបី ដែលបានជួយថែរក្សាសន្តិសុខសណ្ដាប់ធ្នាប់ ការពារថ្នាក់ដឹកនាំទាំងថ្នាក់ជាតិ និងថ្នាក់ក្រោមជាតិ ក្នុងបេសកកម្មចុះពិនិត្យស្ថានភាពទឹកជំនន់ក្នុងភូមិសាស្ត្រខេត្តកំពង់ធំ ជាពិសេស ការអន្តរាគមន៍ជួយលើកទំនប់ស្ទាក់ទឹកក្នុងរយៈពេលប៉ុន្មានថ្ងៃនេះ រួមជាមួយគ្រឿងចក្រចំនួន ១០គ្រឿងថែមទៀត ទោះបីយើងមិនបានទប់ទឹកជាប់បានទាំងស្រុងក៏ពិតមែន យើងអាចកាត់បន្ថយការលិចលង់ស្រូវរបស់ពួកគាត់បានមួយកម្រិត ខណៈពេលនេះ ប្រជាពលរដ្ឋកំពុងមមាញឹកប្រមូលផលច្រូតកាត់បានមួយចំនួនធំផងដែរ។
លើសពីនេះទៀត ឯកឧត្តម នួន ផារ័ត្ន មានប្រសាសន៍បន្ថែមទៀតថា កន្លងមក រដ្ឋបាលខេត្តកំពង់ធំ បានចេញនូវសេចក្តីជូនដំណឹង ស្តីពីការរៀបចំសណ្តាប់ធ្នាប់ របៀបរៀបរយស្លាកផ្សព្វផ្សាយពាណិជ្ជកម្មផលិតផលស្រាបៀរ និងគ្រឿងស្រវឹងគ្រប់ប្រភេទ ការត្រួតពិនិត្យអាវុធជាតិផ្ទុះ បញ្ហាគ្រឿងញៀន បញ្ហាល្បែងស៊ីសងគ្រប់ប្រភេទ បញ្ហាក្មេងទំនើង នៅក្នុងភូមិសាស្ត្រខេត្តកំពង់ធំ។ ដូច្នេះ សូមអាជ្ញាធរមូលដ្ឋាន បន្តអនុវត្តនូវសេចក្តីជូនដំណឹងនេះឱ្យមានប្រសិទ្ធិភាពខ្ពស់ ។
ចុងក្រោយ ឯកឧត្តម នួន ផារ័ត្ន បានក្រើនរំលឹកដល់ប្រធានគណៈបញ្ជាការឯកភាពរដ្ឋបាលក្រុងស្រុក បន្តដឹកនាំកិច្ចប្រជុំប្រចាំខែគណៈបញ្ជាការឯកភាពឲ្យបានទៀតទាត់ ដើម្បីពង្រឹងការងារសន្តិសុខ សណ្តាប់ធ្នាប់សាធារណៈ ជូនប្រជាពលរដ្ឋឱ្យបានល្អប្រសើរ ជាពិសេស អាជ្ញាធរមូលដ្ឋាន ត្រូវផ្សារភ្ជាប់ជាមួយប្រជាពលរដ្ឋ ដើម្បីស្តាប់ទុក្ខកង្វល់ ក៏ដូចជាសំណូមពររបស់ពួកគាត់ ស្វែងរកដំណោះស្រាយបញ្ហាជូនពួកគាត់ឱ្យបានទាន់ពេលវេលា។
អត្ថបទដោយ៖ លោក ឈួន ឆេងមួន
