(រដ្ឋបាលខេត្តកំពង់ធំ)៖ ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្តកំពង់ធំ អញ្ជើញចូលរួមជាអធិបតីភាព ក្នុងកិច្ចប្រជុំស្តីពី ការត្រៀមរៀបចំទិវា ០៨ ឧសភា ២០២០។ ពិធីនេះក៏មានការអញ្ជើញចូលរួមពីថ្នាក់ដឹកនាំប្រធានមន្ទីរ អង្គភាពជុំវិញខេត្ត និងអភិបាលក្រុង/ស្រុកទាំង០៩ នាព្រឹកថ្ងៃទី២៧ ខែមេសា ឆ្នាំ២០២០ នៅសាលាខេត្តកំពង់ធំ។
ក្នុងឱកាសនោះឯកឧត្តម សុខ លូ បានផ្សព្វផ្សាយពីលិខិតលេខ ១៣៩ កក្រក.ទ.ទ ចុះថ្ងៃទី២០ ខែមេសា ឆ្នាំ២០២០ របស់កាកបាទក្រហមកម្ពុជា ស្ដីពីការកៀរងគររកមូលនិធិតាមបណ្ដាសាខា ក្នុងឱកាសអបអរសាទរខួបទី១៥៧ ទិវាពិភពលោក កាកបាទក្រហម អឌ្ឍចន្ទក្រហម ០៨ឧសភាក្រោមប្រធានបទ(ខ្ញុំស្រឡាញ់សន្តិភាព ខ្ញុំស្រឡាញ់កាកបាទក្រហមកម្ពុជា) ព្រមទាំងបង្កើតគណៈកម្មការរៀបចំការគៀងគររកមូលនិធិ និងអំណោយមនុស្សធម៌ មានភារកិច្ចដូចជា៖
- រៀបចំធ្វើសេចក្តីអំពាវនាវ បណ្ដាខ្លឹមសារពាក់ព័ន្ធទិវា និងបែងចែកទៅតាមគោលដៅ
- រៀបចំរូបថតផ្សព្វផ្សាយ ពីសកម្មភាពមនុស្សធម៌នៅកន្លែងទទួលអំណោយ
- ផ្សព្វផ្សាយបញ្ជ្រាបការយល់ដឹងតាមប្រព័ន្ធព័ត៌មាន អំពីសារៈសំខាន់ទិវា ០៨ ឧសភា
- រៀបចំលិខិតថ្លែងអំណរគុណជូនសប្បុរសជន
- រាយការណ៍សុំយោបល់គណៈកម្មការកណ្ដាលករណីចាំបាច់
- បូកសរុបលទ្ធផលកៀរងគររកមូលនិធិប្រចាំថ្ងៃនិងវគ្គបញ្ចប់ ជូនថ្នាក់ដឹកនាំ។
ទន្ទឹមនឹងនោះ ឯកឧត្តម សុខ លូ បានសង្កត់ធ្ងន់ទៅលើការសម្អាតបរិស្ថាន សូមឱ្យថ្នាក់ដឹកនាំទាំងអស់ជំរុញផ្សព្វផ្សាយ ការសំអាតបរិស្ថាននៅក្នុងខេត្ត ក៏ដូចនៅតាមក្រុងស្រុក ដើម្បីឲ្យក្លាយទៅជាទីក្រុងស្អាត។ ម្យ៉ាងវិញទៀត សម្រាប់ពលករដែលធ្វើចំណាកស្រុកសព្វថ្ងៃនេះ ត្រូវតែតាមដានគាត់ជាប្រចាំគ្រប់ពេលវេលា ព្រោះគាត់ធ្វើដំណើរជាបន្តបន្ទាប់ ដើម្បីរួមគ្នាបង្ការទប់ស្កាត់ការរីករាលដាលជំងឺ កូវីដ-១៩។
