ព្រឹកថ្ងៃទី០៥ ខែកក្កដា ឆ្នាំ២០១៧ ក្រុមការងារថ្នាក់ជាតិចុះមូលដ្ឋានខេត្តកំពង់ធំ បានរៀបចំកិច្ចប្រជុំប្រចាំខែ នៅសាលាខេត្តកំពង់ធំ ក្រោមអធិបតីភាព ឯកឧត្តម ថោង ខុន រដ្ឋមន្រ្តីក្រសួងទេសចរណ៍ ឯកឧត្តម សុខ លូ អភិបាលនៃគណៈអភិបាលខេត្តកំពង់ធំ និងជាអនុប្រធានអចិន្ត្រៃយ៍ ព្រមទាំងមានការចូលរួមពីឯកឧត្តម លោកជំទាវ លោក លោកស្រីជាសមាជិកក្រុមការងារថ្នាក់ជាតិចុះមូលដ្ឋានខេត្តកំពង់ធំ សរុបប្រមាណ ១០០នាក់ ។
កិច្ចប្រជុំបានពិនិត្យ ពិភាក្សា និងឯកភាពគ្នាលើការងារសំខាន់ៗមួយចំនួន ដែលត្រូវអនុវត្តនៅមូលដ្ឋានក្រុងស្រុកទាំង ០៨ នៃខេត្តកំពង់ធំ ឲ្យមានប្រសិទ្ធភាព មានដូចជា៖
១- ការងារឆ្វៀលដីនៅតំបន់៣ សម្រាប់ប្រជាពលរដ្ឋអាស្រ័យផល ដោយជម្រុញការចេញសលាកប័ត្រព័ត៌មានជូនដល់ដៃប្រជាពលរដ្ឋតាមស្ថានភាពជាក់ស្តែងនៃតំបន់នីមួយៗ ។
២- ការជម្រុញការងាររៀបចំបែបបទ លិខិតស្នាម កាត់ឆ្វៀលដីពីតំបន់២ មកតំបន់១ ដោយត្រូវអនុវត្តជាជំហ៊ានៗតាមស្ថានភាពជាក់ស្តែង ។
៣- ការកំណត់ទំហំដីស្នើសុំរបស់ប្រជាពលរដ្ឋក្នុងតំបន់អភិរក្សសត្វខ្សឹប ដោយត្រូវពិនិត្យ និងដោះស្រាយជាក់ស្តែងអោយបានរួចរាល់នៅខែវិច្ឆិកា ឆ្នាំ២០១៧ ខាងមុខនេះ ។
៤- ការជម្រុញការកាត់ដីជូនប្រជាពលរដ្ឋចេញពីបញ្ជីសារពើភ័ណ្ឌរបស់មន្ទីរ អង្គភាពមួយចំនួនក្នុងខេត្ត ។
៥- ជម្រុញការសម្របសម្រួល ដោះស្រាយបញ្ហាដីធ្លីជាក់ស្តែង ជូនប្រជាពលរដ្ឋនៅក្នុងតំបន់អភិរក្ស ប្រាសាទសំបូរព្រៃគុក ។
៦- ការពង្រឹងយន្តការគ្រប់គ្រង និងដឹកនាំរបស់សហគមន៍ព្រៃឈើ និងសហគមន៍កសិកម្មឡើងវិញ ។
៧- ការពង្រឹងសហគមន៍ប្រើប្រាស់ទឹក ដើម្បីធ្វើការបែងចែកទឹកឲ្យបានច្បាស់លាស់ ជូនប្រជាពលរដ្ឋបង្កបង្កើនផល ។
៨- ការជម្រុញរៀបចំបង្កើតសហគមន៍សិប្បកម្មកែច្នៃឈើ នៅឃុំចុងដូង ស្រុកបារាយណ៍ ។
៩- ការជម្រុញការធ្វើអត្តសញ្ញាណបណ្ណសញ្ជាតិខ្មែរជូនប្រជាពលរដ្ឋ ពិសេសយុវជនទើបគ្រប់អាយុ ។
១០- ការពង្រឹងការផ្តល់នូវសេវាសាធារណៈជូនប្រជាពលរដ្ឋអោយបានរហ័ស និងមានតម្លាភាព ។
១១- ការជម្រុញពិនិត្យ និងដោះស្រាយនូវសេវាសំណូមពររបស់ប្រជាពលរដ្ឋ ដែលទាក់ទងនឹង សាលារៀន ផ្លូវលំជនបទ ប្រព័ន្ធធារាសាស្រ្ត …។ល។
១២-ជំរុញដោះស្រាយ បញ្ហាសណ្តាប់ធ្នាប់ និងអនាម័យសាធារណៈ ពិសេសការដោះស្រាយគំនរសម្រាម តាមទីផ្សារដែលធ្វើអោយបះពាល់ដល់សុខភាពរស់នៅរបស់ប្រជាពលរដ្ឋ ។
ឯកឧត្តមប្រធានអង្គប្រជុំក៏បានណែនាំដល់ក្រុមការងារថ្នាក់ជាតិ និងអាជ្ញាធរមូលដ្ឋានគ្រប់លំដាប់ថ្នាក់ បន្តយកចិត្តទុកដាក់គិតគូរ ពិនិត្យ និងដោះស្រាយនូវរាល់បញ្ហាប្រឈម និងសំណូមពរចាំបាច់នានាដែលកើតមានឡើងនៅមូលដ្ឋានក្រុងស្រុកទាំង០៨ អោយបានទាន់ពេលវេលា និងមានប្រសិទ្ធភាព សំដៅធ្វើឲ្យប្រជាពលរដ្ឋមូលដ្ឋានកាន់តែមានភាពកក់ក្តៅ ជឿជាក់ និងទុកចិត្ត លើរាជរដ្ឋាភិបាល និងរដ្ឋបាលមូលដ្ឋាន ៕
