ព្រឹកថ្ងៃទី០៦ ខែកក្កដា ឆ្នាំ២០១៧ អាជ្ញាធរជាតិប្រយុទ្ធនឹងជម្ងឺអេដស៍ បានរៀបចំនូវកិច្ចប្រជុំពេញអង្គលើកទី១ ឆ្នាំ២០១៧ ក្រោមអធិបតីភាពឯកឧត្តម អៀង មូលី ទេសរដ្ឋមន្ត្រី និងជាប្រធានអាជ្ញាធរជាតិប្រយុទ្ធនឹងជំងឺអេដស៍ ឯកឧត្តម សុខ លូ អភិបាលខេត្តកំពង់ធំ និងឯកឧត្តមសាស្ត្រាចារ្យវេជ្ជបណ្ឌិត លី ប៉ូរ អនុប្រធានអាជ្ញាធរប្រយុទ្ធនឹងជំងឺអេដស៍ នៅរមណីយដ្ឋានបឹងសំរិទ្ធ ស្ថិតនៅភូមិបឹងសំរិទ្ធ ឃុំបល្ល័ង្គ ស្រុកបារាយណ៍ ខេត្តកំពង់ធំ និងមានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការតាមបណ្តាក្រសួង ស្ថាប័ន សមាជិកគណៈកម្មាធិការប្រយុទ្ធជំងឺអេដស៍ លោក លោកស្រីមកពីមន្ទីរអង្គភាពជាប់ពាក់ព័ន្ធជុំវិញ ខេត្តប្រមាណជាង ២០០នាក់ ។
ឯកឧត្តមវេជ្ជបណ្ឌិត តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជម្ងឺអេដស៍ អានរបាយការណ៍សង្ខេបពីគោលបំណងក្នុងកិច្ចប្រជុំ ពិនិត្យ និងស្តាប់នូវលទ្ធផលដែលកំពុងអនុវត្តសម្រាប់ ៦ខែ ក្នុងឆ្នាំ ២០១៧ រៀបចំសកម្មភាពជាអទិភាព ដើម្បីអនុវត្តការងារ ៦ខែ ជាបន្តបន្ទាប់ និងពិនិត្យរាល់ឧបសគ្គនានា ដែលរាំងស្ទះនូវបញ្ហាថវិកាដែលជាបញ្ហាចំបង ហើយធ្វើយ៉ាងណាឲ្យមានការឯកភាពគ្នាក្នុងការរៀបចំសកម្មភាពសំខាន់ៗ ដើម្បីស្នើសុំទៅរាជរដ្ឋាភិបាល ក្នុងការរៀបចំកញ្ចប់ថវិកា ព្រោះកញ្ចប់ថវិកានេះ ជាជំនួយពីខាងក្រៅហើយត្រូវបានកាត់បន្ថយជាបន្តបន្ទាប់ ។
ថ្លែងក្នុងពិធីនេះដែរ ឯកឧត្តម សុខ លូ មានប្រសាសន៍លើកឡើងថា ខេត្តកំពង់ធំ មានក្រុមការងារប្រយុទ្ធនឹងជំងឺអេដស៍ពីថ្នាក់ខេត្ត រហូតដល់ថ្នាក់ស្រុក ក្រុង និងឃុំ សង្កាត់ ព្រមទំាងមានអង្គការដៃគូមិនមែនរដ្ឋាភិបាលដែលធ្វើការប្រយុទ្ធនឹងជំងឺអេដស៍ និងក្រុមការងារថែទំាព្យាបាលបន្តមួយចំនួនទៀត ។ រីឯសកម្មភាពអប់រំ ផ្សព្វផ្សាយអំពីជំងឺអេដស៍ ទាមទារឲ្យមានការចូលរួមពហុវិស័យ ហើយមន្ទីរអង្គភាព ត្រូវសហការជាមួយមន្ទីរសុខាភិបាលក្នុងការងារនេះ ។ ចំពោះអ្នកផ្ទុកមេរោគអេដស៍ និងជំងឺអេដស៍ ត្រូវបានទទួលបានការថែទាំ និងព្យាបាលដោយឥតគិតថ្លៃ ។ ឯកឧត្តមបន្ថែមទៀតថា ដើម្បីឈានទៅសម្រេចនៅគោលដៅ ក្នុងនាមខ្ញុំជាអាជ្ញាធរខេត្ត ខ្ញុំនឹងខិតខំជំរុញ និងគាំទ្រយ៉ាងពេញទំហឹងដល់សកម្មភាពនានា ក្នុងការប្រយុទ្ធប្រឆំាងនឹងជំងឺអេដស៍ ដើម្បីធ្វើឲ្យប្រសើរឡើងនូវសុខមាលភាពរបស់ប្រជាពលរដ្ឋ និងរួមចំណែកក្នុងការកាត់បន្ថយភាពក្រីក្រ ។
