(រដ្ឋបាលខេត្តកំពង់ធំ)៖ នារសៀលថ្ងៃទី២៦ ខែសីហា ឆ្នាំ២០២២ ឯកឧត្តម អ៊ុំ ម៉ារ៉ា រដ្ឋលេខាធិការ ក្រសួងមហាផ្ទៃ តំណាងដ៏ខ្ពង់ខ្ពស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតីក្នុងពិធីប្រកាសចូលកាន់មុខតំណែងអភិបាលរងនៃគណៈអភិបាលខេត្តកំពង់ធំ ចំនួន ៤រូប រួមមាន (១. លោក អ៊ុន បុត្ត ២. លោក ងួន រាសី ៣. លោក ជា វ៉ាន់ចាន់ និងលោក លី វេត) និងនាយករដ្ឋបាលសាលាខេត្ត ១រូប (លោក ម៉ាក់ ប៊ុនហុង) ដោយមានការអញ្ជើញចូលរួមពីឯកឧត្តម ងួន រតនៈ អភិបាលខេត្តកំពង់ធំ ថ្នាក់ដឹកនាំខេត្ត មន្ទីរអង្គភាព និងមន្ត្រីជុំវិញខេត្ត សរុបប្រមាណ ២៥០នាក់ នៅសាលប្រជុំសាលាខេត្តកំពង់ធំ។
ជាមួយគ្នានោះដែរ ឯកឧត្តម ងួន រតនៈ អភិបាលខេត្តកំពង់ធំ ឡើងរាយការណ៍ដោយសង្ខេបអំពីស្ថានភាពភូមិសាស្ត្រ និងស្ថានភាពសន្តិសុខសណ្តាប់ធ្នាប់ក្នុងខេត្ត ជូនអង្គពិធី ព្រមទាំងសម្តែងនូវសេចក្តីរីករាយដែលទទួលបានថ្នាក់ដឹកនាំខេត្តបន្ថែមទៀត ដែលជាធនធានថ្មីសម្រាប់ការងាររដ្ឋបាលខេត្តកំពង់ធំ ដើម្បីចូលរួមចំណែកក្នុងការដឹកនាំ ជំរុញការអភិវឌ្ឍខេត្តកំពង់ធំឲ្យកាន់តែឆាប់រហ័ស ។
ឯកឧត្តម អ៊ុំ ម៉ារ៉ា ថ្លែងថា ការបន្ថែមចំនួនគណៈអភិបាលខេត្តនាពេលនេះ គឺជាជំហានថ្មីមួយទៀត របស់រាជរដ្ឋាភិបាល ក្នុងកំណែទម្រង់វិមជ្ឈការ និងវិសហមជ្ឈការ សំដៅផ្ដល់ការគាំទ្រដល់រដ្ឋបាលក្រុង ស្រុក ឃុំសង្កាត់ ក្នុងការផ្តល់សេវាសាធារណៈជូនប្រជាពលរដ្ឋឲ្យកាន់តែប្រសើរ និងមានប្រសិទ្ធភាពខ្ពស់ ជាពិសេសខិតខំបំពេញតួនាទីភារកិច្ចប្រកបដោយស្មារតីទទួលខុសត្រូវខ្ពស់ ដើម្បីសម្រេចបាននូវសមិទ្ធផលក្នុងការធានាថែរក្សាសន្តិភាព ស្ថេរភាពនយោបាយ ថែរក្សាសន្តិសុខសណ្ដាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ និងជំរុញការអនុវត្តសេដ្ឋកិច្ចសង្គមនៅមូលដ្ឋានស្របតាមគោលនយោបាយរបស់រាជរដ្ឋាភិបាល ក្នុងការលើកកម្ពស់ជីវភាពរស់នៅ កាត់បន្ថយភាពក្រីក្ររបស់ប្រជាពលរដ្ឋ និងការខិតខំចូលរួមយ៉ាងសកម្មក្នុងការអនុវត្តវិធានការរបស់ក្រសួងសុខាភិបាល ទប់ស្កាត់ការឆ្លងរីករាលនៃជំងឺកូវីដ១៩។
ដើម្បីឆ្លើយតបឲ្យបានសក្ដិសមចំពោះជំនឿទុកចិត្តពីរាជរដ្ឋាភិបាល ក៏ដូចជាក្រសួងមហាផ្ទៃ លោក ងួន រាសី ដែលទទួលបានការតែងតាំងថ្មី បានឡើងប្តេជ្ញាចិត្តដូចតទៅ៖ ខិតខំបំពេញការងារ តាមតួនាទី និងភារកិច្ចដែលថ្នាក់លើប្រគល់ជូន បង្កើនសាមគ្គីភាពផ្ទៃក្នុង និងបង្កើនទំនាក់ទំនងល្អជាមួយ មន្ទីរ-អង្គភាព ជំនាញជុំវិញខេត្ត រដ្ឋបាលក្រុង ស្រុក អង្គការមិនមែនរដ្ឋាភិបាល និងដៃគូពាក់ព័ន្ធនានា ខិតខំពង្រឹងកិច្ចសហប្រតិបត្តិការ សាមគ្គីភាព ឯកភាពផ្ទៃក្នុងឲ្យបានល្អប្រសើរ រួមចំណែកធានានិរន្តរភាពកិច្ចការរដ្ឋបាលខេត្ត និងការផ្តល់សេវាសាធារណៈឲ្យកាន់តែប្រសើរឡើង។
