(រដ្ឋបាលខេត្តកំពង់ធំ) ៖ ឯកឧត្តម ងួន រតនៈ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ អញ្ជើញចូលរួមក្នុងពិធីចែកអំណោយមនុស្សធម៌របស់កាកបាទក្រហមកម្ពុជាជូនដល់ប្រជាពលរដ្ឋមានជីវភាពខ្វះខាត ចំនួន ១០០គ្រួសារ នៅទីតាំង៣ផ្សេងគ្នា ស្ថិតនៅស្រុកបារាយណ៍ ខេត្តកំពង់ធំ នាព្រឹកថ្ងៃទី ១៣ ខែកក្កដា ឆ្នាំ២០២២។
ជាមួយគ្នានោះដែរ ឯកឧត្តម ងួន រតនៈ បានថ្លែងអំណរគុណចំពោះថ្នាក់ដឹកនាំអនុសាខាកាកបាទក្រហមតាមបណ្តាក្រុងស្រុក ដែលបានខិតខំយកចិត្តទុកដាក់លើយន្តការរបស់កាកបាទក្រហម មានភ្នាក់ងារស្ម័គ្រចិត្ត ជាភ្នាក់ងារផ្តល់ព័ត៌មានអំពីបញ្ហាផ្សេងផ្សេងទាក់ទងនឹងពលរដ្ឋក៏ដូចជាជនដែលងាយរងគ្រោះទាក់ទងនឹងគ្រោះធម្មជាតិ គ្រោះអគ្គិភ័យ និងបញ្ហាបង្ការផ្សេងៗ ដែលបញ្ហាទាំងអស់នេះ ទទួលបានការយកចិត្តទុកដាក់ខ្លាំងណាស់ពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន លោកតែងតែដាស់តឿនណែនាំឲ្យរាល់គ្រប់ឋានានុក្រមនៃការដឹកនាំរបស់សាខានីមួយៗ ខិតខំយកចិត្តទុកដាក់ ឲ្យបានគ្រប់ច្រកល្ហក នូវទុក្ខលំបាករបស់បងប្អូនប្រជាពលរដ្ឋ ជាពិសេសទាក់ទងនឹងជីវភាពរបស់បងប្អូនប្រជាពលរដ្ឋ ។
ឯកឧត្តម បានបន្តថា បងប្អូនដែលបានមកទទួលអំណោយកាកបាទក្រហមកម្ពុជានាពេលនេះ ទោះបីតិចតួចក្តី ប៉ុន្តែវាអាចជួយសម្រួលនូវការលំបាកបានមួយកម្រិត និងបង្ហាញពីការចូលរួមជួយចែករំលែកនូការលំបាកមួយអន្លើផងដែរ។
ទន្ទឹមនេះផងដែរលោក អួង សារឿន អភិបាលស្រុកបារាយណ៍ សូមថ្លែងអំណរគុណដោយក្តីគោរព និងកតញ្ញូ ដ៏ជ្រាលជ្រៅបំផុតចំពោះកាកបាទក្រហមកម្ពុជាដែលមាន សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន និងសប្បុរសជនគ្រប់មជ្ឈដ្ឋាន ដែលជានិច្ចកាលតែងតែគិតគូរពីសុខទុក្ខ ការលំបាក របស់ប្រជាពលរដ្ឋក្នុងស្រុកបារាយណ៍ ដោយបានផ្ដល់អំណោយមនុស្សធម៌ជាសម្ភារៈ គ្រឿង ឧបភោគ បរិភោគ ការអប់រំផ្សព្វផ្សាយពីវិធានការការពារជំងឺឆ្លងផ្សេងៗ និងការលើកកម្ពស់សុខុមាលភាព ដល់ ចាស់ជរាគ្មានទីពឹង ជនពិការ ក្មេងកំព្រា អ្នកផ្ទុកមេរោគ គ្រួសារងាយរងគ្រោះ និងជួបវិបត្តិអគ្គិភ័យផ្សេងៗ។ល៕