ឯកឧត្តមបានបន្តថាកិច្ចប្រជុំពិតជាមានសារៈសំខាន់ណាស់ដែលផ្តល់ទៅដល់ក្រុមការងារបច្ចេកទេស អាចយកទៅប្រើប្រាស់ក្នុងការបន្តអនុវត្ត ឆ្លើយតបទៅនឹងការរីករាលដាលនៃមេរោគអដស៍ និងជំងឺអេដស៍រយៈពេល ៦ខែ ចុងឆ្នាំ២០១៧ ។ ដោយមានការបង្ហាញ ពិភាក្សាផ្លាស់ប្តូរបទពិសោធន៍ការងារ ពីបណ្តាសមាជិកអាជ្ញាធរជាតិប្រយុទ្ធនឹងជំងឺអេដស៍ប្រទេសកម្ពុជាបានដើរនៅផ្លូវដ៏ត្រឹមត្រូវ និងមានក្តីសង្ឃឹមពិតប្រាកដឆ្ពោះទៅរកការលុបបំបាត់ជំងឺអេដស៍ នៅឆ្នាំ២០២៥ ដោយមានការប្តេជ្ញាចិត្ត និងការគាំទ្រនយោបាយដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ដែលមានចីរភាពនៃការចូលរួមឆ្លើយតបយ៉ាងទូលំទូលាយ និងពហុវិស័យប្រយុទ្ធទៅនឹងមេរោគអេដស៍ និងជំងឺអេដស៍ ពីគ្រប់ស្ថាប័ណ្ណជាតិ អន្តរជាតិ សង្គមស៊ីវិល ឯកជន បណ្តាញអ្នកផ្ទុកមេរោគអេដស៍ និងជំងឺអេដស៍ ។
មានប្រសាសន៍សំណេះសំណាលនាឱកាសនោះ ឯកឧត្តម អៀង មូលី បានកោតសរសើរ ដល់ក្រុមការងារដែលបានការខិតខំប្រឹងប្រែងអស់ពីកម្លាំងកាយចិត្តរបស់ ឯកឧត្តម លោកជំទាវ លោក លោកស្រី និងស្មារតីទទួលខុសត្រូវខ្ពស់ ដើម្បីចូលរួមចំណែកដឹកនាំ គ្រប់គ្រង សម្របសម្រួល និងឆ្លើយតបយ៉ាងទូលំទូលាយ ក្នុងពហុវិស័យប្រយុទ្ធនឹងជម្ងឺអេដស៍បានធ្វើឲ្យយើងទទួលបាននូវភាពជោគជ័យ ប្រកបដោយមោទនភាព ក្នុងរយៈពេល ៦ខែនាដើមឆ្នាំ២០១៧កន្លងមកនេះ ។ ក្នុងយុទ្ធនាការយ៉ាងទៀងទាត់របស់គណៈកម្មាធិការប្រយុទ្ធប្រឆាំងជម្ងឺអេដស៍ យើងបានធ្វើការប្រជុំយ៉ាងទៀងទាត់រាល់៦ខែម្តង ក្នុងគោលបំណងពិនិត្យមើលរួមគ្នា នូវវឌ្ឍនភាព សមិទ្ធិផល និងប្រសិទ្ធភាពនៃការឆ្លើយតបរបស់ជាតិ នៃកម្មវិធីប្រយុទ្ធប្រឆាំងជម្ងឺអេដស៍ និងផ្លាស់ប្តូរយោបល់ បង្កើននូវយុទ្ធសាស្រ្តថ្មីៗ លើចំណុចខ្វះខាតមួយចំនួន ។ មួយវិញទៀតសកម្មភាពដែលពួកយើងទាំងអស់គ្នាកំពុងធ្វើនេះ គឺជាសកម្មភាពដ៏ត្រឹមត្រូវបំផុត ក្នុងស្មារតីរួមចំណែកក្នុងក្តីសង្ឃឹមពិតប្រាកដឆ្ពោះទៅរកការលុបបំបាត់ជម្ងឺអេដស៍ នៅឆ្នាំ២០២៥ ព្រមទាំងមានការគាំទ្រពីគោលនយោបាយរបស់រាជរដ្ឋាភិបាលកម្ពុជា ជាមួយនឹងកត្តាគ្រប់គ្រាន់មួយចំនួន គឺមានចីរភាពនៃការចូលរួមឆ្លើយតប និងពហុវិស័យប្រយុទ្ធនឹងមេរោគអេដស៍ ជម្ងឺអេដស៍ ពីគ្រប់ស្ថាប័នជាតិ អន្តរជាតិ អង្ការសង្គមស៊ីវិល ឯកជន បណ្តាញអ្នកផ្ទុកមេរោគ អេដស៍ និងជម្ងឺអេដស៍ ដែលត្រូវការដោះស្រាយតាម រយៈការចូលរួមរបស់ឯឧត្តម លោកជំទាវ និងវត្តមានរបស់អស់លោក លោកស្រី ៕