ប្រជាពលរដ្ឋចំនួន ១៥០គ្រួសារ នៅឃុំតំាងក្រសៅ ស្រុកប្រាសាទសំបូរ ឯកឧត្តម សុខ លូ អភិបាលខេត្តកំពង់ធំ ចុះចែកអង្ករ ចំនួន ៦តោន ដែលជាអំណោយរបស់សាធារណរដ្ឋកូរ៉េ នៃគម្រោងស្បៀងបម្រុងសង្គ្រោះបន្ទាន់អាស៊ានបូក៣ ជាកម្មវិធីមួយដែលបង្កើតឡើងដែលមានការចូលរួមពីប្រទេសជាសមាជិកអាស៊ានទាំង១០ បូកនិងប្រទេសចំនួន បីទៀតគឺ ១. ប្រទេសចិន, ២. ប្រទេសកូរ៉េ និង ៣. ប្រទេសជប៉ុន តាមរយៈមន្ទីរកសិកម្ម រុក្ខប្រមាញ់ និងនេសាទ នៅព្រឹកថ្ងៃសុក្រ ៩រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០៩ ខែកុម្ភៈ ឆ្នាំ២០១៨ ។
បន្ទាប់ពីលោក អ៊ុត វណ្ណារ៉ា អភិបាលស្រុកប្រាសាទសំបូរ បានឡើងអានរបាយការណ៍ជូនគណៈអធិបតី និងគណៈប្រតិភូ រួចមកលោក ធីវ វណ្ណធីរ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានឲ្យដឹងថា អង្ករសរុបទាំងអស់ ៣២ តោន សម្រាប់ចែកជូនប្រជាពលរដ្ឋដែលរងគ្រោះ ទាំង ០៧ស្រុក ក្នុងខេត្តកំពង់ធំ ក្នុងនោះអង្ករចំនួន០៦តោន ត្រូវបានចែកជូនបងប្អូនប្រជាពលរដ្ឋនៅស្រុកប្រាសាទសំបូរនេះ ដើម្បីជួយកាត់បន្ថយនូវការលំបាកចំពោះបងប្អូនដែលរងគ្រោះដោយសារគ្រោះធម្មជាតិនាពេលកន្លងទៅក្នុងឆ្នាំ២០១៧។
ឯកឧត្តម សុខ លូ មានប្រសាសន៍លើកឡើងថា បើទោះបីជាការចែកជូនអំណោយនេះមានភាពយឺតយ៉ាវបន្តិចក៏ពិតមែន តែបានបង្ហាញនូវការយកចិត្តទុកដាក់របស់ប្រទេសដែលជាសមាជិកអាស៊ានទាំង១០ រួមជាមួយប្រទេសទាំងបី នៃគម្រោងស្បៀងបម្រុងសង្គ្រោះបន្ទាន់អាស៊ានបូក៣ ជាពិសេសប្រមុខរាជរដ្ឋាភិបាលដែលមានសម្តេចតេជោ ហ៊ុន សែន ជានាយករដ្ឋមន្ត្រី នៃព្រះរាជាណាចក្រកម្ពុជា ដែលជានិច្ចកាលសម្តេចលោកតែងតែនៅជាប់ជាមួយសុខទុក្ខរបស់ប្រជាពលរដ្ឋ ដោយមិនឲ្យបងប្អូនណាម្នាក់ស្លាប់ដោយសារគ្មានបាយហូបនោះទេ។ ឯកឧត្តមបន្តទៀតថា ថ្វីត្បិតនេះជាអំណោយបន្តិបន្តួច ប៉ុន្តែវាអាចជួយដោះទុក្ខលំបាកបានមួយកម្រិតដែរ ដូច្នេះសូមបងប្អូនខិតខំធ្វើស្រែចំការ ស្រូវប្រំាង ស្រូវឡើងទឹក ស្រូវវស្សា បន្ថែមទៀតដើម្បីជួយសម្រួលដល់ជីវភាពប្រចាំថ្ងៃ។
ម្យ៉ាងវិញទៀត ចំពោះបងប្អូនដែលមានបំណងចំណាកស្រុកទៅធ្វើការនៅក្រៅប្រទេស គឺត្រូវមានលិខិតធ្វើដំណើរ និងប័ណ្ណពលករកម្ពុជាធ្វើការនៅបរទេស ព្រោះវាមានសារសំខាន់ណាស់ អាចឲ្យពលករកម្ពុជាធ្វើការដោយស្របច្បាប់ ធ្វើការងារមិនមានការភ័យខ្លាច និងអាចរកប្រាក់ចំណូលបានច្រើនទៀតផង សម្រាប់ផ្គត់ផ្គង់គ្រួសារ។ ក្នុងនោះឯកឧត្តមបានផ្តាំផ្ញើដល់អាជ្ញាធរមូលដ្ឋាន ខិតខំបម្រើសេវាធារណៈជូនប្រជាពលរដ្ឋ ដូចជាការធ្វើសំបុត្របញ្ជាក់កំណើត សំបុត្រអាពាហ៍ពិពាហ៍ និងសំបុត្រមរណៈភាព ត្រូវចុះធ្វើដល់ខ្នងផ្ទះប្រជាពលរដ្ឋបន្តទៀត៕
