(រដ្ឋបាលខេត្តកំពង់ធំ) : នាព្រឹកថ្ងៃទី០២ ខែមិថុនា ឆ្នាំ២០២៣ ឯកឧត្តម ងួន រតនៈ អភិបាលខេត្តកំពង់ធំ និងសហការី ព្រមទាំងលោកអភិបាលស្រុក កងកម្លាំងប្រដាប់អាវុធ អញ្ជើញចុះត្រួតពិនិត្យស្ថានភាពផ្លូវក្រាលគ្រួសក្រហម ១ខ្សែ និងទីតាំងសម្រាប់បើកការដ្ឋានសាងសង់ផ្លូវក្រាលគ្រួសក្រហមនេះ ក្លាយទៅជាផ្លូវចាក់ស៊ូ នាពេលខាងមុខនេះ តភ្ជាប់ពី ផ្លូវជាតិលេខ៦ ត្រង់ចំណុចគល់ស្ពានអ្នកវាំង ឃុំស្រឡៅ ស្រុកតាំងគោក ឆ្ពោះទៅជាប់នឹងភូមិរោត ខេត្តកំពង់ចាម។
ឯកឧត្តមងួន រតនៈ មានប្រសាសន៍ថា ដោយមានការយកចិត្តទុកដាក់ពីលោកអភិបាលស្រុក ជាពិសេសគឺថ្នាក់ដឹងនាំខេត្ត មើលឃើញពីការលំបាកក្នុងការធ្វើដំណើរ របស់ប្រជាពលរដ្ឋដោយសារតែកន្លងមកផ្លូវ១ខ្សែរនេះមាន ទំហំតូច ជាពិសេសពេលរដូវវស្សាមានភ្លៀងធ្លាក់ បង្កអោយមានការលំបាកដោយសារផ្លូវមានសភាពរអិល និងមិនមានសុវត្ថិភាពក្នុងការចរាចរណ៍ឆ្លងកាត់។
ឯកឧត្តមអភិបាលខេត្ត បន្តថា ផ្លូវមួយខ្សែនេះនឹងក្លាយទៅជាសរសៃឈាមសេដ្ឋកិច្ចមួយដ៏សំខាន់នៅពេលដែលស្ថាបនារួចរាល់ ព្រោះនឹងជួយសម្រួលដល់ការធ្វើដំណើរចរាចរណ៍ទៅមក ការដឹកជញ្ជូនផល្លានុផល កសិផលផលដំណាំ កសិឧស្សាហកម្ម ស្បៀងអាហារ លើកកម្ពស់សេដ្ឋកិច្ច កាត់បន្ថយការកើតមានគ្រោះថ្នាក់ ធានាបាននៅសុវត្ថិភាពក្នុងការធ្វើដំណើរ។
ឯកឧត្តម ងួន រតនៈ សម្ដែងនូវភាពសប្បាយរីករាយ អបអរសាទរដល់ អាជ្ញាធរមូលដ្ឋាន ប្រជាពលរដ្ឋ បងប្អូនប្រជាកសិករ ក្នុងការទទួលបានផ្លូវក្រាលកៅស៊ូមួយខ្សែក្នុងពេលខាងមុខនេះ។
