(រដ្ឋបាលខេត្តកំពង់ធំ)៖ នារសៀលថ្ងៃទី៣១ ខែមករា ឆ្នាំ២០២៣ នៅសាលាខេត្តកំពង់ធំ ឯកឧត្តម ថោង ខុន រដ្ឋមន្រ្តីក្រសួងទេសចរណ៍ និងឯកឧត្តម ងួន រតនៈ អភិបាលខេត្តកំពង់ធំ បានដឹកនាំកិច្ចប្រជុំពិភាក្សាស្ដីពីការត្រៀមរៀបចំពិធីបុណ្យទន្លេលើកទី៧ នៅខេត្តកំពង់ធំ ដោយមានការចូលរួមពីតំណាងក្រសួងស្ថាប័នពាក់ព័ន្ធ រដ្ឋបាលខេត្ត និងមន្ទីរអង្គភាពពាក់ព័ន្ធជុំវិញខេត្តជាច្រើនរូប។
ឆ្លៀតក្នុងឱកាសសនេះឯកឧត្តមបណ្ឌិត ថោង ខុនរដ្ឋមន្ត្រីក្រសួងទេសចរណ៍ក៏មានប្រសាសន៍ថា ពិធីបុណ្យទន្លេឆ្នាំនេះ និងផ្តល់ជូនសកម្មភាពសំខាន់ៗគឺ ការផ្សាយបន្តផ្ទាល់នូវការសម្ដែងទស្សនីយភាពសិល្បៈ ការប្រគុំតន្ត្រី ដោយមានការចូលរួមពីសំណាក់ ក្រុមសិល្បករ សិល្បការិនី តារាចំរៀងជាតិ អន្តរជាតិ និងការបាញ់កាំជ្រួចអបអរសាទរពិធីបុណ្យទន្លេ មហោស្រពម្ហូបអាហារខ្មែរ និងអន្តរជាតិ ស្រា និងភេសជ្ជៈ ព្រមទាំងការបង្ហាញផលិតផលទេសចរណ៍ និងគម្រោងអភិវឌ្ឍទេសចរណ៍របស់ខេត្តតាមដងទន្លេ និងការតាំងពិព័រណ៍ ផលិតផលកសិទេសចរណ៍និងផលិតផលក្នុងស្រុក។ សកម្មភាពកីឡា ដោយមានការចូលរួមពីសំណាក់កីឡាករ កីឡាការិនីជាតិ អន្តរជាតិ។
ឯកឧត្តម ងួន រតនៈ អភិបាលខេត្តកំពង់ធំ ក៏បានថ្លែងថា ពិធីបុណ្យទន្លេក្នុងខេត្តកំពង់ធំ គឺដើម្បីឲ្យមានភាពស្រស់ស្អាត ត្រូវមានការរៀបចំទីកន្លែងឲ្យមានអនាម័យ និងសណ្ដាប់ធ្នាប់ល្អ រួមទាំងទីកន្លែងតាំងលក់ផលិតផលផ្សេងៗទៅតាមផ្នែក និងកន្លែងសម្រាប់លេងកីឡានៅលើឆ្នេរខ្សាច់។ សម្រាប់រដ្ឋបាលខេត្តកំពង់ធំក៏បានរៀបចំក្លោងទ្វារធំ០២ ទី១រៀបចំដាក់នៅទីតាំងព្រំប្រទល់កំពង់ចាម-កំពង់ធំ ទី២រៀបចំដាក់នៅទីតាំងព្រំប្រទល់កំពង់ធំ-សៀមរាប និងក្លោងទ្វារតូចៗដាក់នៅក្នុងទីរួមខេត្តផងដែរ។ សម្រាប់នៅមាត់ស្ទឹងទល់មុខសាលាខេត្ត ដាក់ប៉ាណូផ្ទាំងធំ នៅថ្ងៃពិធីបុណ្យទន្លេ ដែលមានអត្ថន័យថា(អបអរសាទរពិធីបុណ្យទន្លេលើកទី៧ និងអរគុណសន្តិភាព)។
សូមបញ្ជាក់ថា៖ ពិធីបុណ្យទន្លេនឹងប្រព្រឹត្តទៅរយៈពេល០៣ថ្ងៃ ចាប់ពីថ្ងៃទី០៨-១០ ខែមីនា ឆ្នាំ២០២៣ ហើយសម្ដេចតេជោនាយករដ្ឋមន្រ្តី និងសម្ដេចកិត្តិព្រឹទ្ធបណ្ឌិត នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីបើកបុណ្យទន្លេ នាល្ងាចថ្ងៃទី០៩ ខែមីនា ឆ្នាំ២០២៣។
