(រដ្ឋបាលខេត្តកំពង់ធំ)៖ នាព្រឹកថ្ងៃទី២៥ ខែកក្កដា ឆ្នាំ២០២៤ ឯកឧត្តម ញឹក បានខេង អភិបាលរងខេត្តកំពង់ធំ បានអញ្ជើញដឹកនាំកិច្ចប្រជុំត្រៀមរៀបចំពិធីអបអរសាទ ពិធីបើកការដ្ឋានសាងសង់ព្រែកជីកហ្វូណនតេជោ នៅថ្ងៃទី ០៥ សីហា ២០២៤ខាងមុខនេះ តាមសារាចរណ៍ណែនាំរបស់រាជរដ្ឋាភិបាល ឲ្យគ្រប់ស្ថាប័នអង្គភាពរដ្ឋ និងឯកជន គ្រប់ទីអារាម និងកន្លែងផ្សេងៗ ទូទាំងព្រះរាជាណាចក្រកម្ពុជា ជួបជុំគ្នាដើម្បីត្រៀមរៀបចំធ្វើការវាយគង ជួង រគាំង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលខ្លួនមាន នាវេលាម៉ោង ៩:០៩នាទីព្រឹក នៅគ្រប់ទីកន្លែង ឱ្យបានកុះករ ក្លៀវក្លា និងអធិកអធម ហើយនៅពេលយប់មានការអុជកាំជ្រួចផងដែរ ដើម្បីបង្ហាញពីការគាំទ្រ លើកទឹកចិត្តនូវការអនុវត្តគម្រោងព្រែកជីកហ្វូណនតេជោរបស់កម្ពុជា។
ឯកឧត្តម ញឹក បានខេង បន្ថែមទៀតថា គម្រោងនេះនឹងបង្កើតឱកាសល្អសម្រាប់កម្ពុជា ដើម្បីធានាមានផ្លូវដឹកជញ្ជូនទៅកាន់សមុទ្រ បានដោយខ្លួនឯង ដោយមិនចាំបាច់ឆ្លងកាត់ប្រទេសដ៏ទៃ ជាពិសេសជួយឲ្យកម្ពុជាពង្រឹងបាននូវឯករាជ្យភាព ខាងនយោបាយលើការដឹកជញ្ជូនតាមផ្លូវទឹក។
សូមបញ្ជាក់ផងដែរថា គម្រោង «ព្រែកជីកហ្វូណនតេជោ» មានប្រវែង ១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លង កាត់ខេត្តចំនួន៤ ៖ ខេត្តកណ្តាល ខេត្តតាកែវ ខេត្តកំពត និងខេត្តកែប ។ ផ្លូវទឹកនេះ នឹងមានទទឹងមុខកាត់ផ្នែកខាងលើ ប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ ៨០ម៉ែត្រ និងជម្រៅទឹកប្រមាណ ៥,៤ម៉ែត្រ (ជម្រៅនាវាចរណ៍ ៤,៧ម៉ែត្រ និងគម្លាតសុវត្ថិភាព ០,៧ម៉ែត្រ) មានគន្លងនាវាចរណ៍ចំនួន ២គន្លង អាចចេញ-ចូល និងជៀសគ្នាបាន ដោយសុវត្ថិភាព ដោយចំណាយទុនវិនិយោគប្រមាណ ១ ៧០០លានដុល្លារ និងរយៈពេលសាងសង់ប្រហែល ០៤ឆ្នាំ។
អត្ថបទដោយ៖ លោក ឈួន ឆេងមួន