(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ ថ្លែងថា សៀវភៅ “ហ៊ុន សែន កម្ពុជា” បានបង្ហាញអត្ថន័យអំពីដំណើរជីវិត និងប្រវត្តិសាស្ត្រនយោបាយរបស់សម្ដេចតេជោ ហ៊ុន សែន ក្នុងការបង្រួបបង្រួមផ្សះផ្សាអភិវឌ្ឍជាតិ ពីគំនរបែកបាក់ដោយសារសង្គ្រាម ក្នុងរបបប្រល័យពូជសាសន៍ ប៉ុល ពត ។
ប្រសាសន៍ដ៏មានអត្ថន័យនេះ ថ្លែងនៅក្នុងពិធី បាឋកថា និងផ្សព្វផ្សាយសៀវភៅ “ហ៊ុន សែន កម្ពុជា” ហើយពិធីនេះក៏មានការអញ្ជើញចូលរួមពីលោក អៀង ពិសី អ្នកនិពន្ធសៀវភៅ និង លោក ទុំប៉ែន វីរៈវិទូ ប្រធានក្រុមផ្សព្វផ្សាយសៀវភៅ នៅសាលាប្រជុំសាលាខេត្តកំពង់ធំ នាព្រឹកថ្ងៃទី២៥ ខែសីហា ឆ្នាំ២០២៣។
ឯកឧត្តម ងួន រតនៈ បន្ថែមទៀតថា សៀវភៅ “ហ៊ុន សែន កម្ពុជា” ជាឃ្លាំងចំណេះដឹងដុសខាត់ផ្នត់គំនិតមនុស្ស ឲ្យយល់កាន់តែច្បាស់ពី គុណតម្លៃរបស់ថ្នាក់ដឹកនាំ ដែលមានបញ្ញាវាងវៃ មានចក្ខុវិស័យខ្ពស់ ដែលបានដឹកនាំកម្ពុជាពីប្រទេសដែលពិភពលោកស្គាល់ថា ជាលេណដ្ឋានសង្គ្រាម ឲ្យក្លាយជាប្រទេសដែលមានសន្តិភាព មានការអភិវឌ្ឍគ្រប់ទីកន្លែង ។
ឯកឧត្តម ងួន រតនៈ សម្តែងនូវការកោតសរសើរយ៉ាងខ្លាំង ចំពោះក្រុមការងារស្រាវជ្រាវសៀវភៅ ហ៊ុន សែន កម្ពុជា ដែលខិតខំប្រឹងប្រែងស្រាវជ្រាវ ចងក្រង និងតាក់តែងឲ្យកើតចេញជាសៀវភៅកម្រាស់ជាង១ពាន់ទំព័រនេះឡើង ។ ហើយសៀវភៅនេះ កើតចេញពីបទពិសោធន៍ ឆន្ទៈ មនសិកាស្នេហាជាតិ របស់ឥស្សរជនកំពូលៗរបស់ជាតិ នឹងក្លាយជាមគ្គុទេសក៍ដ៏សំខាន់សម្រាប់ឲ្យមន្ត្រីរាជការ សិស្ស និស្សិត យកធ្វើជាគំរូ ជាពិសេសគឺ មហាវីរភាពគម្រូរបស់សម្តេចអគ្គមហាសេនាបតីតេជោ ហ៊ុន សែន ជាថ្នាក់ដឹកនាំកំពូលរបស់កម្ពុជា និងជាស្ថាបនិកសន្តិភាព ស្ថាបនិកនយោបាយឈ្នះ ឈ្នះ ។
