(រដ្ឋបាលកំពង់ធំ): ឯកឧត្តម សុខ លូ អភិបាលខេត្តកំពង់ធំបានដឹកនាំមន្ត្រីខេត្ត ក្រុង ស្រុក មន្ទីរ និងអង្គភាពពាក់ព័ន្ធ ចុះតាមដាន និងពិនិត្យស្ថានភាពជំនន់ទឹកភ្លៀងជាច្រើនកន្លែង នៅក្នុងភូមិសាស្ត្រស្រុកស្ទោង ស្របពេលដែលដំណក់ទឹកភ្លៀង នាព្រឹកថ្ងៃទី១៧តុលា ឆ្នាំ២០២០នេះ។
នៅក្នុងដំណើរចុះពិនិត្យស្ថានភាពជំនន់ទឹកភ្លៀងនាថ្ងៃនេះ ឯកឧត្តមអភិបាលខេត្ត និងសហការីបានចុះទៅពិនិត្យនៅទីរួមស្រុកស្ទោង ,ទំនប់បង្ហៀរទឹក ៣០កញ្ញា ស្ថិតក្នុងប្រជុំបីស្រុកមានស្រុកប្រាសាទបល្ល័ង្ក ស្រុកកំពង់ស្វាយ និងស្រុកស្ទោង ។
ឯកឧត្តមអភិបាលខេត្ត បានមានប្រសាសន៍ថា នៅពេលថ្មីៗកន្លងមកនេះ រដ្ឋបាលខេត្តបានចេញសេចក្តីជូនដំណឹង ដល់ប្រជាពលរដ្ឋដែលកំពុងរស់នៅតាមដងស្ទឹងសែន និងតំបន់ទំនាបនានាទៀត ឲ្យបង្កើនការប្រុងប្រយ័ត្ន ចំពោះគ្រោះទឹកជំនន់នេះរួចមកហើយនិងជូនដំណឹងពីការផ្អាកចរាចរណ៍លើផ្លូវមួយចំនួនក្នុងខេត្ត។ ដោយឡែកនៅថ្ងៃនេះ បន្ទាប់ពីទឹកស្ទឹងសែន បានបន្តហក់ឡើងលើសកម្ពស់ប្រកាសអាសន្ន ឯកឧត្តមអភិបាលខេត្តបានដឹកនាំមន្ត្រីចុះពិនិត្យពីស្ថានភាពជំនន់ទឹកភ្លៀងនេះ និងបានដាក់បទបញ្ជាដល់អាជ្ញាធរមូលដ្ឋានគ្រប់លំដាប់ថ្នាក់ និងកងកម្លាំងគ្រប់ប្រភេទ ត្រូវត្រៀមមធ្យោបាយ សម្ភារៈ និងកម្លាំងសរុប ដើម្បីចុះអន្តរាគមន៍ជួយសង្គ្រោះប្រជាពលរដ្ឋឲ្យបានទាន់ពេលវេលា។
ទន្ទឹមនេះទៀតអភិបាលខេត្តបានក្រើនរំលឹកដល់មន្ត្រីមូលដ្ឋាន ត្រូវបន្តតាមដានពីស្ថានភាពទឹកភ្លៀង នៅតាមមូលដ្ឋានរៀងៗខ្លួន ឲ្យបានជាប្រចាំ និងត្រូវបន្តផ្សព្វផ្សាយជូនដល់ប្រជាពលរដ្ឋ ដែលរស់នៅតាមដងស្ទឹងសែន ត្រូវមានការប្រុងប្រយ័ត្នគ្រប់ពេលវេលា ហើយក៏ត្រូវត្រៀមលក្ខណៈគ្រប់បែបយ៉ាង ដើម្បីសង្គ្រោះប្រជាពលរដ្ឋទៅកាន់ទីទួលមានសុវត្ថិភាព គ្រាទឹកជំនន់បន្តហក់ឡើង បង្ករជាគ្រោះមហន្តរាយ បំផ្លិចបំផ្លាញលំនៅដ្ឋាន ភូមិករ និងទ្រព្យសម្បត្តិរបស់ពួកគាត់។
បន្ថែមពីនេះទៀតឯកឧត្តមក៏បានដាក់បទបញ្ជាដល់មន្ត្រីខេត្ត ក្រុង ស្រុក និងកងកម្លាំងទាំង៣ ត្រូវត្រៀមមធ្យោបាយសរុប និងកម្លាំងសរុប ដើម្បីចុះអន្តរាគមន៍ជួយសង្គ្រោះប្រជាពលរដ្ឋ នៅក្នុងរដូវភ្លៀងធ្លាក់ និងគ្រោះទឹកជំនន់នេះឲ្យបានទាន់ពេលវេលា ដោយមិនត្រូវទុកប្រជាពលរដ្ឋណាម្នាក់ឲ្យរងគ្រោះដោយសារជំនន់ទឹកភ្លៀងជាដាច់ខាត។