(រដ្ឋបាលខេត្តកំពង់ធំ)៖ ឯកឧត្តម ងួន រតនៈ អភិបាលខេត្តកំពង់ធំ និងឯកឧត្តម ឈុន ឈន់ ប្រធានក្រុមប្រឹក្សាខេត្តបានអញ្ជើញជាអធិបតីក្នុងពិធីប្រកាសលោក អ៊ុត វណ្ណរ៉ា ត្រូវបានផ្ទេររភារកិច្ចពីអភិបាលស្រុកសណ្តាន់ មកបម្រើការងារជាអភិបាលស្រុកកំពង់ស្វាយជំនួសលោក អ៊ុន បុត្ត ដែលត្រូវទទួលភារកិច្ចថ្មីព្រឹកថ្ងៃទី៣០ ខែសីហា ឆ្នាំ២០២២ ដោយមានការអញ្ជើញពីអភិបាលរងខេត្ត មន្រ្តីរាជការ កងកម្លាំប្រដាប់អាវុធ ក្រុមប្រឹក្សាឃុំ ជាច្រើននាក់ ។
ជាមួយគ្នានេះឯកឧត្តម ងួន រតនៈ បានបញ្ជាក់ថា សម្រាប់ស្រុកកំពង់ស្វាយ លោក អ៊ុត វណ្ណរ៉ា គឺជាអភិបាលស្រុកទី ១២ហើយ ដែលបានមកកាន់តំណែងនៅទីនេះ។ ឯកឧត្តមអភិបាលខេត្តកំពង់ធំបន្តទៀត ការផ្លាស់ប្ដូរនិងការតែងតាំងមុខតំណែងថ្មីនេះគឺជាភាពចាំបាច់មួយហើយក៏ជាការបន្តនិរន្តរភាពរដ្ឋបាលស្របទៅតាមច្បាប់របស់ក្រុមប្រឹក្សាស្តីពីការគ្រប់គ្រងរដ្ឋបាលខណ្ឌ ក្រុង ស្រុក ពោលគឺមិនមែនដោយសារបញ្ហាប្រឈមដែលត្រូវផ្លាស់ប្ដូរនោះទេ គឺ ដោយលោកអភិបាលស្រុកចាស់ត្រូវទទួលភារកិច្ចថ្មី។
ឯកឧត្តម អភិបាលខេត្តកំពង់ធំបានថ្លែងបន្តថា «ក្នុងនាមជាគណៈអភិបាលស្រុកត្រូវខិតខំបម្រើសេវាសាធារណៈជូនប្រជាពលរដ្ឋឲ្យកាន់តែល្អប្រសើរ និងខិតខំដោះស្រាយរាល់សំណូមពររបស់ប្រជាពលរដ្ឋ ជាពិសេសត្រូវយកចិត្តទុកដាក់អនុវត្តន៍ឲ្យបានខ្ជាប់ខ្ជួននូវគោលនយោបាយ ភូមិ-ឃុំ មានសុវត្ថិភាព»។
ជាមួយគ្នានេះ ឯកឧត្តម ងួន រតនៈ បានក្រើនរំលឹកដល់អភិបាលស្រុកដែលត្រូវបានតែងតាំងថ្មី ត្រូវខិតខំបំពេញការងារដោយស្មារតីយកចិត្តទុកដាក់និងមានការទទួលខុសត្រូវខ្ពស់ប្រឹងប្រែងឲ្យអស់ពីកម្លាំងកាយចិត្ត ប្រាជ្ញាស្មារតី ដើម្បីបំពេញការងារជូនតម្រូវការជូនប្រជាពលរដ្ឋឲ្យកាន់តែសកម្មខ្លាំងក្លាថែមទៀត ដោយត្រូវគោរពរដ្ឋធម្មនុញ្ញ ច្បាប់ និង លិខិតបទដ្ឋានគតិយុត្តជាធរមាន របស់រាជរដ្ឋាភិបាលកម្ពុជា ។
